MNS 5
5
Maǹ gɔ̀dɛnan bo
1Dɛnaa Lawa boo da Muizu ni á pɛ: 2«A pɛ Izirayeli minin lɛn manɛ, ǹ gɔ̀nɔn ki busu babaraadɛnaa din tumaa kaa para-a ǹ bɔ giã ǹ bǎã lɛ nɛ, ka min mɛn tumaa bɛ́ kii mu a da a din li ǹ busu ná a ganaa, hinlaa min mɛn tumaa bɛ́ gere *gɔ̀ da a ganaa. 3Giĩ ba la wa, lɔ ba la wa, ka ǹ kaa para-a, kaa giã ǹ bǎã lɛ kio, màn mɛn bɛ́ toɛ, masɛ bɛ́ giã-n Izirayeli minin mɛnɛn lɛn bii, ǹ baran bɛn giã ǹ bǎã lɛ gɔgɔrɛ kɔ wa.»
4Izirayeli minin lɛn nə́ tɔ́n zɛnaa miɛ̃. Ǹ nə́ bɛa dɛnan lɛn kaa para-a, ǹ nə́ ǹ bɔ giã ǹ bǎã lɛ nɛ. Maǹ nə́ zɛnaa ka Dɛnaa Lawa goã á pɛ Muizu-n lɔn.
Sii la min la a yɔrɔ bɔ
5 #
LWS 6.1-7
Dɛnaa Lawa boo da Muizu ni, á pɛ: 6«A pɛ Izirayeli minin lɛn nɛ, bɛ̀ giĩ hinlaa lɔ bɔlɔgoonbaãdɛnaabaa ǹ sii zɛnaa Dɛnaa Lawa nɛ, á wɔ ǹ miã kɔsɔ lon, ǹ dɛnaa zɛ̀rɛ nɛ. 7A sii baraa mɛn lɛ zɛnaa, a doamaa nɛ a na ka bɛ nɛ. Màn mɛn bɛ́ a zɛ̀rɛ lɛ mìi lɛa, a wɔ min mɛn lɛ lon, a doamaa nɛ, a bɛ tumaa saraa la, a màn lɛ a giɔ̀mɔ a talakɔn sooro goon da la. 8A sii la min mɛn lɛ la, bɛ̀ a yii á koo wa, ka bɛ dɔ nɛ, bɛ̀ ǹ dɛnaa dɔɔ̃n taãn banban, màn lɛ ń boe la a n saraa bɛ la wa, màn lɛ doamaa nɛ a n kɔ Lawa la, Lawa a wúlu-bɔle wɔ lɛa. Zɛ̀rɛdɛnaa lɛ doamaa nɛ a sère gɔ̀lɔ̀ dɔ bɔ sii baraa sawaa ǹ *wúlu màn lɛa, màn mɛn bɛ́ toɛ, Lawa a wúlu-bɔle sii baraa sawaa ǹ wúlu bɔ ǹ sii zɛnaa a lɛa. 9Izirayeli minin lɛn bɛ́ mànan mɛnɛn tumaa boe kiɛ ǹ gɔrɔn, Lawa gɔ ǹ wɔ lɛa, ǹ nə́ woe ǹ ne Lawa a wúlu-bɔle li, bɛn tumaa n Lawa a wúlu-bɔle lɛ wɔ lɛa. 10Bɛ̀ ǹ nə́ mànan mɛnɛn bɔ ǹ nə́ ǹ kaa ǹ gɔrɔn, bɛn man doe Lawa a wúlu-bɔle lɛ-a, ka màn mɛn bɛ́ ǹ nə́ kɔ la.»
Landa mɛn bɛ́ zuũ-bɔ wɔ paǹ li
11Dɛnaa Lawa wusoo á boo da Muizu ni, á pɛ: 12– Boo da Izirayeli minin lɛn nɛ, n pɛ ǹ nɛ: bɛ̀ min mɛn a lɔ giã doɛ̃ wa, á n baa bɔlɔgoonbaãdɛnaa lɛa ǹ dɛnaa nɛ, 13bɛ̀ min kɔsɔ tá kun ka lɔ lɛ nɛ, giĩ lɛ yii n tì a gɔ́ɔ̃ nɛ, bɛ̀ lɔ lɛ nə́ n din gɔgɔrɛ kɔ ka durii ni, bɛ̀ siére kɔn banban bɛ ń yui a gialaa doɛ̃ wa, bɛ̀ ǹ kũ sii lɛ a zɛnaa ǹ bǎã-n wa, 14bɛ̀ zuũ-bɔ wɔ giĩ lɛ yiri ni, yǎa a zɛ̀rɛ koa a lɔ lɛ ganaa, a da yǎa lɔ lɛ dɔ nə́ n din gɔgɔrɛ kɔ sonbore, hinlaa bɛ̀ zuũ-bɔ wɔ giĩ lɛ yiri ni, yǎa a zɛ̀rɛ koa lɔ lɛ-a, sɛnɛ lɔ lɛ ná a n din gɔgɔrɛ kɔ wa, 15bɛa giĩ lɛ wo ka a lɔ lɛ nɛ Lawa a wúlu-bɔle li, ka lɔ lɛ a Lawa gɔ ǹ màn nɛ, *ɔrzi wùsu nɔnɔɔ kilo sɔɔ. A baran nyɔɔ kaa li wa, a baran da yon gìĩ kɔɔ̃n da la wa, a giala zu-bɔ ǹ màn nɛ, yiri gisĩ sii ni ǹ màn nɛ, a n yiri gisĩ ka sii baraa nɛ. 16Lawa a wúlu-bɔle lɛ die a lɔ lɛ wɔlɔ kunu kɔ, a da bii-a Dɛnaa Lawa