IJE̍MĒEHI 2
2
Āchɛ̄ɛchɛ wa̍a̍ jɔ̄ɔ̄jɛ̄
1Aɛ̍nɛ̍ yī u, ala̍ - āchɛ ode ɔtū che Ādādā yī alɔ Iji̍sɔ̄ɔsi Ikra̍yisi nīi - Ādādā yī rīgā ma̍ nɛ. Bū la ɛbɛ ɔla̍ā, ɔ̄chɔ̄chɛ ge̍ e̍e nāa ɔ̄chɛ ɔha̍ hɔ̄ɔ̄hɔ̄ hi̍ ɔ̄chɛ ɔha̍ ni̍. 2Ɔlwɔdu ɔha̍ ge̍ tū igo̍olu la abɔ̄, tū ɛjā ɔnɛ̄ɛhɛhi la iyē, chɛ̄ wā abɔ̍ɔ la ogrēeyī yī ala̍, nīi olyeklo̍ ɔha̍ ge̍ chī tū a̍chiyɔ̄pa̍, chɛ̄ wā abɔ̍ɔ titi ma̍ bɛ̍ɛ? 3O̍ ge̍ re̍ka ala̍ de otūlichō de ɔ̄chɛ nīi tū ɔjā ɔnɛ̄ɛhɛhi ma̍, ka de ɔ̍ hīka, “Hyāhɔ̄ ma̍ la ɔchi̍ ɔnɛ̄ɛhɛhi nūma̍ chɔ̍ɔ” ma̍ bɛ̍ɛ? O̍ ge̍ re̍ka ala̍ da onīi - olyeklo̍ ma̍ hīka, “Yararɛ gɛ, kɛ̄ɛ hyāhɔ̄ ma̍ la ajɛ la apli̍kpo̍ yī u gɛ” ma̍ bɛ̍ɛ? 4Ala̍ ge̍ ya̍ i̍ngɔ̍ɔ, o̍ re̍ka ala̍ yɛ ē de iyī ala̍ ē krīibi ka āchɛ ɛha̍ ɛ̍lɛ hwɔhi hi̍ āchɛ ɛha̍. Bū la ɛbɛ ɔla̍ā, o̍ re̍ka ala̍ yɛ ē hlɛ̍ɛ̄pɔ̄ ɔdwɔ̄bi̍ ɔla̍ā bū la ɛri̍ya̍ ɔdwɔ̄bi̍ yī ūkpɔ̄tū yī ala̍ ɛlɛjā.
5Aɛ̍nɛ̍ yī u, ala̍ ma̍ gɛ ko̍ō! Ɔwɔ hu alyeklo̍ yī yɛchɛ nūma̍ nīi e̍ ge̍ē de ē gbwɔdu la ɔtū ode che ɔ̍ ochōche. O̍ ya̍ nīi e̍ ge̍ē lɛ ɔpiyɛ yī Ɔchwɔ̄lɛ̍ Oro̍ōre̍ yī Ɔwɔ nīi o̍ choko̍o ge̍ē de ē de āchɛ nīi ywɔ̍ɔnyɛ yī nū ma̍. 6O̍ lɔ̄lɛ i̍ngɔ̍ɔ nyaa ma̍, ɔ̄chɛ ge̍ - olyeklo̍ mɛ̍, ala̍ i̍ ē chī chɛ̄ de otūlichō de ɔ̍ ē gɛ ni̍. Ānyɛ ē ya̍ ala̍ ichi̍ ji̍gījigī ē pi ala̍ kpēlēkpēlē ge̍ē de alihiyo ma̍? Je̍ka aa̍ alwɔdu ɛla̍ā nɛ? 7Je̍ka aa̍ kɛlā abi̍ ē ku̍ riyī ɔnɛ̄ɛhɛhi ɔla̍ā nīi Ɔwɔ de de ala̍ ma̍ a̍nɛ?
8Ala̍ ge̍ gbɔ̄ɔkɔ yī lihɔ yī Ɔchwɔ̄lɛ̍ Oro̍ōre̍ yī Ɔwɔ nīi tū la Īpū yī Ɔwɔ ma̍, o̍ ge̍ē re̍ka ala̍ yɛ abɔ̍ɔ ē yɛ̍ɛ̄lā nīi grāa kpakpa ma̍. Lihɔ ɔla̍ā re̍ka, “Ywɔ̍ɔnyɛ yī ɔ̍nyīmɔ̄chɛ yī wɔ bāa awɔ ɔlɔjā ma̍.” 9Ala̍ ge̍ chī yɛ ē yɛ̍ɛ̄lā tāa ɔ̄chɛ ɔha̍ hɔ̄ɔ̄hɔ̄ hi̍ ɔ̄chɛ ɔha̍, ɔ̍lɔma̍ ala̍ gblɛfiyɛ yī lɛlā ɔdwɔ̄bi̍ mɛ̍. Lihɔ ɔla̍ā de lɛpɔ̄ ku̍ ala̍ bāa āchɛ ɔbīya lihɔ ma̍. 10Ɔ̄chɛ nīi ge̍ de ɔkɔlɛ̄lā ūkpo̍he nīi Lihɔ yī Imo̍sīisi ka ma̍ bīya, o̍ re̍ka ɔlɔjā bīya Lihɔ ɔla̍ā wa̍a̍. 11Wu̍chē oji̍ nɛ, Ɔwɔ nīi trīihɔ hīka,
“Ala̍ e̍e la̍ ɔ̍bɔ̍ɔ̄nyā ni̍” ma̍,
ana̍nu̍ gba̍a trīihɔ hīka,
“Ala̍ e̍e ngmo̍ ɔ̄chɛ ni̍” a̍nɛ.
