Kari Rdrudan 30
30
Kari Rnengo Agur
1Kari laqi Yaqeh, Agur seediq Mazusa, kiya ka seediq nii ka rmnengo quri Itiel ma Ukal.
2Pntnaun hbaro seediq we mntena ku bale camac,
uka ka knkela so seediq.
3Ini kmalu snlhayan mu knkela,
ini mu klai ka Mrtaso Paru uri.
4Ima ka wada baro ma meyah hunac dungal?
Ima ka psseli bgihur ckceka qapal baga?
Ima ka lmabu qsiya ckceka lukus?
Ima ka pnheyu bobo dxeral?
Ima ka ngayan na?
Ngayan laqi na we ima ho?
Mkela su ka isu?
5Ndaan smino kana ka klegan kari Utux Baro,
smtama heya we, maha so qqeerung ndheya ka heya.
6Iya prana kari na ka isu,
maha su na ksengun ma, maha truura ka qnbriqan su isu.
Duma Kari Nrudan
7Mpesa ku 2 ooda isu,
berah ini ku huqil na we, iya ku hteri han.
8Ani su ba rabang, braho su qdriqi peeyah yaku ka uxe bale ma mberiq,
so ku uxe mpqrinuc ma uxe ku mpbleyaq dnoi uri,
biqi ku puqun mu.
9So ku uxe mtengi de, maalix ku isu. Mprengo ku:
“Ima ka Utux Tmninun?”
So ku uxe mpqrinuc de mosa gmeeguy,
kiya de smeeliq ngayan Utux Baro mu.
10Iya pqrii bukung smeeliq ka tnqliyan na,
so uxe mpsiyus isu, kiya de niqan su qnquwan noda di.
11Niqan 1 klegan seediq, cmiyus tama,
ini sbleyaq bubu.
12Niqan 1 klegan seediq, lmngelung knbhege na ka heya da,
kiya we ini na snagi ka qnrutiq na.
13Niqan 1 klegan seediq, psparu riyung ka doriq na,
ani klabi doriq uri we ga baro bale.
14Niqan 1 klegan seediq, mntena yayu ka waqic na, mntena slmadac ka rupun,
rmequn smeeliq kana seediq mqraqil ma seediq qrinuc.
15Niqan 2 weewa ka wili:
“Biqi ku, biqi ku.”
Niqan 3 ka ini knttuku,
4 ka ini rengo “Baka da:”
16Tuxan mnkuung ma plabu ini tnlaqi,
dxeral uka beyax hmeguc qsiya, ini rengo “baka da” mesa ka puniq.
17Mhulis tama, psparu ma ini qbahang bubu,
meyah gmatuk doriq na ka tyaqung ckceka ayu, rehaq we meyah mekan heya uri.
183 sklwiun ka uka mu ba klaan lmngelung,
4 ka ini mu klai:
19Kiya ka elu skyaan qdiro karac baro,
elu ddaun quyu bobo tasil,
elu ddaun asu ckceka rcilung paru,
elu mtheyaq rseno ma mqedil.
20So nii ka elu mqedil kkbrexan,
mnekan ka heya de, smerus quwaq na de rmengo:
“Uka ndaan mu mqnuuqu.”
21Pklgelu dxeral we niqan 3 klegan,
ini smai mheal dxeral we niqan 4 klegan:
22Kiya ka wada mqbsuran paru ka tnqliyan,
mtengi bale ka seediq mngataq.
23Wada rseno ka mqedil so sntali,
rmirih mqedil tnsapah ka mqedil tnqliyan.
24Dxeral we niqan 4 klegan ani biciq we, kiya ka niqan ba gnkela:
25Qtahi we klegan so uka beyax kiya,
kiya we psramal uqun daha karac rbagan.
26Rqebux we klegan uka beyax,
kiya we dehuk smmalu sapah ckceka tasil.
27Uka qbsuran paru ka utun,
kiya we mkela msaasu mosa ngnganguc.
28Klaun su qmerac baga ka cilu qnabil,
kiya we meniq ckceka sapah qbsuran paru ka heya.
29Mbeyax ba dapil papak daha we niqan 3 klegan,
niqan ba bgihur kkesa na we niqan 4 klegan:
30Rkelic rudu, kiya ka paru bale pahung ckceka kana ccamac,
ani smterung ani maanu ini kbberih.
31Huling pphlingun, baus miric dgiyaq ma,
qbsuran paru niqan hbaro ba supi.
32Nasi su meepah ooda mngataq, ppqita ma psparu,
uxe uri smmalu naqah ooda, kiya de gmuki baga ka quwaq su.
33Pgimax beyuq nunuh dapa de maha smalu uqun snmalu nunuh,
qmecul muhing we mpsdara,
mntena so kiya uri, ptutui seang we prading mccebu kari.
The Bible Society in Taiwan, 2020
© 台灣聖經公會版權所有，2020