Ester 9
9
Phuqil Pais Daha ka Seediq Yudaya
1Idas 12, kiya ka ali 13 idas nuAdar, ali pndesan patis qbsuran paru ma gaya pnugkela. Dpais seediq Yudaya we, kmphuqil dheya. Kiya de wada ini baka meruc ka dseediq tmraqil dheya. 2Psseli knkingal lualang qlhangan Axasreros qbsuran paru ka seediq Yudaya ma, mphuqil kana kmphuqil dheya. Uka ani ima ka dehuk mheyu berah daha, ado miicu dheya ka kana seediq lualang. 3Kana qbsuran mdudul, qbsuran mpqlahang, qbsuran dxeral nyusan ma qbsuran mdayo qbsuran paru we dmayo Yudaya kana. Ado miicu Mardakay kana ka dheya. 4Kiya de mrana knpruwan na sapah qbsuran paru hiya ka Mardakay ma, mkgarang kana dxeral nyusan ka ngayan na. Krinah mrana qbsranan na ka Mardakay nii. 5Seediq Yudaya we, dmoi hlmadac smipaq pais daha ma, phuqil dheya. Muyu lnglungan daha nanak smterung dseediq tmraqil dheya. 6Pnhuqil 5'00 heyi seediq meniq alang Susan ka seediq Yudaya. 7Pnhuqil daha we, Parsandata, Dalpon, Aspata, 8Porata, Adalya, Aridata, 9Parmasta, Arisay, Ariday ma Wayejata. 1010 heyi nii we lqlaqi laqi Hamdata, laqi Haman kana. Ini geeluk qyqeya daha ka seediq Yudaya.
11Ali ciida, srengo daha berah qbsuran paru ka dseediq wada phqilun alang Susan hiya. 12Rmengo Ester mqedil qbsuran paru ka qbsuran paru: “5'00 heyi ma 10 heyi laqi Haman ka wada phqilun seediq Yudaya alang Susan hiya. Duma na hiya ka dxeral nyusan qlhangan mu we, ini klai ga hmuwa mesa. Maanu ka pgsaun su, ida ku mbege sunan. Maanu dungal ka stangan su we, ida misu cyukun.” 13Cmiyuk ka Ester: “Nasi malu mesa su, braho su srwai ka seediq Yudaya gaga alang Susan hiya. Kusun uri we pntnai so pnosa su kari ali saya, psdui bobo eruc qhuni hiya ka 10 heyi laqi Haman.” 14Smruwa mooda nii ka qbsuran paru. Dehuk kana alang Susan ka kari pnosa nii. Kiya de wada psduyan bobo eruc qhuni ka 10 bqerus lqlaqi Haman. 1514 ali idas Adar ciida, psseli dungal ka seediq Yudaya ma, phuqil 3'00 heyi Susan hiya. Kiya we ini geeluk qyqeya daha ka dheya.
16-17Ali 13 idas Adar, psseli mpqlahang knuudus daha, mplatac pais daha ma, mpbleyaq ka dheya ka seediq Yudaya gaga dxeral nyusan qlhangan qbsuran paru. Pnhuqil 7 mang 50'00 heyi seediq tnraqil dheya. Kiya we ini geeluk qyqeya daha ka dheya. 14 ali de, msange ka dheya. Ali ngalan daha psramal uqun qqrasan ka ali nii. 18Kiya de seediq Yudaya meniq Susan we msseli ka 13, 14 ali. 15 ali ka msange ma ngalan daha ali uqan mqaras. 19Maanu so kiya de seediq Yudaya gaga meniq biciq alang uka qnalang alang we, 14 ali idas Adar ka ngalan daha ali malu ma uqan mqaras ma, ppbege bbiqan daha uri.
Smseman Puru
20Noda nii we gaga spatis Mardakay ma, spaadis na kana seediq Yudaya, gaga meniq smdaling ma theya kana dxeral nyusan qlhangan Axasreros qbsuran paru. 21Kiya de rmengo dheya, 14 ma 15 ali idas Adar knkingal knkawas we, asi ka daan ka smseman nii. 222 ali nii we pnkuuka ta pneeyah pais ka seediq Yudaya. Wada pryuxun mqaras ka mqraqil, pryuxun ta mqaras ka naqah kuxul. Meniq 2 ali nii we psramal uqun qqrasan, pbbege bnege ma, dmayo seediq qrinuc.
23Kiya de muyu pnatis Mardakay ka seediq Yudaya. Pyugun daha gaya mooda ka ndaan daha tgberah. 24Ado Haman laqi Hamdata seediq Agag pais kana seediq Yudaya ge, smneung pkuuka seediq Yehudah. Mnoda blebil Puru, kiya ka kesun Puru blebil qreti, nii we pphuqil daha kana seediq Yudaya. 25Ado qnnaqah lnglungan daha nii we, betaq berah qbsuran paru, kiya de posa kari ka qbsuran paru kmphuqil seediq Yudaya ka Haman, qnnaqah oda nii ge wada tunux na nanak ka naqah ooda nii. Heya ma lqlaqi na we, wada psddoyun bobo eruc qhuni. 26Kiya ka muyu Puru ngayan nii, kesun daha ali Puru ka 2 ali nii. Ado kana kari pnatis patis hiya ma, kana qnita ma ndaan daha nii. 27Kiya de ptgaya dheya nanak ma lqlaqi ltlutuc daha, dseediq tnuumal Yudaya we, asi ka muyu pnatis nii, moda smseman 2 ali betaq ani knuwan uxe laxun. 28Ani inu ka nyusan dxeral ma alang, knkingal knxalan, knkingal sapah Yudaya we, asi ka moda lmngelung smseman 2 ali nii. So uxe laxun ani betaq knuwan ka ali Puru meniq seediq Yudaya. Meniq lqlaqi mslutuc daha uri we, uxe daha chngiun betaq ani knuwan.
29Ester mqedil qbsuran paru ka laqi Abihayil ma Mardakay seediq Yudaya ka dmoi beyax matis tg2 patis ma, pheyu ali Puru nii. 30Patis nii we spatis daha kana quri seediq Yudaya gaga meniq 127 nyusan dxeral qlhangan Axasreros qbsuran paru. Nii we smbleyaq, kksbale dheya. 31Mpdudul dheya mpuyu pntgaya Mardakay seediq Yudaya ma, Ester mqedil qbsuran paru moda smseman ali nii. Dungal we mpuyu gaya seediq Yudaya ma lqlaqi mslutuc daha, mooda ini ekan ma tsdamac dmurun ka dheya. 32Ptgaya pnheyu ali Puru ka Ester. Noda nii we gaga spatis patis uri.
The Bible Society in Taiwan, 2020
© 台灣聖經公會版權所有，2020