MNS 9
9
Kiɛ̃mala ǹ zɔ́n lɛawaa
1 #
BBN 12.1-13
Izirayeli minin lɛn soo a bɔ Ezipti gána-n a lɛ̀ paabaa ǹ wɔ, lɛ̀ a mui bibinaa li, Dɛnaa Lawa boo da Muizu ni, Sinayii diə gole ne, á pɛ: 2«Lɛawaa mɛn nə n bɔ á n koa, Izirayeli minin lɛn nə *kiɛ̃mala ǹ zɔ́n kɛ zɛnaa bɛ li. 3Mui bibinaa kɛ lɛ a lɛawaa fulusiibaa ǹ wɔ pinaa nɛ, wasamiɛ̃n tutu, ǹ nə́ die kiɛ̃mala ǹ zɔ́n lɛ zɛnɛɛ. Ǹ die ǹ zɛnaa, a kɔnpɛ ka a landan laanka a zɛnaa ǹ gɔn nɛ.»
4Muizu tɔ́n pɛ Izirayeli minin lɛn manɛ, mà ǹ kiɛ̃mala ǹ zɔ́n lɛ zɛnaa. 5Ǹ nə́ zɔ́n lɛ zɛnaa, Sinayii diə gole ne, lɛ̀ a mui bibinaa a lɛawaa fulusiibaa ǹ wɔ pinaa, wasamiɛ̃n tutu. Dɛnaa Lawa goã á boo mɛn pɛ Muizu ni, Izirayeli minin nə́ bɛa sii zɛnaa ka te.
6Sɛnɛ, gɔn da min gere ganaa taman yii, *gɔ̀ goã min tɛnɛn ganaa, ǹ nə́ ǹ goã boe la ǹ nə́ kiɛ̃mala ǹ zɔ́n lɛ zɛnɛɛ bɛa pinaa lɛ-n wa. Bɛa minin lɛn nə́ tɔ́n woo Muizu laanka Aarɔn li a din pinaa lɛ nɛ, ǹ nə́ pɛ ǹ nɛ: 7«Gɔn da gere ganaa na á wɔsɛn gɔgɔrɛ kɔ. Lɛawaa mɛn nə n koa, wàa na á baa ǹ tá wɔsɛn kurii mà wɔ baran da wɔa Lawa gɔ ǹ màn kɔ Dɛnaa Lawa la, bɛa pinaa kɛ lɛ nɛ ka Izirayeli min tumaa bɛ́ lɔn wa?»
8Muizu tɔ́n pɛ ǹ nɛ: «Ka n yii da, yǎa masɛ doɛ̃ Dɛnaa Lawa bɛ́ re màn mɛn pii kaa wɔ paǹ li.»
9Dɛnaa Lawa boo da Muizu ni, á pɛ: 10– Boo da Izirayeli minin lɛn nɛ n pɛ: «Ka dinin bii, hinlaa kaa nɛnyaanan mɛnɛn bɛ́ die ka kio, bɛn bii, bɛ̀ gere min mɛn gɔgɔrɛ kɔ, hinlaa bɛ̀ min mɛn woo zii sɔsɔɔ nɛ, ǹ dɛnaa die a kiɛ̃mala ǹ zɔ́n lɛ zɛnaa Dɛnaa Lawa nɛ. 11Sɛnɛ, bɛa minin lɛn sɛn man die zɛnɛɛ lɛ̀ a mui paabaa ǹ wɔ a lɛawaa fulusiibaa ǹ wɔ pinaa, wasamiɛ̃n tutu. Ǹ die ǹ wúlu sère nɛ siĩ lɛ sɔ̃ kun ka yɔ bùbaã buuru laanka liɛ kɔɔsɛ nɛ. 12#BBN 12.46; Zaã 19.36 Ǹ baran màn kɔn koa baayɛlɛ wa, ǹ baran siĩ lɛ a wen yiyiɛ wa. N die ǹ kiɛ̃mala ǹ zɔ́n lɛ zɛnaa, a kɔnpɛ ka a zɛnaa ǹ gɔn nɛ ka te. 13Sɛnɛ, bɛ̀ min mɛn tá yoreene, hinlaa bɛ̀ min mɛn nə wo zii-n wa, yǎa ǹ dɛnaa nə n piã ka kiɛ̃mala ǹ zɔ́n lɛ a zɛnaa nɛ, ǹ bɛa dɛnaa lɛ bɔ ǹ bɔ ǹ dɔɔ̃nɔn bii. A giala, biikoo mɛn nə n bɔ á n koa, a da ka Dɛnaa Lawa gɔ ǹ màn nɛ, bɛa biikoo lɛ li wa. Ǹ dɛnaa tá re n toɛ̃ ka a sii baraa lɛ a mìi gɔ́ɔ̃ ǹ siin ni. 14Bɛ̀ min mɛn tá tii lɛa giã nɛ ǹ li, bɛ̀ ǹ dɛnaa tá kiɛ̃mala ǹ zɔ́n lɛ zɛnɛɛ Dɛnaa Lawa nɛ, a die a kɔ a zɛnaa ǹ landan laanka a zɛnaa ǹ gɔnɔn lɛ. Sii zɛnaa ǹ gɔn goon dinsɔɔ̃ n die goɛ̃ ka lon, ta tii-n hinlaa gána lɛ a min ni.»
