रोमी 13
13
सरकारौ अधीनाङ ङुकी पर्ले
1पट्ट भर्मीको शासककुङ अधीनाङ ङुकी पर्ले, हीजैडेनाङ परमेश्वरै होखुरीककी शासन जाट्च अधिकार याम्हने। शासककोलाक शासन जाट्कीयो लागि परमेश्वर लहे न नियुक्त जाटार डामने। 2होटबाटै सुये शासककुङ विरोध जाट्ले होचे परमेश्वरौ आज्ञाकी विरोध जाट्ले र सु-सुये विरोध जाट्ले होखुरीकै सजाय डुप्ले। 3हीजैडेनाङ सेछ काम जाट्चको होइन, तर मासेछ काम जाट्चको शासककोखाटा बीह्रीखी पर्ले। होटबाटै नाखुरीक शासककोखाटा माबीह्रीम ङुच मीमन जाट्ले डेनाङ, सेछ काम जाट्नी र होखुरीक लकीङ नाखुरीकै प्रशंसा डुप्ले। 4शासकको नाखुरीकुङ लागि सेछ काम जाट्च परमेश्वरौ सेवकको हो। नाखुरीकै मास्च काम जाटा डेनाङ मट्टै शासककोखाटा बीह्रीनी, हीजैडेनाङ शासककोखाटा सजाय याछ अधिकार ले। शासकको मास्च काम जाट्चकोलाक सजाय याखीयो लागि परमेश्वरै डाच भर्मीको हो। 5होटबाटै सजाय लकीङ जोगडीस्कीयो लागि मट्टै होइन तर लहो विवेकै इट जाट्की ठिक न हो डेयार पनि नाखुरीक शासककुङ अधीनाङ ङुकी पर्ले।
6नाखुरीकै कर तेरीकी पर्च कारण र इसे न हो, हीजैडेनाङ शासककै लहो जिम्मेवारी पूरा जाट्न ङुनाङ परमेश्वरौ लागि काम जाट्न ङुच छान्ने। 7नाखुरीकै तेरीकी पर्च कर पट्ट न तेरीनी, कर तेरीकी पर्चकी कर तेरीनी, सुल्क तेरीकी पर्चकी सुल्क तेरीनी। होटजाट्न न आदर जाट्की पर्चकोलाक आदर जाट्नी, इज्जत जाट्की पर्चकोलाक इज्जत जाट्नी।
काटै-काटौ लागि जिम्मेवारी पूरा जाट्की
8काटै काटकी प्रेम जाट्की बाहेक अरु कुसेर कुराङ फोकुङ ऋण माबुनी। हीजैडेनाङ लहो छिमेकीकी प्रेम जाट्चये न परमेश्वरौ व्यवस्था पूरा जाट्च छान्ने। 9व्यवस्थाङ व्यभिचार माजाट्की, भर्मी मासाट्की, माखुस्की, लोभ माजाट्की डेच #प्रस्थान २०:१३-१५,१७आज्ञाको ले। लहे लाहाकी कुटजाट्न प्रेम जाट्ले, लहो छिमेकीकी र होटजाट्न न प्रेम जाट्की#लेवी १९:१८ डेच चहिँ व्यवस्थौ मुख्य कुरा हो। 10प्रेम जाट्च भर्मीये सेन र अरुकी मास्च माजाट्ले। होटबाटै प्रेम जाट्की न व्यवस्था पूरा जाट्की हो।
11इसे पट्ट न कुराको जाट्नी, कुङ्च समय राखी पामने होसे नाखुरीककी थाहा न ले। अब मीमीक झ्युक्च लकीङ झेर्च समय राम्हने। हीजैडेनाङ कानै पहिला विश्वास जाट्च समय डेनाङ चाहाँ कानुङ मुक्ति झन् खेरेप राम्हने। 12नाबीकुङ समय केल्खीपाम भ्या अब ट्याङ्छ दिन राखी पाम भ्यामने। होटबाटै छुम्पाक डाङ्ठाङ जाट्न ङुच मास्च कामकी डासीङ। छुम्छौ शक्तिखाटा पुन्खी ज्योतियो हतियार भेरीसार तयार छान्नी। 13ट्याङ्छ दिनाङ लेखा न कान सेम्हखाटा काम जाटीङ। छुम्ठाङ लेखा मोज मज्जा जाट्च, म्होर्न ह्वाच, व्यभिचार जाट्च, भ्रष्टचार जाट्च, पुन्ह ह्वाच र डाह जाट्च बानी डासीङ। 14तर प्रभु येशू ख्रीष्टौ स्वभावकी लाच जाटीङ, अनि पाप स्वभावौ इच्छाकी पूरा जाट्की मापइँ।
© 2025 by Mother Tongue Translators Society and Wycliffe Bible Translators, Inc.