EKLESIASTIKO 22
22
Kuviawɔwɔ kple bometsitsi
1Kuviatɔ le abe kpe si le ŋu nyɔm ene,
eye ame sia ame tsiã ɖe eƒe ŋukpenanuwɔwɔ ŋuti.
2Kuviatɔ le abe ŋunyɔnu le aɖukpo dzi ene;
ame ɖe sia ɖe si lée la, aʋuʋui ɖa le eƒe asi ŋu.
3Enye ŋukpe be ame nanye tɔ́ na viŋutsu si womehe o,
eye vinyɔnudzidzi la agbaɖuɖue.
4Vinyɔnu si si susu le la te ŋu kpɔa ŋutsu ɖena
gake esi wɔa ŋukpenanu la nye veve na tɔ́a.
5Vinyɔnu mabuame doa ŋukpe tɔ́a kple srɔ̃a,
eye wo kple eve la siaa doa vloe.
6Dzeɖoɖo si yia edzi le ɣeyiɣi si medze me o la
le abe hadzidzi le konyifaɣi ene,
gake ƒoƒo kple hehe nye nunya ɣeawo katã ɣi.
7Ɖevi siwo wonyi le agbenɔnɔ nyui ƒe mɔ dzi la
ɣlaa ƒome gblɔe si me wodzi wo dzilawo ɖo.
8Gake ɖevi siwo mebua ame o, eye wodoa wo ɖokui ɖe dzi glodzoo la
nyea ŋukpe na ƒome nyui si me wòtso la.
9Ame si ke fiaa nu bometsila la le abe ame si le ze gbagbã trem la ene,
alo abe ame si ke nyɔ alɔ̃dɔla tso alɔ̃ me ʋĩi ene.
10Ame si ke gblɔa ŋutinya na bometsila la gblɔe na ame si alɔ̃ le mo na la,
eye mlɔeba la abia be: “Nu kae?”
11Fa avi na ame kuku, elabe egble kekeli ɖe megbe dzo yina,
eye fa avi na bometsila, elabe egble nunya ɖe megbe.
Fa avi na ame kuku ʋɛ ko, elabe eya la, gbɔgbɔm wòle ɖe eme;
gake bometsila ƒe agbenɔnɔ vlo wu ku.
12 #
Mos I, 50.10; Yudit 16.24. Konyifafa na ame kuku nɔa anyi ŋkeke adrẽ,
gake konyifafa na bometsila alo mawumavɔ̃la nɔa anyi le woƒe agbe me ŋkekewo katã me.
13Mègaƒo nu kple ame si si susu mele o la fũu o,
alo nàɖi tsa ayi ame si ƒe susu mekɔ o la gbɔ o.*
Nɔ adzɔge tso egbɔ; ne menye nenemaa o la, àge ɖe xaxa me,
eye ne eʋuʋu eɖokui la, eƒe ɖi ahlẽ ɖe ŋuwò.
Dze nɛ, eye àkpɔ gbɔdzɔe,
mati wò gbeɖe o, be eƒe susu mede o.
14Nu kae kpena wu tsumi?
Eƒe ŋkɔ ɖe? Ɖe menye “Bometsila” ye oa.
15Ke, dze kple gakpo sue aɖe tsɔtsɔ
le bɔbɔe wu ame manyanu ƒe agba
16Ʋuƒo si wode gli me sesĩe le xɔtutu me la,
anyigbaʋuʋu meɖenɛ o;
ale susu si woɖo kplikpaa le ŋugbledede geɖe megbe la,
mavɔ̃ le xaxaɣi o.
17Susu si lé ɖe tamebubu kɔkɔ aɖe ŋu la
le abe gli si wodzɔ hewɔ zɔzrɔ̃e, tsɔ ɖo atsyɔ̃ nɛ ene.
18Kpɔ si wotɔ ɖe kɔkɔƒe la, manɔ te sesĩe ɖe ya nu o;
ale susu si vɔ̃na kple bometsila ƒe tameɖoɖo
manɔ te sesĩe ɖe vɔvɔ̃ aɖeke nu o.
Xɔlɔ̃wɔwɔ
19Ame si tsɔ nu tɔ ŋku la, eyae nana be aɖatsi dona,
eye ame si tsɔ nu tɔ dzi la, eyae hea eƒe seselelãme doa goe nyuie.
20Ame si daa kpe xeviwo la nyàa wo ɖa,
eye ame si dzua xɔlɔ̃ la, gblẽa xɔlɔ̃wɔwɔ me.
21Ne èhe wò yi ɖe go ɖe xɔ̃wò ŋu gɔ̃ hã la,
dzi megaɖe le ƒowò o, elabe mia dome agaɖɔ ɖo.
22Ne ètsɔ nù ɖe xɔ̃wò ŋu la,
mègatsi dzimaɖi o, elabe mia domedzadzraɖo anyawɔ.
Gake le abe ame dzudzu, amemabumabu,
goʋuʋu nya ɣaɣla alo tɔtrɔ le ame yome gome ene ya la,
xɔlɔ̃ ɖe sia ɖe ade afɔ du me, así.
23Nà wò aƒelika naxɔ dziwò ase le ahedada me,
ale be nàte ŋu akpɔ dzidzɔ kplii, ne nu dze edzi nɛ.
Nɔ te ɖe egbɔ le xaxaɣi
ale be nàte ŋu akpɔ gome le eƒe domenyinyi me.
24Dzoya kple dzudzɔ tso kpodzo me doa ŋgɔ na dzo la;
ale dzudzu doa ŋgɔ na ʋukɔkɔɖi.
25Menye ŋukpe nam be madi nɔƒe na xɔlɔ̃ aɖe wòanɔ o,
eye nyemaɣla ɖokuinye ɖee o.
26Gake nenye be nu vevi aɖe awɔm le eta la,
ame si ke see la, akpɔ nyuie le eŋu.
Gbedodoɖa be woabia kpekpeɖeŋu ɖe nuvɔ̃ ŋuti
27Ame ka aɖo dzɔla ɖe nye nù ŋu,
eye wòatsɔ nutrenu sesẽ atre nye nuyiwo,
ale be nyemate ŋu adze anyi to wo dzi,
eye nye aɖe mate ŋu atsrɔ̃m o?
EƲEGBE BIBLIA © The Bible Society of Togo, 2014.