yɔrɔ-a. 17A die a mu sonbore kaa tii donkolon ne, a kion sonbore kɛa tán tii bɔ a kaa mu lɛ li. 18A die a da ka lɔ lɛ nɛ Dɛnaa Lawa yɔrɔ-a, a pii bɔ a mìi lɛ, a yiri gisĩ sii ni ǹ màn kɛ da a gɔn, zu-bɔ ǹ Lawa gɔ ǹ màn ke. Bɛa biikoo lɛ gɔ́ɔ̃ nɛ, mu kɔɔsɛ ke die ka koe ne, bɛ die a goã Lawa a wúlu-bɔle lɛ dinmaa gɔn. 19Lawa a wúlu-bɔle lɛ die a lɔ lɛ da liɛ ganaa, a pɛ nɛ: «Bɛ̀ giĩ kɔsɔ giã kunun ni duduu wa, bɛ̀ n giã ǹ gɔn nə talaa wa, bɛ̀ n nə n zuũ sã, n nə n din gɔgɔrɛ kɔ wa, mu kɔɔsɛ ke die ka koe ne, n die n kanbaa bɛ ganaa. 20Sɛnɛ, a n toa n zuũ lɛ li, bɛ̀ n giã doɛ̃ wa, bɛ̀ n nə́ n din gɔgɔrɛ kɔ, bɛ̀ giĩ kɔsɔ giã kunun n ni, bɛ ná a bie n zuũ kɛ-n wa, 21Lawa a wúlu-bɔle lɛ die a lɔ lɛ da lɛn baraa bii ganaa a pɛ nɛ: Dɛnaa Lawa die a n kurəə nɛ yɛ ganaa, a n nɔ̀ da yii ganaa. Bɛ̀ n tɔrɔ minin tá lɛn baraa bii kɔn li, ǹ nə́ n liɛ, ǹ die ǹ pɛ: Lawa die a n baa ka min kɛ a lɔ kɛ bɛ́ lɔn. 22Mu kɔɔsɛ ke die ka koe ne, bɛ á die we n gɔ́ɔ̃ nɛ, a n nɔ̀ yii, a n kurəə nɛ yɛ ganaa.» Lɔ lɛ die a pɛ: «A n miɛ̃, a n miɛ̃.» 23Lawa a wúlu-bɔle lɛ die a bɛa lɛn baraa bii ǹ boon kɛn lɛn kiɛ̃ sɛ́wɔ nɛ, a pii ka mu kɔɔsɛ lɛ nɛ. 24Bɛ kio, mu kɔɔsɛ lɛ die ka koe ne, a lɔ lɛ da a mii ganaa. Bɛa mu kɛ lɛ die ka koe ne, á die we a gɔ́ɔ̃ nɛ, a kɔɔsɛ kɔ. 25Lawa a wúlu-bɔle lɛ die a zu-bɔ ǹ Lawa gɔn màn lɛ si a bɔ lɔ lɛ gɔn, a na a kɔ Lawa la ǹ sii zɛnaa Lawa yɔrɔ-a, a wo ne *wúlu bɔ ǹ bǎã nɛ. 26Wúlu-bɔle lɛ die a gɔn yii goon bɔ Lawa gɔ ǹ wùsu nɔnɔɔ lɛ nɛ, yiri gisĩ sii ni ǹ sii lɛa, a tã wúlu bɔ ǹ bǎã lɛ lalan. Bɛ kio, a lɔ lɛ da mu lɛ a mii ganaa. 27A die a da mu lɛ a mii ganaa, sii kɛ n die n zɛnɛɛ: bɛ̀ lɔ lɛ nə́ n din gɔgɔrɛ kɔ, á n baa bɔlɔgoonbaãdɛnaa lɛa ǹ zuũ ni, mu mɛn lɛ á ke die ka koe ne, bɛ á die we a gɔ́ɔ̃ nɛ a kɔɔsɛ kɔ. A nɔ̀ tá re yii, a ná a ba nɛ yii wa. Lɔ lɛ a tɔrɔ minin tá re lɛn baraa bii kɔn li ǹ nə n liɛ ǹ pɛ: «Lawa die a n baa ka min kɛ a lɔ kɛ bɛ́ lɔn.» 28Sɛnɛ, bɛ̀ lɔ lɛ nə n din gɔgɔrɛ kɔ wa, á n *yoreene, sii na á n bɔ lɛ, á boe la a nɛ yɛ.
29Bɛ̀ lɔ lɛ giã doɛ̃ wa, bɛ̀ a tá kun ka giĩ kɔsɔ nɛ, n din gɔgɔrɛ koe, 30hinlaa bɛ̀ zuũ-bɔ wɔ giĩ yiri ni, á n zuũ boe a lɔ la, landa mɛn bɛ́ a tan bɛa zuũ-bɔ lɛ wɔ paǹ li, bɛ n ka kɛ nɛ: giĩ lɛ lɔ lɛ da bii-a Dɛnaa Lawa yɔrɔ-a, Lawa a wúlu-bɔle bɛa landa sii kɛ lɛ tumaa zɛnaa nɛ. 31Giĩ lɛ sii ba re goɛ̃ sã kɔn nɛ wa. Sɛnɛ, lɔ lɛ sɛ á die n toɛ̃ ka a sã nɛ.
اکنون انتخاب شده:
MNS 5: SBPE2011
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
San Bible Protestant Edition © Bible Society of Burkina Faso, 2011.