MNS 14
14
Izirayeli minin nə n piã mà ǹ ba woe gána lɛ-n wa
1Izirayeli zaman lɛ tumaa nə́ n lɛ wurəə, ǹ nə́ n lɛ dɛ tèlò tumu gɔ́ɔ̃ nɛ. 2Ǹ nə́ n bɔlɔ lɔlɔkɔn Muizu laanka Aarɔn ganaa, ǹ nə́ pɛ ǹ nɛ kɛnɛn: «Haayii! Ká toa bɛ̀ wɔsɛn dinin man wɔ́ gã Ezipti gána lɛ nɛ, hinlaa diə gole kɛ nɛ. 3Wàa na á baa Dɛnaa Lawa á woe ka wɔsɛn nɛ bɛa gána kɛ miã nɛ, zia bɛ́ re wɔ bii bǎã mɛn nɛ? Maǹ die wɔa lɔn laanka wɔa nɛnyaanan kuĩ. A ba soɛ wɔ ganaa, wɔ n bɔyaa wɔ wo Ezipti gána-n wa?» 4Ǹ nə́ tɔ́n pɛ kɔn nɛ kɛnɛn: «Ka daa wɔ min koa wɔa kii lɛa, wɔ n bɔyaa wɔ wo Ezipti gána nɛ.»
5Muizu laanka Aarɔn tɔ́n na, ǹ nə́ kaa tán ǹ lɛ la, Izirayeli zaman sɔkɔn lɛ tumaa yɔrɔ-a. 6Min mɛnɛn nə goã ǹ nə́ woo ga gána lɛ ganaa, bɛn min paa, Nunu a nɛgiĩ Zozoe laanka Zefunee a nɛgiĩ Kalɛbu ni, foo ziziɛ̃ taman yii, ǹsɛn nə́ ǹ dɔnkɛn tɔtoɛ̃, 7ǹ nə́ pɛ Izirayeli zaman lɛ tumaa nɛ: «Wɔsɛn nə gána mɛn lɛ kɔkɔn wɔ́ ga a ganaa, gána siĩn ni a tɔ-a. 8Bɛ̀ Dɛnaa Lawa nə́ n gɔ́ɔ̃ kaa wɔ nɛ, á die woe ka wɔ nɛ bɛa gána kɛ lɛ nɛ, a kɔ wɔ la, bɛa gána kɛ lɛ, bɔ̀nyaa laanka zoo nyɔɔ n baa sii a nɛ. 9#Ebr 3.16 Sɛn kəni, ka baran n gòãn dii Dɛnaa Lawa ganaa wa. Ka baran nyɛ́ɛ baa bɛa gána kɛ lɛ a minin man wa. Bɛa minin kɛn lɛn ba re wɔsɛn lɛ boe goon dinin wa. A giala, ǹ bɛ́ dìn mɛnɛn wúlu li, bɛn nə́ ǹ toa walan. A da yaa, Dɛnaa Lawa á kun ka wɔsɛn nɛ. Ka baran nyɛ́ɛ din baa ǹ nɛ wa.»
10Zaman lɛ tumaa na á goã, mà ǹ kɔlɔ kaã bɔ ǹ ganaa, sɛnɛ bǎã goon ne, Dɛnaa Lawa a gugurubaa daa n din nyaa Izirayeli minin lɛn manɛ kɔn yɛ ka Lawa nɛ ǹ kion kɛ la.
Muizu goã-kũ da Lawa ganaa
11Dɛnaa Lawa boo da Muizu ni á pɛ nɛ: «Zaman kɛ n die n yii we masɛ la yǎa biĩ kəni? Ma sii nyaa ǹ siin mɛnɛn tumaa zɛnaa ǹ bii, maǹ die n tiɛ̃ bɛn kio, ǹ nə́ ǹ ba n foo doɛ masɛ ganaa wa, yǎa biĩ kəni? 12Masɛ n die yui ǹ gialaa ka piɛ̃ busu ni, ma ǹ dɛ ma ǹ nya lenlen. Bɛ kio, ma á die zɛnɛɛ, zaman bɔ Muizu din ni, ǹ pàã laanka ǹ mɔnaabaa n liɛ nɛ ǹ wɔ nɛ.» 13#BBN 32.11-14 Muizu tɔ́n pɛ Dɛnaa Lawa nɛ: – Ezipti minin nə́ dɔ̃, mà n din ni ń zaman kɛ lɛ bɔ ǹ bii ka n pàã nɛ ń soo ǹ ne. 14Ǹ ná a boo laakalaa gána lɛ a minin manɛ. Bɛn dɔn nə́ bɔ a siére-a kəni, mà n din Dɛnaa Lawa tá kun ka zaman kɛ lɛ nɛ, n tá n din nyɛɛ nɛ buə̃buə̃. Ǹ nə́ bɔ a siére-a dɔn, mà n din nə zaman lɛ tamaɛ, a giala, man tɔ we ǹ nyɛɛnɛ lɛawaa li, tɛmaa bara bii, tèlò-n, tɛ bara bii. 15Bɛ̀ ń yoo sisia, ń nə n zaman kɛ tumaa lɛ naa bǎã goon ne, tɔrɔn mɛnɛn