प्रेरित 7
7
स्तिफनसौ सन्देश
1स्तिफनसकी प्रधान पूजाहारीये गीना, “ही इसे कुरा साँच्ची न हो?”
2स्तिफनसै डेया, “ए डाजेभाइको र बोइको, सेनी। महिमौ परमेश्वरै कानुङ पुर्खा अब्राहामकी हारान डेच ठावाङ नुङ्की डेनाङ अघि मेसोपोटामीयुङ क्षेत्राङ ङुनाङ दर्शन याहा। 3अनि परमेश्वरै आसकोकी डेया, ‘नाको लहो ठाउँ र कुटुम्बकोलाक डास्नी र कुसे ठाउँ ङा नाकोकी टान्हाक्ले होला नुङ्नी।’#उत्पत्ति १२:१ 4अब्राहाम कल्दीकुङ ठाउँ लकीङ ख्योहार हारानाङ नुङार ङुवा। अनि अब्राहामौ बोइ सीरखीङ परमेश्वरै होसकी नाखुरीक चाहाँ ङुच इसे ठावाङ सारीम राका। 5परमेश्वरै अब्राहामकी इसे ठावाङ बोइ बाज्युकुङ जग्गा बारी हीर माह्या, मीखुट्या टेक्डीच ठाँउसम्म र माह्या। तर होच्यो काट र सन्तान मालेनाङ र पनि परमेश्वरै ‘ङा इसे ठाउँ नाको र नाकुङ राछ सन्तानकोलाक लहो सम्पत्तियो रुपाङ याल्हे’ डेयार प्रतिज्ञा जाटा। 6अनि परमेश्वरै आसकोकी इट र डेया, ‘नाकुङ सन्तानको फोकुङ देशाङ नुङार ङुकी पर्ले र होसे देशुङ भर्मीकै होखुरीककी कमारा खासार बुलीसय वर्षसम्म दु:ख याहार डाले। 7तर होखुरीक कुसे जातियो कमारा छानार ङुले होसे जातिकी ङा न दण्ड याल्हे। होटै न्हुइङ होखुरीक होसे देश लकीङ ख्योम्ह राहार इसे न ठावाङ होखुरीकै ङौ आराधना जाट्ले।’#उत्पत्ति १५:१३-१४; प्रस्थान ३:१२
8“अनि परमेश्वरै अब्राहामखाटा करार छ्याकार आसकोकी डेया होसे करारौ चिन्ह चहिँ खतना जाट्की हो। जब इसहाक डीन्हा र अब्राहाम बोइ छाना अनि आठ याकाङ अब्राहामै इसहाकौ खतना जाटा। इसहाकै लहो मीजा याकूबौ र याकूबै लहो बाह्र जना मीजाकुङ खतना जाटा र बाह्र कुलौ पुर्खा छाना।
9“योसेफकी मेन डाजेभाइकै मीरीस जाट्न्या होटबाटै होखुरीकै होसकी मिश्र देशाङ कमारा छान्कीयो लागि आर्लाम का। तर परमेश्वर होसेखाटा लेया। 10र परमेश्वरै होसकी पट्ट न कष्ट लकीङ छुटकारा याहा। अनि मिश्र देशुङ फारो राजौ अगाडि बुद्धि याहा र होटबाटै फारो राजै होसकी आदर जाटा। होटै फारोये होसकी मिश्र देशुङ र मेन दरबारुङ हाकिम खासा।
11“होटै न्हुइङ मिश्र देश र कनानाङ बाड्को अनिकाल पर्या र साह्रै दु:ख छाना, अनि कानुङ बोइ बाज्युकै अन्न माडुपा। 12तर याकूबै मिश्र देशाङ अन्न ले डेच कुरा सेयार लहो लेन्जा मीजाको, कानुङ पुर्खाकोलाक पहिलो खेप होसे देशाङ बीर्न्हका। 13फेरि होखुरीक दोस्रो खेप अन्न लोकी नुङ्नाङ योसेफै लहो डाजेभाइकोलाक लाहाकी चीन्डीयाका। होटै योसेफौ परिवारौ बारेयाङ फारोकी र थाहा छाना। 