Kari Rdrudan 28
28
1Ani uka seediq smdurak ka seediq naqah we qduriq duri.
Mntena rkelic rudu pahung na ka seediq msderux noda.
2Dxeral we ado niqan qnquwan, mppriyux riyung ka qbsuran paru.
Ado seediq niqan gnkela ma seediq mkela mita we, mpqbsiyaq ka qnlhangan.
3Tmraqil seediq qrinuc bale ka seediq qrinuc,
mntena ba wada sksikan bgihur paru, ini rangi uqun.
4Malix gaya we, tmdahu seediq naqah.
Muyu gaya we, mtgdiyal seediq naqah.
5Ini kela msderux noda ka seediq naqah.
Wano migin Utux Tmninun ka mkela bale.
6Msderux noda na ka seediq qrinuc we,
mgkala seediq niqan pila meepah ooda mridil.
7Muyu tnugesa we, kiya ka laqi niqan gnkela.
Mtheyaq msnekan we, mpqsiqa tama na.
8Eegu gnrihan ka sprana daha dnoi we,
kiya ka gisu gmaalu gmutu pila seediq mqrinuc bale.
9Mubung birac na ini qbahang tnugesa we,
dnurun na ge maha trqilun uri.
10Tmraki seediq msderux meepah naqah we, maha tuting ckceka beling na nanak.
Wano seediq mttuku bale we maha mangal qnbleqan.
11Niqan ku knkela mesa nanak ka seediq niqan pila,
seediq mqrinuc ma niqan knkela we klaun daha mita ka heya.
12Wada baro ka seediq msderux, niqan paru knledax.
Mtutuy ka seediq naqah de, mgleing ka seediq.
13Mgleing qnquwan na nanak we uxe mpkmalu noda.
Pgkela ma malix qnquwan we, maha mangal gnaalu.
14Peeniq kniicu klaali we, niqan mbleyaq ka seediq nii.
Mkere ka lhebun we, maha mskrebu ckceka mqraqil.
15Qbsuran paru naqah we miriq seediq mqrinuc.
Mntena rkelic rudu tmedux paru, mntena sume migin uqun.
16Qbsuran paru uka tunux we meepah egu ba pnkdira ooda.
Ini angal pila uxe nangal malu noda we, maha bsiyaq ka kndesan na.
17Mapa qnquwan noda psdara seediq we, maha qduriq mremux betaq nniqan mnhuqil.
Uka seediq mdayo heya!
18Msderux noda we, maha mangal dnoi baga,
mridil noda we, maha asi ktakur.
19Qmeepah qnpahan na nanak we, maha mangal kntengi ba uqun.
Migin skbrhuwan we, kiya ka qrinuc mtakur.
20Seediq ini kmmhemuc we maha mangal egu bnleyaq,
kmsaya bale prana pila we, maha pkdraun.
21Uxe malu ka qmita ta dqeras seediq,
kiya we niqan ka seediq ado 1 ba pang wada qnuuqu moda.
22Mkprana nhari pila ka seediq kmraguh pila,
kiya we ini na klai meyah heya ka mpqrinuc.
23Mseru seediq we, maha qrasun seediq bobo da,
mpgkala hbaro seediq ka dmoi hema kmraki seediq.
24Gmeeluk tama bubu na de rmengo: “Uxe qnquwan noda ka nii”,
so seediq nii we mntena seediq mpkuuka.
25Sqquru bale ckceka lhebun we, ptutuy mtgdiyal quwaq.
Smtama Utux Tmninun we, maha mangal msngari bale.
26Malu ku ka yaku mesa nanak we, kiya ka seediq mngataq.
Spooda na knkela meepah we, maha dooyun baga.
27Mege bale seediq qrinuc we, uxe mpksetuq dnoi.
Mqemi doriq ini qita we, maha mangal egu sniyus.
28Mtutuy ka seediq naqah we, mgleing ka seediq.
Wada uka ka seediq naqah de, maha mrana ka seediq msderux noda.
The Bible Society in Taiwan, 2020
© 台灣聖經公會版權所有，2020