MNS 28
28
Landan mɛnɛn bɛ́ wúlu mànan wɔ paǹ li
1Dɛnaa Lawa boo da Muizu ni á pɛ: 2«Boo da Izirayeli minin lɛn nɛ n pɛ ǹ nɛ, mànan mɛnɛn bɛ́ doe masɛ ganaa maa màn-bii lɛa, ǹ nə́ ǹ tiɛ̃ ǹ gìĩ kɔɔ̃n masɛ ganaa, ǹ die ǹ nə n doa ǹ da bɛn kɔ ma la a biikoo li. 3A pɛ ǹ nɛ dɔn, mà ǹ bɛ́ re mànan mɛnɛn koe masɛ la màn-bii lɛa, bɛn nə́ ke: lɛ̀ goon sère nɛ màn paa, wɔ̀lɔ̀ ná a ba ǹ ganaa wa, bɛn nə́ baraabaraa a *wúlu màn tiɛ̃ lɛa duduu. 4Sère nɛ bibinaa ke, ǹ bɛ dɛ baayɛlɛ, a paabaa ǹ wɔ ke, ǹ bɛ dɛ wasamiɛ̃nɛ. 5*Wùsu sonbore mɛn nə́ ke ka yia ka *olivie nyɔɔ sonbore litiri goon ka talɛɛ nɛ, ǹ bɛa kilo sɔɔ ti ǹ ganaa. 6Bɛ n baraabaraa a wúlu màn tiɛ̃ lɛa, a gìĩ n kɔɔ̃nɛ Dɛnaa Lawa ganaa, goon ka kɛ nɛ ǹ nə́ goã boe Sinayii kele la. 7Ǹ doamaa nɛ ǹ duvɛ̃ litiri goon ka talɛɛ ti baayɛlɛ sère nɛ lɛ ganaa, ǹ bɛa wúlu bɔ ǹ duvɛ̃ kakaarɛ kɛ lɛ kɔ Dɛnaa Lawa la bǎã sonbore kɛ nɛ. 8Ǹ sère nɛ lɛ a paabaa ǹ wɔ kɛ sɛ kɔ Dɛnaa Lawa la wasamiɛ̃nɛ. Wúlu mànan mɛnɛn nə n ti baayɛlɛ wɔ lɛ ganaa, ǹ bɛn lɛn ti kɛ lɛ dɔ ganaa. A n wúlu màn tiɛ̃ lɛa, a gìĩ kɔɔ̃n Dɛnaa Lawa ganaa.
Susu ǹ pii pinaa a wúlu màn
9 *Susu ǹ pii pinaa, ǹ lɛ̀ goon sère nɛ paa bɔ, wɔ̀lɔ̀ ná a ba ǹ ganaa wa, kun ka Lawa gɔ ǹ wùsu sonbore kilo sɔrɔ nɛ, á n yia ka nyɔɔ nɛ, kun ka Lawa gɔ ǹ duvɛ̃ nɛ. 10Bɛ n susu ǹ pii a wúlu màn tiɛ̃ lɛa, kiɛ kun ka baraabaraa a wúlu màn tiɛ̃ kɛ laanka Lawa gɔ ǹ duvɛ̃ kɛ nɛ, ǹ nə́ tii a ganaa.
Mui a lɛawa bibinaa wúlu màn
11Mui gogoonmaa a giala kɔ pinaa, ǹ dii gɔ̀lɔ̀ paa baa wúlu màn tiɛ̃ lɛa ǹ kɔ Dɛnaa Lawa la, ka sère gɔ̀lɔ̀ goon laanka lɛ̀ goon sère nɛ sɔbaa nɛ, wɔ̀lɔ̀ ná a ba ǹ kɔn ganaa wa. 12Wùsu mɛn bɛ́ á n yia ka nyɔɔ nɛ, Lawa gɔ ǹ wɔ lɛa, ǹ bɛ ti tɔɔ lɛ gogoonmaa ganaa. Dii gɔ̀lɔ̀ lɛ a gogoonmaa wɔ n goɛ̃ wùsu sonbore kilo manangɔrɔ, sère gɔ̀lɔ̀ kɛ wɔ n kilo sɔrɔ, 13sère nɛ lɛ a gogoonmaa wɔ n kilo sɔɔ. A n wúlu màn tiɛ̃ lɛa, a gìĩ ń kɔɔ̃nɛ, Dɛnaa Lawa a màn-bii lɛa. 14Ǹ Lawa gɔ ǹ duvɛ̃ litiri sɔɔ da kun ka dii gɔ̀lɔ̀ lɛ gogoonmaa nɛ, a litiri paa nə n da kun ka sère gɔ̀lɔ̀ kɛ nɛ, a litiri goon ka talɛɛ nə n da kun ka sère nɛ lɛ a gogoonmaa nɛ. Ǹ bɛ́ re wúlu mànan mɛnɛn boe lɛ̀ a mui gogoonmaa a giala kɔ li, bɛn man ke. 15Ka bɛ dɔ nɛ, ǹ butumu goon baa sii baraa sawaa ǹ wúlu màn lɛa, ǹ da baraabaraa a wúlu màntiɛ̃ lɛ laanka a Lawa gɔ ǹ duvɛ̃ la.
