Kari Rdrudan 26
26
1Ini pndungus mangal knledax ka seediq mngataq,
mntena smhuda rbagan, qmuyux qmburung.
2Ini kmmhemuc meyah ka sniyus,
mntena wada moda hiya ka piilo, mspaux skiya moda hiya ka qatan.
3Sebuc dmay ka ssebuc, bruhu dapa roba ka pqbuwan snuyuk quwaq,
psramal bukuy seediq mngataq ka hukuc pkdira.
4Iya pdai kari seediq mngataq cmiyuk kari mngataq ka heya,
maha su mntena heya da.
5Pdai kari seediq mngataq cmiyuk kari mngataq heya,
maha so niqan knkela ka heya nanak.
6Spooda su baga seediq mngataq paadis patis,
mntena su matak daha papak, mimah mqraqil.
7Meniq ckceka quwaq seediq mngataq ka knkela we,
mntena papak mrikic sduduy hiya uka brihan.
8Mege knledax seediq mngataq we,
mntena mekuy btunux bobo halung ccebu.
9Meniq ckceka quwaq seediq mngataq ka knkela we,
mntena metaq baga seediq bsukan ka pako.
10Lmawa seediq mngataq, mlawa seediq tnooda we,
mntena pqluqah ani ima ka seediq mcebu budi.
11Msnpusal moda noda mngataq ka seediq mngataq,
mntena huling kbberih mekan pnbrihan na.
12Qmnita su ka seediq so niqan ku ba knkela mesa ho?
Nuuqu niqan sntangan heya ka seediq mngataq.
13Rmengo ka seediq mbserux: “Niqan naqah ba rkelic rudu ka elu,
niqan rkelic rudu paru bale beyax ka ckceka elu.”
14Meniq qlapo ka seediq mbserux we,
mntena rhengun ga mspgeriq bobo plawe neluk.
15Seediq mbserux we reesun na ckceka ppsaun ka baga na,
ani posa ckceka quwaq na we skuuwic na.
16Mita heya nanak ka doriq seediq mbserux we,
mgkala knkela na 7 seediq mkela ba cmiyuk.
17Moda su hiya tuumal pkeekan kari uka pnugluban hiya we,
mntena seediq blebil birac huling.
18-19Mberiq siyo ka seediq, kiya de rmengo,
“Gisu ku rmeno nanak.”
Mntena seediq mkuni qmada puniq ma, mgcebu budi mhungul pphuqil seediq.
20Uka qhuni ka puniq we mpehing,
uka ka psmalu kari we, mtbale ka mkeekan kari.
21Ptutuy tgdiyal ka seediq smkuxul tgdiyal kari,
mntena psaun bagah dungal ka dtahuc, mntena psaun qhuni ka puniq.
22Mntena uqun malu ba ka kari seediq mmhemuc smalu kari,
asi osa truma bale nbuyas seediq.
23Quwaq mtilux, lhebun naqah we,
mntena ging naqah splabu qyqeya.
24Pais we spooda na quwaq na mgleing,
ckceka lhebun na we lmeing mpkraki.
25Dmoi cheya ba kari ka heya we, iya bale snhii heya ka isu,
ado ckceka lhebun na we niqan 7 ooda so trqilun.
26Ani dmoi mpkraki lmeing seang daha,
maha truura ckceka pssliyan hiya ka qnnaqah na.
27Kmari beling we, maha skrebu ckceka hiya ka heya nanak.
Ptdoruy btunux we, maha mepux heyi na nanak.
28Hema mberiq we tmraqil seediq pnluqah na.
Quwaq mpkraki we smeeliq ooda seediq.
The Bible Society in Taiwan, 2020
© 台灣聖經公會版權所有，2020