nə n tɔ ma, bɛn man die pii kɛnɛn: 16«Dɛnaa Lawa goã á n lɛ kɔ zaman lɛ la ka gána mɛn lɛ nɛ, a bɛ́ a ba boe la a tá we ǹ ne walan wa, bɛ lɛ n ke á ǹ dɛ diə gole ne.» 17Bɛ lɛ nɛ, Dɛnaa Lawa, masɛ n gòã-kũ diɛ n ganaa, máa n nə n pàã lɛ nyaa. A giala, n din ni ń pɛ kɛnɛn: 18#BBN 20.5-6; 34.6-7; TDP 5.9-10; 7.9-10 «Masɛ din nə Dɛnaa Lawa lɛa, ma foo a yui fufuu wa, maa bǐɛ̃ zɛnaa pàã ń gole. Masɛ n siɛ̃-wole a sii baraan laanka bɔlɔ-tii siin tɔɛ ǹ dɛnan manɛ. Sɛnɛ, ma a zɛ̀rɛdɛnaa bii zɛ̀rɛbaãnaa wa. Ma n díin dɔlɔ boe ǹ nɛnyaanan ganaa, yǎa ǹ nɔ̀ɔnɔn nɔ̀ɔnɔn ganaa.» 19Dɛnaa Lawa, a kũ zaman lɛ a soo a bɔ Ezipti gána-n kɛ ganaa, n nə́ ǹ sii baraan toa ǹ nɛ yǎa kànaa. Wusoo doo n nə ǹ sã toa-n miɛ̃, n din a bǐɛ̃ gole lɛ taman yii.
20Dɛnaa Lawa tɔ́n pɛ: «Má zaman lɛ a sã toa nɛ, ka Muizu din na a nyankɔ lɔn. 21#Ebr 3.18 Sɛnɛ, bɛ̀ ma n liɛ wa, ma yii bie koo, maa gugurubaa kanaa gɔ́ɔ̃ tumaa pã wa. 22-23Masɛ máa minin kɛn lɛn min kɔn ba re we gána lɛ-n wa. Ǹ nə́ maa gugurubaa yɛ, ka kaãbaa sii dadaran kɛn nɛ má ǹ zɛnaa Ezipti gána laanka diə gole gɔ́ɔ̃ nɛ. A laanka bɛ yii ni, ǹ nə n da ma gɔ́ɔ̃ li lɛ da wa. Ǹ nə́ ma bɔlɔ dɔ tii. Bɛ lɛ n ke, ma n lɛ kɔ ǹ digolon la ka gána mɛn lɛ nɛ, ǹ min kɔn yii ba re miɛ bɛ-a wa, a giala ǹ nə́ ma daa. 24#Zoz 14.9-12 Sɛnɛ, taasiɛ kɔsɔ goã maa dí-nyali Kalɛbu sɛ yiri ni, á goã bɔlɔgoondɛnaa lɛa masɛ wɔ paǹ li. A wo ga gána mɛn lɛ-a, masɛ á die we-n walan, ma bɛa bǎã lɛ kɔ a tɔrɔn la. 25Amalɛki tɔrɔn laanka Kanaan minin man giã-n bɛa nyankɔrɔ lɛ nɛ. Biɛ̃, ka die ka n lɛ goa ka wusoo ka wo diə gole lɛ nɛ, ka wo ka ka yɔrɔ nɛ Sawɛɛ tà kɛ ganaa.»
Dɛnaa Lawa yoo a zaman gialaa
26Dɛnaa Lawa wusoo á boo da Muizu laanka Aarɔn nɛ, á pɛ: 27«Man die goɛ̃ bɛa zaman tìĩ-bɔle kɛ lɛa siin sii ma ganaa miɛ̃, yǎa biĩ? Bɛa zaman kɛ lɛ, a ba n niɛ̃ lɛ giulun boo da masɛ ganaa-a wa. Izirayeli minin lɛ giulun boon lɛn ǹ tá ǹ diɛ masɛ ganaa, máa ǹ ma. 28Ka wo kɛ pɛ ǹ nɛ mà masɛ Dɛnaa Lawa lɛ gɔ́ɔ̃ ǹ boo á ke: Zaman lɛ boo mɛn da, á kaa masɛ too ne, bɛ̀ masɛ ka kũ á kɔnpɛ ka bɛa boo lɛ-n duduu wa, masɛ Dɛnaa Lawa yii bie koo wa. 29#Ebr 3.17 Ka n die giɛ̃ diə gole kɛ nɛ. Ka goã ka kaa min mɛnɛn tumaa nimi, á saa lɛ̀ fuə ganaa, á woo lɛ̀ fuə ka kio yaa, bɛn tumaa n giɛ̃, a giala ka lɛ giulun boo da masɛ ganaa. 