Kiɛ̃mala ǹ zɔ́n a wúlu màn
16 #
BBN 12.1-13; TDP 16.1-2 Lɛ̀ a mui bibinaa a lɛawaa fulusiibaa ǹ wɔ pinaa, ka die ka *kiɛ̃mala ǹ zɔ́n zɛnaa ka Dɛnaa Lawa guguru kɔ nɛ. 17#BBN 12.14-20; 23.15; 34.18; TDP 16.3-8 A din mui kɛ lɛ a lɛawaa fulusoorobaa ǹ wɔ pinaa, kaa lɛawaa sɔbaa zɔ́n kɛ nə n giala koe. Ka n die yɔbùbaã buuru soɛ̃ bɛa zɔ́n kɛ lɛ a biikoo li. 18Zɔ́n lɛ a giala kɔ pinaa, ka die ka n sɔkɔn ka Dɛnaa Lawa guguru kɔ, ka n ka a n gɔn diɛ dí kaka kɔn-a wa. 19Ka dii gɔ̀lɔ̀ paa kɔ Dɛnaa Lawa la wúlu màn tiɛ̃ lɛa, ka sère gɔ̀lɔ̀ goon laanka lɛ̀ goon sère nɛ sɔbaa nɛ, wɔ̀lɔ̀ ná a ba ǹ kɔn ganaa wa. 20Wùsu mɛn bɛ́ á n yia ka nyɔɔ nɛ, Lawa gɔ ǹ wɔ lɛa, ka bɛ ti tɔɔ lɛ gogoonmaa ganaa. Dii gɔ̀lɔ̀ lɛ gogoonmaa wɔ n goɛ̃ wùsu sonbore kilo manangɔrɔ, sère gɔ̀lɔ̀ kɛ wɔ n kilo sɔrɔ, 21sère nɛ sɔbaa lɛ gogoonmaa wɔ n kilo sɔɔ. 22Ka bɛ dɔ nɛ, ka butumu goon bɔ sii baraa sawaa ǹ wúlu màn lɛa, ka sii baraa sawaa ǹ sii zɛnaa ka ganaa nɛ. 23Ka n die bɛ yii zɛnɛɛ ka da baayɛlɛ wúlu màn tiɛ̃ kɛ la, ka n boe baraabaraa nɛ. 24Ka die ka bɛa mànan kɛn lɛn bɔ baraabaraa lɛawaa sɔbaa lɛ gɔ́ɔ̃ nɛ, wúlu màn-bii tiɛ̃ lɛa, a gìĩ ń kɔɔ̃n Dɛnaa Lawa ganaa. Ka n die ǹ boe ka da wúlu màn kɛ la ka n boe baraabaraa, ka Lawa gɔ ǹ duvɛ̃ kɛ nɛ bɛ̀ ka ti a ganaa. 25A lɛawaa sɔbaabaa ǹ wɔ, ka wusoo ka n sɔkɔn ka Lawa guguru kɔ, ka n ka a n gɔn diɛ dí kaka kɔn-a wa.
Kaa-piɛ zɔ́n a wúlu màn
26 #
BBN 23.16; 34.22; TDP 16.9-12 *Kaa-piɛ zɔ́n pinaa, bɛ̀ ka tá die kaa wuru màn lɛ bibinaa koe Dɛnaa Lawa la, ka die ka n sɔkɔn ka Dɛnaa Lawa lɛ guguru kɔ, ka ka a n gɔn diɛ dí kaka kɔn-a wa. 27Ka die ka dii gɔ̀lɔ̀ paa baa wúlu màn tiɛ̃ lɛa, ka sère gɔ̀lɔ̀ goon laanka lɛ̀ goon sère nɛ sɔbaa nɛ. A gìĩ kɔɔ᷉n Dɛnaa Lawa ganaa. 28Wùsu mɛn bɛ́ á n yia ka nyɔɔ nɛ, Dɛnaa Lawa gɔ ǹ wɔ lɛa, ka bɛ da kun ka tɔɔ lɛ gogoonmaa nɛ. Dii gɔ̀lɔ̀ lɛ gogoonmaa wɔ n goɛ̃ wùsu sonbore kilo manangɔrɔ, sère gɔ̀lɔ̀ kɛ wɔ n kilo sɔrɔ, 29sère nɛ sɔbaa lɛ gogoonmaa wɔ n kilo sɔɔ. 30Ka bɛ dɔ nɛ, ka butumu goon dɔ bɔ, màn mɛn bɛ́ toɛ ka sii baraa sawaa ǹ sii zɛnaa ka ganaa nɛ. 31Bɛa wúlu mànan kɛn lɛn tumaa n die kiɛkun ka baraabaraa a wúlu màn tiɛ̃ kɛ nɛ, ka wúlu màn kɛ nɛ ka n tii a ganaa. Tɔɔn mɛnɛn bɛ́ wɔ̀lɔ̀ ná a ba ǹ ganaa wa, ka die ka wúlu lɛ bɔ ka bɛn nɛ, kun ka wúlu bɔ ǹ duvɛ̃ mɛn kɔnbɔ a n da kunun ǹ ni.
اکنون انتخاب شده:
MNS 28: SBPE2011
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
San Bible Protestant Edition © Bible Society of Burkina Faso, 2011.