A i̍ ge̍ la̍ ɔ̍bɔ̍ɔ̄nyā ni̍ nīi a ge̍ ngmo̍ ɔ̄chɛ mɛ̍, o̍ re̍ka awɔ - ɔ̄chɛ ɔbīya lihɔ bɛ̍ɛ̄nɛ̄ nɛ. 12Ala̍ ā kɛlā nīi ala̍ ge̍ de yɔ̍ɔ̄ya̍ bāa āchɛ nīi Ɔwɔ ge̍ē hɛ̍ wā lɛpɔ̄ bū la lihɔ ɔla̍ā nīi ē de āchɛ ē hīya lɛfiyɛ ke̍e̍ ma̍. 13Wu̍chē oji̍ nɛ, yɛ̄grāa nīi Ɔwɔ ge̍ē hlɛ̍ɛ̄pɔ̄ ma̍, ɔ̄chɛ nīi i̍ ē mlɛ̍ha̍ ē de āchɛ ni̍ ma̍, Ɔwɔ i̍ ē ge̍ē mlɛ̍ha̍ yī anu̍ ni̍. Lɛha̍ ɔmɔ̍ɔ̄ma̍ wu̍ kla̍ lɛpɔ̄ ɔhɔ̍ɔ̄hɛ̍.
Ɔtū ode chōche ba̍la lɛlā ɔyɔ̍ɔ̄ya̍
14Aɛ̍nɛ̍ yī u! Ɔ̄chɛ ge̍ ka anɔ̍lɔ de ɔtū che Ɔwɔ nīi abɔ̄lɛ̄lā ɔyɔ̍ɔ̄ya̍ yī nū i̍ ge̍ chī chabɔ̄ ni̍ ma̍ bɛ̍ɛ? Ɔnɛ̄ɛhɛhi kɔ̍ɔ̄ abɔ̍ɔ la ɔla̍ā? Ɔtū ode chōche ɔla̍ā ke̍e̍ ma̍ ge̍ē hɛ̍ ɔ̄ ta̍ ē mɛ? 15O̍ ge̍ re̍ka aɛ̍nɛ̍ yī ala̍ ɛha̍ ge̍ wā dikpo̍ba̍ ala̍ nīi e̍ i̍ ge̍ lɛ ɔjā otūlohi̍ kɛ̄ɛ ojōre̍ ge̍ē re̍ ni̍ ma̍ bɛ̍ɛ? 16O̍ ge̍ re̍ka ala̍ ka de wa̍ ji hīka,
“Ala̍ ā yɛ du̍mɔ̍ du̍mɔ̍ gɛ ko̍ō!
Ibi̍īyē ge̍ gbo ala̍ dɔ̍dɔ̍! Ala̍ ā re̍ ojōre̍ yɛ̍yɛ̍ bɛ̍ɛ̄nɛ̄!”
Ma̍ ɔnɛ̄ɛhɛhi kɔ̍ɔ̄ abɔ̍ɔ lipu̍ yī lɛlā ɔla̍ā nɛ? I̍ ɔjā nīi ku wa̍ lɛha̍ nīi e̍ ge̍ē re̍ ē hɔ̄leyī ma̍ nīi ala̍ chī dōde de wa̍ a̍ni̍. 17I̍ngi̍ngɔ̍ɔ nīi lɛlā yī ɔtū ode chōche lɛ ke̍e̍ a̍nɛ. A ge̍ de ɔtū che Ɔwɔ nīi abɔ̄lɛ̄lā ɔnɛ̄ɛhɛhi ɔyɔ̍ɔ̄ya̍ ɔha̍lɔha̍ i̍ ge̍ hɔ̄ ge̍ē chabɔ̄ yī ɔtū ode chōche ɔla̍ā ni̍, ɔ̍lɔma̍ o̍ re̍ka o̍ ko̍ōku̍.
18Lɛlā nīi ngma̍ la ɔda ita yī ɔ̄chɛ oli̍ngɔ̍ɔ ma̍ hɔ̄ ma̍ a̍nɛ:
“A ka aɔ̍lɔ ma̍ aɔ̍lɔ de ɔtū che Ɔwɔ;
amɔ̍lɔ - ɔlabɔ̄lɛ̄lā ɔnɛ̄ɛhɛhi ɔyɔ̍ɔ̄ya̍ nɛ?