30Masɛ nə n lɛ kɔ, má ma á gána mɛn lɛ koe ka la, ka giã a nɛ, bɛ̀ á n bɔ Zefunee a nɛgiĩ Kalɛbu ni, ka Nunu a nɛgiĩ Zozoe ne, bɛ̀ ka wɔ bɛ nɛ, masɛ bie wa. 31Sɛnɛ, kaa nɛnyaanan kɛn sɛn, ka goã ǹ mɛnɛn lɛn ganaa, mà minin tá re ǹ kuĩ, masɛ á re we ka bɛn nɛ gána lɛ nɛ. Ka dinin bɛ́ ka zín toa gána mɛn lɛ-n wa, kaa nɛnyaanan lɛn tá re bɛ doɛ̃. 32Sɛnɛ, ka dinin kɛn, ka n giɛ̃ diə gole kɛ nɛ. 33#NDS 7.36 Kaa nɛnyaanan lɛn tá re n binbirin boe diə gole lɛ nɛ, lɛ̀ pusi gɔ́ɔ̃ nɛ. Kaa bɔlɔgoonbaãdɛnaa siin lɛn nɔmaa n die goɛ̃ kaa nɛnyaanan lɛn kio, yǎa ka dinin kɛn tumaa giɛ̃ ka nyɛɛ diə gole kɛ nɛ. 34Ka n ka woo ga gána lɛ-a, ka lɛawaa pusi. Lɛawaa goon nə die lɛ̀ goon bǎã siɛ: ka n die n toɛ̃ ka kaa sãn lɛn guĩ ni lɛ̀ pusi gɔ́ɔ̃ nɛ. Màn mɛn tá gòãn dii masɛ ganaa nɛ, ka á re bɛ doɛ̃. 35Masɛ din Dɛnaa Lawa n má boo da. Bɛa zaman tìĩ-bɔle kɛ lɛ, ǹ nə́ n lɛ kaa kun ǹ nə́ yoo masɛ gialaa, ma n die ǹ kuĩ ka yɔrɔ kɛ tɔrɔ nɛ: Ǹ tumaa n die nyɛɛ diə gole kɛ nɛ. Maǹ die giɛ̃ kànaa lɛ nɛ.»
36Minin kɛn Muizu goã á ǹ dia woe giɛ gána lɛ ganaa, bɛn bɛ́ ǹ nə́ n bɔyaa, ǹ mɛnɛn nə gána lɛ piɛ̃ bɔ, ǹ nə́ zaman lɛ tumaa gòãn sɔmɔ ǹ nə́ ǹ kaa Muizu ganaa, 37bɛa minin lɛn nə́ gɛ̀ kaka wɔ Dɛnaa Lawa yɔrɔ-a, kɛn lɛn ǹ nə́ goã ǹ nə́ gána lɛ piɛ̃ bɔ. 38Min mɛnɛn nə goã ǹ nə́ woo ga gána lɛ ganaa, Nunu a nɛgiĩ Zozoe laanka Zefunee a nɛgiĩ Kalɛbu dinsɔɔ̃ yii na á goã koo ǹ bii.
Zaman lɛ wusoo a Lawa bɔlɔ tii
39Muizu bɛa boon lɛn gũ á ǹ pɛ Izirayeli minin lɛn tumaa nɛ. Boon lɛn nə́ zaman lɛ foo ziziɛ̃ parsiini. 40Bɛ lɛ n ke, bɛa lɛawaa baayɛlɛ yiisoone, ǹ nə́ yoo ǹ nə́ zii saa, ǹ nə́ woo ka ǹ yɔrɔ nɛ kele yii bǎã kɛ li, bɛ̀ ǹ nə́ pii: «Wɔ á ke, Dɛnaa Lawa bǎã mɛn lɛ nyaa, wɔ n die woe walan. Sonbore, wɔsɛn nə́ sii baraa zɛnaa.» 41Muizu tɔ́n nɔ̀n da ǹ la: «Ka n woe wàa pii walan? Ka na a gialaa Dɛnaa Lawa bɔlɔ tii. Kɛa bǐɛ̃ koe wa. 42Ka baran wo wa, a giala Dɛnaa Lawa ba kun ka n wa. Ka baran wo ka dinin kɔ kaa zɔ́ɔn la, bɛn nə ka dɛ wa. 43Amalɛki tɔrɔn laanka Kanaan minin tá walan ka nyɛɛnɛ, zia tá re ka bii bɛn gɔn. A giala, ka n paǹ kɔ Dɛnaa Lawa nɛ. Dɛnaa Lawa ba re goɛ̃ kun ka-n wa.»
44Sɛnɛ, ǹ dɔn nə́ n too laa ǹ nə́ woo bɛa kele yii bǎã lɛ li, a da yaa, *lɛ kɔ kɔn la ǹ goo lɛ laanka Muizu nə n gòã woɛ̃ giã ǹ bǎã lɛ-n wa. 45Amalɛki tɔrɔn laanka Kanaan minin mɛnɛn bɛ́ giã-n bɛa kele mìin lɛn nɛ, bɛn nə́ gisĩ, ǹ nə́ Izirayeli minin lɛn dɛ ǹ nə́ ǹ zɔzɔɔ, yǎa Ɔrmaa kiwi.
اکنون انتخاب شده:
MNS 14: SBPE2011
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
San Bible Protestant Edition © Bible Society of Burkina Faso, 2011.