MNS 30
30
1Dɛnaa Lawa nə n gɔn waa Muizu ni ka boo mɛn tumaa nɛ, Muizu bɛ pɛ Izirayeli minin lɛn manɛ.
Landa mɛn bɛ́ lɛ-kɔ wɔ paǹ li
2Bɛ kio, Muizu Dɛnaa Lawa a gɔn waa ǹ boo kɔsɔn pɛ Izirayeli tɔrɔn lɛn nyɛɛnaandɛnan manɛ: 3#TDP 23.21-23; Mat 5.33 Bɛ̀ giĩ nə́ n lɛ kɔ Dɛnaa Lawa la ka sii ni, hinlaa bɛ̀ á n liɛ ka sii ni á da a din bɔlɔ-a, a doamaa bie a wusoo a boo kio wa. Lɛkɔ ǹ boo mɛn soo a lɛ-n, a doamaa nɛ a sii lɛ zɛnaa a kɔnpɛ ka bɛ-n ka te. 4Sɛnɛ, lɔ mɛn nə́ ke tɔn nɛniɛ lɛa kion, bɛ̀ bɛ nə́ n lɛ kɔ Dɛnaa Lawa la ka sii ni, hinlaa bɛ̀ á n liɛ ka sii ni á da a din bɔlɔ-a, 5bɛ̀ a díi bɔ a siére-a ǹ mɛn pinaa, ǹ di lɛ ná a boo kɔn da-n wa, nɛlɔ lɛ doamaa nɛ a na a da ǹ boon lɛn sii zɛnaa. 6Sɛnɛ, bɛ̀ ǹ di lɛ boo lɛ woɛ̃ á zumu, a miɛ pinaa lɛ din ni, nɛlɔ lɛ lɛ-kɔn mɛnɛn tumaa wɔ, a boon mɛnɛn tumaa da á da a din bɔlɔ-a, bɛn zɛnaa ba giala yii doo wa. Dɛnaa Lawa tá re bɛa zɛ̀rɛ toɛ nɛ, a giala a díi na á woɛ̃ á zumu. 7Bɛ̀ nɛlɔ lɛ daa á wɔ zuũ li, lɛ-kɔn ná a li hinlaa a da ǹ boo ná a bɔlɔ-a, 8bɛ̀ ǹ zuũ bɔ a siére-a ǹ mɛn pinaa, a ná a boo kɔn da-n bɛa pinaa kɛ lɛ-n wa, lɔ lɛ doamaa nɛ a na a da ǹ boon lɛn sii zɛnaa. 9Sɛnɛ, bɛ̀ ǹ zuũ lɛ boo lɛ woɛ̃ á zumu, a miɛ pinaa lɛ din ni, lɛ-kɔ laanka da ǹ boo mɛn bɛ́ lɔ lɛ bɔlɔ-a, ǹ zuũ lɛ na á bɛ ziziɛ̃. Dɛnaa Lawa tá re bɛa zɛ̀rɛ toɛ lɔ lɛ nɛ.
10Sɛnɛ, bɛ̀ lɔ mɛn nə giɔɔrɔ lɛa, hinlaa ǹ zuũ na á n gɔn bɔ a ganaa, bɛ̀ bɛ́ lɛ-kɔ woo lɛ-kɔ wɔ, a doamaa nɛ a na a lɛ pã. 11Sɛnɛ, a lɔ toa zuũ kion, bɛ̀ á lɛ-kɔ wɔ, hinlaa bɛ̀ á n liɛ ka sii ni á da a din bɔlɔ-a, 12bɛ̀ ǹ zuũ lɛ bɔ a siére-a biikoo mɛn li, ǹ zuũ lɛ ná a boo kɔn da-n wa, a ná a boo lɛ woɛ̃ á zumu wa, lɔ lɛ lɛ-kɔn mɛnɛn tumaa wɔ, a boo mɛn tumaa da á da a din bɔlɔ-a, a doamaa nɛ a bɛa sii zɛnaa. 13Sɛnɛ, bɛ̀ ǹ zuũ lɛ nə́ n piã boo lɛ a miɛ pinaa, lɔ lɛ baran a da ǹ boo lɛ lɛ pã wa, lɔ lɛ lɛ-kɔ mɛn tumaa wɔ, a n lɛ kɔ ka sii mɛn tumaa nɛ á da a din bɔlɔ-a, bɛ kɔn ba giala yii doo wa. Ǹ zuũ bɛ́ na á n piã ǹ nɛ, Dɛnaa Lawa tá re bɛa zɛ̀rɛ toɛ lɔ lɛ nɛ. 14Lɔ bɛ́ lɛ-kɔ mɛn yii we, hinlaa a bɛ́ liɛ mɛn yii we a n boe a din yii-n ni, ǹ zuũ á boe la a lɛ kɔ ka bɛ nɛ, hinlaa a n piã nɛ. 15Bɛ̀ ǹ zuũ lɛ boo kɔn da-n wa, yaa a wo belebɔ, lɔ lɛ nə n lɛ kɔ ka siin mɛnɛn zɛnaa nɛ, ǹ zuũ lɛ na á lɛ kɔ bɛn ganaa. A lɛ tã lɛ n nyɛɛ mà á lɛ kɔ ǹ ganaa. 16Sɛnɛ, bɛ̀ giĩ lɛ yoo bɛ kio, mà a nə ǹ piɛ̃ ǹ nɛ, a din nə die n toɛ̃ ka a lɔ lɛ a sã nɛ.
17Dɛnaa Lawa landan mɛnɛn kɔ Muizu la, giĩ laanka a lɔ wɔ paǹ li, hinlaa díi laanka a nɛlɔ mɛn bɛ́ tɔn kion, bɛn man ka kɛn nɛ.
اکنون انتخاب شده:
MNS 30: SBPE2011
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
San Bible Protestant Edition © Bible Society of Burkina Faso, 2011.