Chabɔ̄ yī ɔtū ode chōche yī wɔ ɔ̍lɔma̍
nīi i̍ tū abɔ̄lɛ̄lā ɔnɛ̄ɛhɛhi ɔyɔ̍ɔ̄ya̍ ni̍ ma̍ hu̍ u.
Ami ma̍, n ge̍ē chabɔ̄ bū la abɔ̄lɛ̄lā ɔnɛ̄ɛhɛhi ɔyɔ̍ɔ̄ya̍ yī u
hīka n de ɔtū che Ɔwɔ.”
19Je̍ka aa̍ a chɛ̄ hīka Ɔwɔ ɔ̍lɔ lɛ ūkpo̍he kpo̍kpo̍? A ya̍ hwɔhi! Yapri̍ija ɔdwɔ̄bi̍ titi chɛ̄ i̍ngi̍ngɔ̍ɔ hi̍bi̍īyē ejē bāa ɔkpa̍kpa̍kpa̍ ma̍. 20Oli̍bobo ɔ̄chɛ! A chikpo̍ ge̍ē jo̍ōkū hīka ɔtū ode chōche nīi abɔ̄lɛ̄lā ɔnɛ̄ɛhɛhi ɔyɔ̍ɔ̄ya̍ i̍ tū la anu̍ ni̍ ma̍ - a̍ji yī lɛlā nɛ? 21Kana̍ nīi A̍brahāam a̍dɔ̄kū yī alɔ de lɛ kpakpa ba̍la Ɔwɔ ma̍? Bū la abɔ̄lɛ̄lā ɔnɛ̄ɛhɛhi ɔyɔ̍ɔ̄ya̍ yī nū nɛ. A̍brahāam de A̍yi̍sāaki ɔyi̍ yī nū ɔnɔ̄ngrɔ̄ɔ de de Ɔwɔ yī ɔpɔ̄pā. 22A ma̍ lɔkɔ nīi ɔtū ode chōche yī nū ba̍la abɔ̄lɛ̄lā ɔnɛ̄ɛhɛhi ɔyɔ̍ɔ̄ya̍ yī nū ngmo̍tu̍chɛ̄ la u̍ku̍rɔ̍ mɛ̍? Bū la ɛbɛ ɔla̍ā, ɔtū ode chōche yī nū de hwɔhi hwɔhi gɔ̄grāa bū la abɔ̄lɛ̄lā ɔnɛ̄ɛhɛhi ɔyɔ̍ɔ̄ya̍ yī nū. 23Bū la ɔla̍ā, lɛlā nīi tū la Īpū yī Ɔwɔ ma̍ de pīya ichɛ̄ɛhi. O̍ hīka A̍brahāam ɔ̍lɔ de ɔtū che Ɔwɔ; bū la ɔtū ode chōche yī ɔ̍lɔ, ɔ̍lɔ de lɛ kpakpa ba̍la Ɔwɔ. Ɔla̍ā - ohu̍ nīi A̍brahāam de re̍ka
“ɔya yī Ɔwɔ” a̍nɛ.
24Je̍ka aa̍ ala̍ ma̍ mɛ̍ hīka, obū la abɔ̄lɛ̄lā ɔnɛ̄ɛhɛhi ɔyɔ̍ɔ̄ya̍ nīi ɔ̄chɛ de ē lɛ kpakpa ba̍la Ɔwɔ a̍nɛ; i̍ ɔtū ode chōche ka̍ta̍ ni̍.
25I̍ngi̍ngɔ̍ɔ nīi lɛlā yī akpara ɔla̍ā nīi re̍ka Ire̍hāabu ma̍ lɛ a̍nɛ. O̍ de lɛ kpakpa ba̍la Ɔwɔ ke̍e̍ bū la abɔ̄lɛ̄lā ɔnɛ̄ɛhɛhi nīi o̍ ya̍ ma̍. Wu̍chē oji̍ nɛ, o̍ bī āchɛ ɛla̍ā nīi Ali̍sɛ̄rɛli de tɛ̄rɔ̄ gāa ma̍ ga wɔlɛ̍ yī nū, tū wā wɔbɔ̄ nīi e̍ gwɛ̍ɛnya ga la oe̍ ɔha̍ pīya.
26Uhu i̍ ge̍ tū abɔ̍ɔ lipu̍ yī ibi̍īyē ni̍, o̍ re̍ka ibi̍īyē ɔla̍ā ko̍ōku̍. Gala ɔgɔgu ɔla̍ā, abɔ̄lɛ̄lā ɔnɛ̄ɛhɛhi ɔyɔ̍ɔ̄ya̍ i̍ ge̍ hɔ̄ la ɔtū ode chōche ni̍, o̍ re̍ka ɔtū ode chōche ji ɔla̍ā ko̍ōku̍.
© 2020 Bible Society of Nigeria (second edition)