Kari Rdrudan 22
22
1Hmrinas egu dnoi ka malu ngayan,
hmrinas king ma ging ka paru huwe.
2Msterung ka seediq niqan pila ma seediq qrinuc,
snmalu Utux Tmninun kana ka dheya.
3Mita mqraqil ka seediq mkela oda de mgleing.
Mosa mangal mbqerus ka seediq mngataq.
4Peeniq ka pslebu lhebun miicu Utux Tmninun,
kiya de maangal dnoi, knledax, knuudus ka cniyuk na.
5Niqan pako ma qapi ka elu seediq mridil,
qmlahang knuudus na we, maha qduriq.
6Tgsai mpkeso elu ddaun ka lqlaqi,
ani betaq rudan uxe mpkridil.
7Qmlahang seediq qrinuc ka seediq niqan pila,
tnqliyan seediq na seediq pknbarux ka seediq knbarux.
8Maha qmburung pnqrqilan ka rmehak rehak ini ksderux noda,
maha sliqun ka hukuc seang na.
9Mnughuwe doriq na we maha mangal qnbleyaq,
ado saun na maasu seediq mqrinuc ka uqun na.
10Lwaqi ka seediq psparu, kiya de mpkuuka ka mtgdiyal,
maha mtbale ka mkseang ma qnsiqa uri.
11Smkuxul mrtaso lhebun, niqan huwe ka quwaq,
maha smdangi heya ka qbsuran paru.
12Qmlahang gnkela ka doriq Utux Tmninun,
kiya de smeeliq kari seediq mptraki.
13Rmengo ka seediq mbserux: “Niqan rkelic rudu ka nganguc,
maha ku na phqilun meniq ku ckceka elu alang.”
14Beling paru ka quwaq mqedil uxe gnklaan,
trqilan Utux Tmninun we, maha mtuting ckceka hiya.
15Qmerac lhebun laqi ka mngataq,
dmoi hukuc mseru de mpqduriq theya ba dhenu.
16Tmsiiyax seediq mqraqil we ado niqan ngngalun na,
mege lnabu seediq niqan pila we, maha uka bale.
30 Klegan Kari Rudan
17Peeyah birac su mbahang kari seediq niqan knkela,
bleyaq lmngelung ka gnkela mu.
18Nasi su psai lhebun,
psramal ba ka quwaq uri we, kiya ka malu bale.
19Gisu ku tmgesa bale isu saya,
so su maha smtama Utux Tmninun.
20Knmalu bale ka niqan ba ooda ma gnkela,
ini mu pdesi isu peni?
21So su maha mkela ba bale elu kari,
so mu cyukun ka seediq snkagul isu ka bale ba noda.
22Iya kesa mqrinuc ka seediq de gmeeluk su heya,
iya eniq rhengun alang paru tmsiiyax seediq mqraqil uri.
23Ado mpririh heya mprengo ka Utux Tmninun,
maha gmeeluk knuudus gneeluk na uri.
24Iya sdangi seediq smkuxul mseang,
iya theyaq seediq kmmhemuc paru seang uri.
25Iya bale puyu ndaan daha,
kiya de mpremux su ckceka tlenga ka isu.
26Iya tapaq baga mpririh seediq,
iya osa pririh knbrexan daha ka isu.
27Nasi uka bale pprihan su de,
ma su pglekan seediq ka qlapo tnqiyan su peni?
28Ayus pnhyegan ddrudan we,
iya bale hdili icil.
29Qmnita su ka seediq mdrumuc riyung meepah ho?
Mpheyu berah qbsuran paru ka heya,
uxe meniq berah seediq uka noda.
The Bible Society in Taiwan, 2020
© 台灣聖經公會版權所有，2020