14योसेफै लहो बोइ याकूब र पट्ट न परिवारको समेत लार मिश्राङ राखी डेयार आर्घामका र मिश्राङ राछको जम्मा पचहत्तर जना लेया। 15इटजाट्न याकूब मिश्राङ नुङा होटै होला न सीया र कानुङ बोइ बाज्युको र होला न सीया। 16होटै न्हुइङ होखुरीकुङ लाश लहो न देशुङ सकेम डेच सहराङ ल्हेट्न राका अनि अब्राहामै सकेमाङ हमोरौ लेन्जा मीजाकोखाटा चाँदी याहार लोच चिहानाङ ठाका।
17“परमेश्वरौ लागि अब्राहामखाटा जाट्च प्रतिज्ञा पूरा जाट्च समय खेरेप राम्हन्या। होडीक बेला न मिश्र देशाङ कानुङ भर्मीकुङ संख्या बड्डीसा। 18र काट जना राजै मिश्र देशाङ राज्य जाट्की ठाला, होसकी चहिँ योसेफौ बारेयाङ हीर थाहा मालेया। 19होचे कानुङ जातिखाटा मास्च योजना खासा र अत्याचार जाटा। कानुङ बोइ बाज्युकी होखुरीकुङ बालककोलाक बाहिर आल्हार डाकी लैडीमन्या, होटबाटै चाम-चाम डीन्छ पट्ट न बालकको सीमन्या।
20“होडीक न बेला मोशाकी डीन्हा। होसे बालक सेछ लेया। होच्यो बोइ-मोये होसकी आर्च्युकार सोम महिनासम्म इमाङ न कोकार डा। 21होखुरीकै होसकी आर्च्युकार डाकी माह्योका र होसकी बाहिर आल्हा, अनि फारो राजौ मास्टो मीजै मोशाकी आल्हार लहो मीजा खासार कोका। 22होटै मोशाकी मिश्रीकुङ पट्ट न शिक्षा याहा र होसे ङाक्की र काम जाट्की वार्छ छाना।
23“जब मोशा चालीस वर्ष टाहा, अनि होचे लहो जाति इस्राएली डाजेभाइकोलाक डुप्च मीमन जाटा। 24कायाक काट मिश्रीये लहो जाति इस्राएली मीटाक अन्याय जाट्च मोशै डाङा होटबाटै आसकै होसकी जोगडीया, र होसे मिश्रीकी साटार बदला ला। 25परमेश्वरै मोशौ मीहुटीङ इस्राएलीकोलाक छुटकारा याल्हे डेच कुरा लहो जातिये बुझडीस्ले औला डेम मोशै आर्मीट्न्या। तर होखुरीकै इसे कुरा माबुझडीसा। 26होटै पीउह्राक लेखो नीस जना इस्राएलीको न झगडा जाट्चै जाट्च मोशै डाङा र होखुरीककी खाटाक्की पाचै डेया, ‘सेनी, नाखुरीक च लहो डाजेभाइ हो, हीजै इटजाट्न लाहा लाहाङ पुन्छ?’ 27तर लहो छिमेकी मीटाक अन्याय जाट्चये मोशाकी इट डेयार ढुसा, ‘कान मीटाक हाकिम र न्याय जाट्च खासार नाकोकी सुये बीर्न्हका? 28ही टीस्यामीङ होसे मिश्रीकी साट्च लेखा न नाको ङाकीर साट्की पाच?’#प्रस्थान २:१४ 29होटै याङ्च जवाफ सेरखीङ मोशा मिश्र देशीङ भोग्डीसार मिद्यान डेच देशाङ नुङा र होला न ङुवा। र होला होच्यो नीस लेन्जा मीजाको डीन्हा।
