Gmarang Kari 2
2
1Rmengo ka lhebun mu: “Aguh! Mpooda ku mqaras pseung sunan, so mpqaras sunan!” Qtai, skbrhuwan ka nii uri. 2Quri so thhulis, mprengo ku: “Pnsrabang ka nii.” Quri so qqrasan, “Maanu ririh na ka nii ho?” 3Lhebun mu we dmoi knkela dmudul kenan. Lmngelung ku, huwa mu kesun dmoi sino pqaras ka heyi, huwa mu kesun qmerac ka mngataq, betaq mu klaun mita kana kndesan dseediq bobo dxeral we, maanu ka kesun malu ba ooda. 4Mprading ku smeli qhuni ma mpsmalu ku sapah, mhuma ku lipas. 5Smalu ku nganguc ma qnpahan, phmaun mu lmlamu pnhgalang. 6Kmari ku pslangu qsiya, ghuriq mu qhuni hani pnhuma. 7Bnaruy ku hbaro ba tnqliyan rseno ma mqedil, niqan ka mntuting sapah mu uri. Dungal we niqan ka dapa ma miric uri we egu ba, mgkala seediq meniq ku Yerusalem. 8Pssliun mu ka king ma ging, psliun mu ka dnoi dqbsuran paru knkingal alang. Hbaro ba ka mqedil ma rseno mpuuyas ma qyqeya kuxul seediq, dungal we mrana kingal ma kingal ka mmqedil.
9So kiya de, mgkala ku klaali ka yaku, mgkala kana seediq mneniq ku Yerusalem hiya. Knkela mu we ga meniq heyi dungal. 10Kana pnesa doriq mu we, ini mu hteri. Kana kuxul lhebun mu we, daun mu kana. Ado mpeeyah ku kana bqerus mu mpqaras lhebun mu, nii we ririh nangal mu pneeyah bqerus mu. 11Bobo na de, psbrinah ku kana ndaan baga mu, kana qneepah. Qtai! Skbrhuwan kana, mntena qmerac bgihur kana. Bobo thdagun hido we ani maanu uka brihun.
12Sbrnahun mu lmngelung ka knkela, pnsrabang ma mngataq. Mhuwa ka dseediq meeyah bobo qbsuran paru ho? Uxe wano moda ndaan tgberah peni! 13Kiya de klaun mu mgkala mngataq ka knkela, mntena mgkala mkuung ka knledax. 14Doriq seediq niqan knkela we lmedax. Seediq mngataq we gaga mkkesa mnkuung. Kiya de we, klaun mu mntena ka streengun daha. 15Rmengo ka lhebun mu: “Sntrengan seediq mngataq we, daun mu uri. So kiya de maanu ka asi ku ka niqan knkela di peni?” Rmengo ka lhebun mu: “Skbrhuwan ka nii uri.” 16Mntena ka seediq niqan knkela ma mngataq, uxe pqbsiyaq lnglungun seediq. Ado chngiun kana ka dheya bobo na. Ani ba rabang! Seediq niqan knkela ma mngataq we mntena mphuqil kana. 17Maanu so kiya de tmraqil ku knuudus, ado kana noda toma hido we, ngalun mu tsdmatan, kana nii we skbrhuwan, nii qmerac bgihur kana.
18Tmraqil ku kana bnqresan, kiya ka bnqresan mu thdagan mu toma hido. Ado nangal mu we asi mu ka hiti seediq meeyah bukuy mu. 19Seediq kiya we ya niqan knkela ma mngataq we, ima ka mpkela? Heya ka betaq qmlahang bnqresan mu toma hido. Skbrhuwan ka nii uri. 20Sbrnahun mu lmngelung ka kana qneepah mu toma thido de, asi ktletu ka lhebun mu. 21Ado dmnoi knkela, gnkela ma, knkela na smmalu mbqerus qmeepah, kana nangal na we, asi na ka shiti seediq uxe mnoda bnqerus ma, ngalun na pusu dnoi. Skbrhuwan ka nii uri ma, paru mgqiya. 22Kana bnqresan knslhebun, kiya ka bnqresan na toma thido we, maanu ka ngngalun daha? 23Heya we tnsdamac klaali, betaq knslhebun ka bnqresan na ma, betaq ani keeman uka ka sngayan na. Skbrhuwan ka nii uri.
24So kiya de mekan ma mimah ka seediq, dungal we tbleyaq peeyah bnqresan na de, uxe tbleyaq kesun di peni? Qntaan mu we, pneeyah baga Utux Baro uri ka nii. 25Quri so mekan, tbleyaq we, ima ka mpgkala kenan ho? 26Ima ka kuxul Utux Baro we, kiya ka sbege na knkela, gnkela ma qnaras. Wano seediq naqah we, pqrqilun na ka heya ma, sbege na seediq kuxul Utux Baro ka sneku na ma, gnutu na uri. Skbrhuwan ka nii uri, mntena qmerac bgihur uri.
The Bible Society in Taiwan, 2020
© 台灣聖經公會版權所有，2020