15Ǹ bɛ́ ǹ nə́ kion sonbore lɛ doa ǹ mɛn pinaa, kɔn yɛ ka Lawa nɛ ǹ kion lɛ, tɛmaa bara nə́ n kuməə a ganaa. A saa wasamiɛ̃n ganaa, tɛmaa bara lɛ na á goã kion lɛ la ka tɛ bɛ́ lɔn, yǎa baayɛlɛ. 16A na á goã miɛ̃ baraabaraa. Tɛmaa bara lɛ na á goã n kumii kion lɛ ganaa, tèlò-n a na á goã ka tɛ bɛ́ lɔn. 17Bɛ̀ tɛmaa bara lɛ yoo kion lɛ lalan ǹ mɛn waáraa, Izirayeli minin lɛn dɔn man yui gɔrɔ ǹ nə ǹ zii tɔ wɔ. Bɛ̀ tɛmaa bara lɛ golee bǎã mɛn nɛ, ǹ dɔn man golee walan. 18Izirayeli minin lɛn man nə́ goã yui ǹ giã ǹ bǎã nɛ, á n kɔnpii ka Dɛnaa Lawa a da ǹ boo ne. Maǹ nə́ goã golee dɔn, á n kɔnpii ka Dɛnaa Lawa a da ǹ boo ne. Tɛmaa bara lɛ goã lɛawaa lɛ mɛn zɛnɛɛ kɔn yɛ ka Lawa nɛ ǹ kion lɛ la, Izirayeli minin lɛn man nə́ goã golee ǹ nə́ bɛa lɛawaa lɛ lɛ zɛnɛɛ ǹ giã ǹ bǎã nɛ. 19Bɛ̀ tɛmaa bara lɛ goã kion lɛ la, á belebɔ, Izirayeli minin lɛn man Dɛnaa Lawa bɔlɔ sii bɛa biikoo lɛ gɔ́ɔ̃ nɛ, ǹ nə́ ǹ ba yui wa. 20Ǹ tɛn nɛ, tɛmaa bara lɛ n goɛ̃ kion lɛ la, biikoo boɛɛn kooro. Izirayeli minin lɛn man nə́ goã golee á n kɔnpii ka Dɛnaa Lawa a da ǹ boo ne, maǹ nə́ goã yui á kɔnpii ka Dɛnaa Lawa a da ǹ boo ne. 21Bɛ̀ tɛmaa bara lɛ golee wasamiɛ̃nɛ, á woo baayɛlɛ yaa, bɛ̀ á yoo baayɛlɛ, Izirayeli minin lɛn dɔn man yui. Bɛ̀ tɛmaa bara lɛ golee á dɔ lɛawaa goon laanka tèlò goon, bɛ̀ á yoo bɛ kio, Izirayeli minin lɛn man yui. 22Bɛ̀ tɛmaa bara lɛ golee kion lɛ lalan, ta a n doe lɛawaa paa, mui goon hinlaa ta a n liɛ bɛ nɛ lɛ̀ goon, Izirayeli minin lɛn man goɛ̃ ǹ giã ǹ bǎã nɛ, ǹ nə́ ǹ ba yui wa. Bɛ̀ á yoo maǹ yui. 23Izirayeli minin lɛn man nə́ goã golee á n kɔnpii ka Dɛnaa Lawa a da ǹ boo ne, maǹ nə́ goã yui, á n kɔnpii ka Dɛnaa Lawa a da ǹ boo ne. Maǹ nə́ goã Dɛnaa Lawa a dí nyɛɛ, á n kɔnpii ka daraan kɛn nɛ Dɛnaa Lawa goã á ǹ kɔ Muizu la á ǹ kɔ ǹ la.
اکنون انتخاب شده:
MNS 9: SBPE2011
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
San Bible Protestant Edition © Bible Society of Burkina Faso, 2011.