30“चालीस वर्ष न्हुइङ सीनै पर्वतौ उजाड ठावाङ काट पोथ्राङ ढाचै जाट्च म्हेओ ज्वालाङ काट स्वर्गदूत मोशै मेन म्याहासाङ डाङा। 31जब मोशै इसे डाङा तब होसे छक्क पर्या, र होसे ङोस्की डेम खेरेप नुङ्नाङ परमप्रभुओ याङ्च स्वर सेया, 32‘ङा नाकुङ बोइ बाज्यु अब्राहाम, इसहाक र याकूबौ परमेश्वर हो।’#प्रस्थान ३:६ इसे कुरा सेरखीङ मोशा बीह्रीयार ठेर-ठेर बुरुका होटै होचे होलाक ङोसकी आँट जाट्की न माह्योका। 33तब परमप्रभुये मोशाकी डेया, ‘नाकुङ मीहीलुङ चप्पल डोन्नी, हीजैडेनाङ कुसे ठावाङ नाको टोङ्हने, होसे पवित्र ठाउँ हो। 34मिश्र देशाङ लेच ङौ भर्मीकुङ कष्ट ङै डाङ्ङने र होखुरीकुङ बिलौना र सेमने। होखुरीककी छुटकारा याखी डेम ङा म्हाका राछ हो। अब नुङ्नी, ङा नाकोकी मिश्र देशाङ बीर्न्हकाले।’#प्रस्थान ३:५-१०
35“होसे न मोशाकी लहो जातिकै इट डेयार इन्कार जाट्न्या, ‘सुये नाकोकी हाकिम र न्याय जाट्च खासार इला बीर्न्हका?’ होसकी न परमेश्वरै म्हे ढाम ङुच पोथ्राङ डाङ्च स्वर्गदूतै इस्राएलीकोलाक उद्धार जाट्की हाकिम र अगुवा खासार बीर्न्हका। 36होसे न भर्मीये मिश्र देश लकीङ बाहिर राका र ग्याच समुद्राङ र उजाड ठावाङ चालीस वर्षसम्म अचम्मौ काम र चिन्हको जाटा। 37होसे न मोशै इस्राएलीकोलाक डेमन्या, ‘परमेश्वरै ङाकी बीर्न्हकानाङ लेखा न नाखुरीकुङ डाजेभाइको लकीङ काट जना अगमवक्ता नाखुरीक लेठाङ बीर्न्हकाले।’#व्यवस्था १८:१५ 38इस्राएलीको उजाड ठावाङ जम्मा छान्नाङ मोशा होखुरीकखाटा न लेया। स्वर्गदूत सीनै पर्वताङ आसकोखाटा ङाका र आसकै न कानकी याखीयो लागि जीवित वचन डुपा।
39“तर कानुङ बोइ बाज्युकै मोशाकी मामन्डीयार होखुरीकै आसकोकी डासार मिश्र देशाङ न ल्हेसार नुङ्की मीमन जाटा। 40होटै होखुरीकै मोशौ डाजे हारुनकी डेया, ‘कानुङ अगाडि-अगाडि कानकी लाम टान्हाक्च देवताको खास्न यान्ही, हीजैडेनाङ कानकी मिश्र देशीङ छ्युकार राक्च होसे मोशाकी ही छाना कान हीर माह्वार्ले।’#प्रस्थान ३२:१
41“होडीक बेला होखुरीकै काट बाछौ मूर्ति खासा र होच्यो अगाडि भोग याहा अनि लहो मीहुटै खास्च कामाङ होखुरीकै खुसी मन्डीया। 42होटबाटै परमेश्वरै होखुरीककी डासा, र होखुरीककी सर्घाङ लेच नाखान, ग्याहोट र टुगाकोलाक पूजा जाट्की डास्न याहा, होच्यो बारेयाङ अगमवक्ताकुङ किताबाङ इट डेम रीक्ङने,
‘ए इस्राएलुङ भर्मीको,
ही नाखुरीकै ङाकी न चालीस वर्षसम्म उजाड ठावाङ पशुकुङ भोग र भेटीको चढडीया होइन र?
