MNS 25
25
Izirayeli minin dì wúlu bɔ
1Izirayeli minin lɛn nə́ giã Sitimu. Ǹ ná a giala kɔ walan ǹ nə́ narɛbaa zɛnɛɛ kun ka Moabu gána lɔn nɛ. 2Bɛa lɔn lɛn man nə́ goã lɛ diɛ Izirayeli zaman lɛ la, ǹ dì wúlu bɔn ganaa. Zaman lɛ dɔ na á goã woe màn bii, bɛ̀ ǹ nə ǹ dìn lɛn guguru kɔ. 3Izirayeli minin lɛn nə́ n mìi paraa Pewɔɔrɔ minin dì *Baali kɛa sii ni, Dɛnaa Lawa foo tɔ́n yoo ǹ li taãn-taãnɛ. 4Bɛ kio, Dɛnaa Lawa pɛ Muizu-n kɛnɛn: «Zaman lɛ a nyɛɛnaandɛnan tumaa kũ, n nə ǹ bɔlɔ yu lon masɛ yɔrɔ-a wasa nɛ, màn mɛn bɛ́ toɛ maa foo yoo gole kɛ nə n bɔ ka wɔlɔ li.»
5Muizu tɔ́n pɛ Izirayeli minin lɛn sii yɔrɔ bɔlen manɛ: «Ka gogoonmaa a minin bii, min mɛnɛn nə n mìi paraa Pewɔɔrɔ minin dì Baali kɛ a sii ni, ǹ didie na a wɔn dɛ.»
6Bɛa biikoo kɛ lɛ nɛ, bɛ̀ Izirayeli minin lɛn goon nə́ ke á daa n dɔ ǹ dɔɔ̃nɔn lɛn bii, Madiã gána lɔ goon nə́ kun ni. A Muizu laanka Izirayeli zaman lɛ tumaa toa wuu pii kɔn yɛ ka Lawa nɛ ǹ kion kɛa kiɛnlɛ-a, ǹ yii bɛa min paa lɛ yɛ. 7Ǹ bɛ́ ǹ nə́ ǹ yɛ miɛ̃, Lawa a wúlu-bɔle Pinasi ke, Eleyazaara a nɛ lɛa, Aarɔn a nɔ̀ɔn lɛa, bɛ́ yoo á n bɔ tán zaman lɛ bii, á n daa sɛmiɛ̃ la. 8Izirayeli min lɛ wɔ mɔnaa zìã mɛn nɛ ka lɔ lɛ nɛ, Pinasi wɔ a kio walan, á sɛmiɛ̃ dere ǹ dinin paanan nɔ̀ nɛ, ǹ nə́ gã. Bɛa bǎã-n gɔrɔ, koe mɛn goã Izirayeli minin lɛn gialaa, bɛ nə́ n bɔ ǹ mìi ni. 9Koe lɛ bɔ min mɛnɛn ganaa ǹ nə́ gã, maǹ min duu fuəwensii (24 000). 10Dɛnaa Lawa boo da Muizu ni, á pɛ: 11«Lawa a wúlu-bɔle Pinasi ke, Eleyazaara a nɛ lɛa, Aarɔn a nɔ̀ɔn lɛa, bɛ na á ma foo da waa ganaa Izirayeli minin lɛn li. A giala, maa sii kaka kɔ a gɔn Izirayeli minin lɛn bii, ka n pɛ mà masɛ din ni. Bɛ lɛ n ke, a laanɛ masɛ tá n liɛ ǹ Lawa goon toto lɛa, ma ǹ bɔ̀n baa lenlen wa. 12Bɛ lɛ tɔ ganaa, a pɛ Pinasi lɛ nɛ, mà masɛ Lawa n lɛ kɔ kɔn la we ne, lɛ kɔ kɔn la mɛn bɛ́ re là nyantoro koe. 13Bɛa lɛ kɔ kɔn la kɛ lɛ n die goɛ̃ a din wɔ lɛa, ka a tɔrɔn nɛ. A din lɛ kɔ kɔn la kɛ lɛ n die toɛ, wúlu bɔ ǹ dí goã ǹ wɔ lɛa miɛ̃ duduu. A giala, á nyaa mà a Lawa lɛ sii á kaka a gɔn, ka bɛ dɔ nɛ, á Izirayeli minin lɛn sii baraa sawaa ǹ sii zɛnaa.»
14Ǹ Izirayeli min mɛn lɛ dɛ, kɛ lɛ ǹ nə́ dɛ kun ka Madiã gána lɔ lɛ nɛ, a tɔ n Zimirii. Saluu a nɛ nɛ, a n Simiɔn tɔrɔn nyɛɛnaandɛnaa goon lɛa. 15Madiã lɔ lɛ sɛ tɔ n Kozbii, ǹ di tɔ n Suuru. Suuru lɛ na á goã Madiã gána a tɔrɔ kɔn a tanlɛ gigiã nyɛɛnaandɛnaa lɛa.
16Bɛ kio, Dɛnaa Lawa boo da Muizu ni, á pɛ: 17«Ka n yii dɔraa Madiã gána minin lɛn li, ka ǹ dɛ lenlen. 18A giala, Madiã minin lɛn man nə́ yiri baraa bɔ, ka n yii dɔraa ǹ dɔn li. Maǹ nə́ yiri baraa bɔ ka li, ǹ nə́ ka mìi dɔ ka li Pewɔɔrɔ a sii kɛ gɔ́ɔ̃ nɛ, ka ǹ dɔɔ̃nlɔ Kozbii wɔ kɛ nɛ, Kozbii mɛn lɛ á ke Madiã gána a nyɛɛnaandɛnaa a nɛlɔ lɛa, ǹ nə́ dɛ koe lɛ a pinaa, Pewɔɔrɔ a sii kɛ taman yii.»
Izirayeli minin lɛn nimi a paabaa ǹ wɔ
19Koe lɛ a woo kio.
اکنون انتخاب شده:
MNS 25: SBPE2011
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
San Bible Protestant Edition © Bible Society of Burkina Faso, 2011.