MNS 12
12
Gɔ̀nɔn ki busu babaraa Miriyamu kũ
1Muizu na á goã á Etiopii gána nɛ saa lɔ lɛa. Miriyamu laanka Aarɔn tɔ́n Muizu tɔ pɛ bɛa sii lɛ gɔ́ɔ̃ nɛ, 2ǹ nə́ pɛ: «Dɛnaa Lawa na á boo da ka Muizu dinsɔɔ̃ nɛ? A boo da ka wɔsɛn dɔn nɛ wa? Dɛnaa Lawa nə́ ǹ lɛ ma.» 3Muizu na á goã din gisiĩ wole lɛa, á la kanaa lɛ a min tumaa nɛ. 4Bǎã goon ne, Dɛnaa Lawa pɛ Muizu ni, ka Aarɔn laanka Miriyamu ni: «Ka dinin min sɔɔ tumaa wo kɔn yɛ ka Lawa nɛ ǹ kion kɛ nɛ.» Ǹ dinin min sɔɔ tumaa kiɛ̃, ǹ nə́ woo kɔn yɛ ka Lawa nɛ ǹ kion lɛ nɛ. 5Dɛnaa Lawa gisĩ tɛmaa bara bii, á golee zìã lɛ a wɔ ǹ kiɛnlɛ-a. Á lɛ dia Muizu laanka Miriyamu la, yǎa ǹ dinin paanan nə n zɔ̃ ǹ dɔ. 6Dɛnaa Lawa nə́ n toa ǹ ganaa: – Ka n too kɔ masɛ a boo ganaa kəni: «Bɛ̀ Lawa a boo gii-dali mɛn tá ka bii, sii-nyaa gòã wuu li ni, masɛ Dɛnaa Lawa n toɛ, bɛ n masɛ doɛ̃. Narɛɛ dɔ gɔ́ɔ̃ nɛ, masɛ n boo diɛ nɛ. 7#Ebr 3.2 Sɛnɛ, masɛ a dí-nyali Muizu wɔ bie miɛ̃ wa, kɛ lɛ giɛ masɛ a zaman lɛ walan ka bɔlɔgoondɛnaabaa nɛ. 8Masɛ n boo diɛ nɛ, wɔ bobo kɔn, ma boo lɛ toɛ̃ nɛ, ma ń ma a toɛ ti wa má n din nyaa nɛ, á maa siĩnbaa yɛ a yɔrɔ-a. A n siɛ lɔn kəni, ka tá masɛ a dí-nyali Muizu lɛ tɔ pii?» 9Dɛnaa Lawa foo yoo ǹ li taãn-taãnɛ, bɛ kio á woo. 10Tɛmaa bara lɛ kiɛ̃ á n bɔ zìã lɛ la, bɛ̀ Miriyamu á ke gɔ̀nɔn ki busu babaraadɛnaa lɛa, á kũ á fu kɔ ka koara nɛ. Aarɔn nə́ n bɔyaa á ga Miriyamu ganaa, bɛ̀ gɔ̀nɔn ki busu babaraa á ke a ganaa. 11Aarɔn tɔ́n pɛ Muizu ni: «Ee! Maa dɛnaagiĩ ganaa, wɔsɛn zɛ̀rɛ nɛ. Sɛnɛ, bǐɛ̃ kɔ, sii baraa ke wɔsɛn nə́ zɛnaa ka baãnaabaa nɛ, n baran bɛa dɔlɔ da wɔsɛn mìi-n wa. 12Bǐɛ̃ kɔ, Miriyamu baran n baa ka nɛ mɛn nə́ ke á ziziɛ̃ ǹ dan gɔ́ɔ̃ nɛ, a gɔ̀nɔn siĩ talɛɛ n sɔlɛɛ a yɛ biikoo li wa.»
13Muizu tɔ́n nə n lɛ dɛ Dɛnaa Lawa ganaa kɛnɛn: «E, Lawa, masɛ n gòã-kũ diɛ n ganaa, bǐɛ̃ kɔ, n Miriyamu lɛ kaka kɔ.» 14#MNS 5.2-3 Dɛnaa Lawa tɔ́n pɛ Muizu ni: «Bɛ̀ Miriyamu lɛ a díi na á sɛ̀ kaa a yɔrɔ nɛ, bɛ̀ sìi ba goɛ̃ a ganaa a dɔ pii zii goon wa? Bɛ lɛ nɛ, ka bɔ kaa giã ǹ bǎã lɛ nɛ ka da kanaa a lɛawaa sɔbaa, bɛ kio ka tɔn nə n bɔyaa ka da a bǎã nɛ.» 15Ǹ nə́ tɔ́n Miriyamu bɔ giã ǹ bǎã lɛ nɛ ǹ nə́ da kanaa a lɛawaa sɔbaa. Izirayeli minin lɛn nə yoo ǹ nə́ n bɔ giã ǹ bǎã lɛ-n wa, yǎa Miriyamu lɛ wusoo á daa a bǎã nɛ. 16Bɛ kio, zaman lɛ yoo a n bɔ Haserɔti, ǹ nə́ woo golee Paran diə gole ne.
اکنون انتخاب شده:
MNS 12: SBPE2011
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
San Bible Protestant Edition © Bible Society of Burkina Faso, 2011.