43नाखुरीकै मोलेख डेच देवतौ पाल र रेफन देवतौ टुगा।
नाखुरीकै पूजा जाट्की खास्च होसे मूर्तिको बुवार आल्हा।
होटबाटै अब ङा नाखुरीककी दण्ड याखीयो लागि बेबिलोन डेनाङ लोस बीर्न्हकाले।’
44“उजाड-ठाँवाङ कानुङ बोइ बाज्युकोखाटा गवाहीयो पाल लेया होला चहिँ होखुरीकै परमेश्वरौ आराधना जाट्नन्या। मोशै होसे पालकी परमेश्वरै टान्हाक्च नमूना अनुसाराङ न खास्नन्या। 45कानुङ बोइ बाज्युकोलाक अन्यजातिकुङ देश जुकी परमेश्वरै सहायता जाटा र होखुरीकै यहोशूखाटा होसे पाल राका। होटै दाऊद राजौ पालासम्म न होसे होखुरीकखाटा न ङुवा। 46परमेश्वर राजा दाऊदखाटा माह्राङ्न्या र याकूबौ परमेश्वरौ#७:४६ याकूबौ परमेश्वरौ: यहूदिकै सेन खाल परमेश्वरकी याकूबौ परमेश्वर डेमन्या। याकूब चहिँ होखुरीकुङ पुर्खा लेया, न्हुइङ होसकी इस्राएल म्यार्मीन डा। लागि काट ङुच ठाउँ खास्की डेम बिन्ती जाटा। 47तर होसकुङ लागि मन्दिर चहिँ मीजा सोलोमनै मट्टै खासा।
48“तर परमेश्वर महान लेचबाटै भर्मीकुङ मीहुटै खास्च मन्दिरकोवाङ माङुले। अगमवक्तै इटजाट्न डेमने,
49‘परमप्रभु डेले, ङौ सिंहासन स्वर्ग हो र पृथ्वी चहिँ ङौ मीकु डाच ठाउँ हो,
र नाखुरीकै ङौ लागि कुङ्च मन्दिर खास्ले?
ङौ म्हुङ बाट्च ठाउँ कुसे हो?
50ही इसे पट्ट न ठोक ङौ न मीहुटै खास्च होइन र?’#यशैया ६६:१-२
51“ए अटेरी भर्मीको, कठोर मीमन लेच र बहिरा मेनेकेप लेचको, नाखुरीक सधैँ पवित्र आत्मौ विरोध जाट्ले। नाखुरीकुङ बोइ बाज्युकै लेखा न नाखुरीकै जाट्ले। 52र अगमवक्ताको मध्याङ कुसे चहिँकी नाखुरीकुङ बोइ बाज्युकै मासतडीम्या र? होखुरीकै परमेश्वरौ पवित्र जन राम्हन ले डेम अघि लकीङ न घोषणा जाट्च अगमवक्ताकोलाक समेत साटा। अनि नाखुरीकै राछ पवित्र जनकी धोका याहार साटा। अब नाखुरीक चहिँ होसकुङ ज्यानमारा छान्ने। 53स्वर्गदूतकै याछ व्यवस्था च नाखुरीकै डुपा तर होसकी नाखुरीकै मामन्डीया।”
स्तिफनसकी ल्हुङै ङापार साट्च
54जब स्तिफनसौ इसे कुरा सेया अनि महासभाङ ङुच भर्मीको मीरीसै चुर छानार दाह्रा जीका। 55तर होसे चहिँ पवित्र आत्मै न्हेपार स्वर्गपट्टी एकोहोरो छानार ङोसा। अनि होचे परमेश्वरौ महिमा र येशूकी परमेश्वरौ डोर पट्टी टोङ्ह ङुच डाङा। 56अनि स्तिफनसै डेया, “ङोस्नी, ङै स्वर्ग फोस्च डाङ्ङने र भर्मीयो मीजाकी परमेश्वरौ डोर पट्टी टोङ्ह ङुच ङै डाङ्ङने।” 57तर होसे भर्मीको बाड्को स्वरै च्याका र लाहा लहो मेनेकेप ठुना, र पट्ट न होसे मीटाक झम्टडीसा। 58होटै स्तिफनसकी होखुरीकै सहर बाहिर छ्युकार आल्हा। अनि साक्षीकै लाहा लहो बढीन डोनार शाऊल डेच रेन्जा भर्मीयो मीकु छीनी डा र होसकी साट्की डेम ल्हुङै ङाप्की ठाला। 59इटजाट्न होखुरीकै स्तिफनसकी ल्हुङ ङाप्चै हीर्कडीम न लेया, अनि होचे प्रार्थना जाटा, “ए प्रभु येशू, ङौ आत्माकी ग्रहण जाट्न यान्ही।” 60अनि होचे घुँडा टुसार बाड्को स्वरै च्याकार डेया, “ए प्रभु, इसे पापौ दोष इखुरीककी मालग्डीस्ख्यो।” इट डेयार होचे प्राण डासा।
© 2025 by Mother Tongue Translators Society and Wycliffe Bible Translators, Inc.