Mat 10
10
Yezu a dia dí-a wole fulupaa
(Mar 3.13-19; Luk 6.12-16)
1Yezu ná a kialandɛnaa fulupaa bíi á nɔ̀ɔn babaraa loo ǹ pàã kɔ ǹ la, á busu tɔrɔ din tumaa nya ǹ pàã kɔ ǹ la.
2A dia dí-a wole fulupaa lɛn tɔn nə́ ke: Simɔn nɛ bɔrɔ (ǹ bɛ́ ǹ mɛn bíi Piɛrɛ) ka ǹ dɔɔ̃n Andre ne, Zaaki laanka ǹ diɛ̃ Zaã nɛ, Zebedee a nɛnyaanan man bɛn nɛ, 3Filipi laanka Bartelemii ni, Toomaa laanka wusuru-sili Matiə ne, Alfee a nɛgiĩ Zaaki laanka Taadee ne, 4Simɔn nɛ (ǹ mɛn nə goã zia diɛ a gána a lɛa) ka Kariyɔtin Zudaasi ni (min mɛn bɛ́ re Yezu koe a zɔ́ɔn la).
Yezu doroon mɛnɛn kɔ a kialandɛnan la
(Mar 6.7-13; Luk 9.1-6)
5Yezu na á doroon kɛn kɔ bɛa min fulupaa lɛ la, á ǹ dia á pɛ ǹ nɛ:
– Zuifun bɛ́ ǹ ba gánan mɛnɛn nɛ wa, ka nyan toa ka wo walan wa. Ka nyan wo Samarii kiwin kɛn dɔn nɛ wa. 6Izirayeli minin mɛnɛn bɛ́ ǹ nə papaã ka sèren bɛ́ lɔn, ka wo bɛn li, bɛ á sóɛ. 7Ka n toa woe, bɛ̀ ka tá Lawa a boo laakalɛɛ ka n pii: «Lon a kiibaa lɛ a biikoo diri!» 8Ka busulən busu nya, ka geren yii kaa, ka gɔ̀nɔn busu babaraa dɛnan busu nya, ka nɔ̀ɔnɔn loo ka ǹ bɔ minin ganaa. Ka n ka yɛ kooro, ka dɔn nə kɔ kooro. 9Ka baran sana saa wa, ka baran wɔrɔ da ka lon ka wo-n wa. 10#Kor1 9.14; Tim1 5.18 Ka baran wo zii ni ǹ boroo saa wa, ka baran dɔnkɛ màn paa goa wa, ka baran kɔsɔn toa ka gòãn-a ka kɔsɔn goa wa, ka baran bàlà saa wa. A kɔnpɛ ka a yɔrɔ nɛ, dí-nyali doamaa-n ka a màn-bii ni.
11Bɛ̀ ka dɔ kiwi mɛn-a, ta kiwi gole ne, ta kiwi boɛɛn nɛ, ka ga min sonbore li ka n yu la, ka goã bɛa dɛnaa lɛ a kion miɛ̃, yǎa kaa wo bǎã kɔsɔ-n nə doe. 12Bɛ̀ ka á re we kion mɛn nɛ, ka pɛ: «Ka fòo ka là nyantoro ne.» 13Bɛ̀ bɛa kion lɛ a minin doamaa-n ka là nyantoro ne, kaa fòo diɛ kɛ lɛ lɛ si ǹ ganaa; sɛnɛ, bɛ̀ ǹ doamaa bie-n wa, ka n moɛ̃ ka kaa là nyantoro fòo diɛ nɛ. 14Bɛ̀ kion, hinlaa kiwi mɛn a minin nə́ n piã, ǹ yu ǹ bǎã kɔ ka la wa, hinlaa mà ǹ ba n too koe ka lon wa, ka n gòã gusuũ duduu#10.14 gòã gusuũ duduu: Bɛ n nyɛɛ mà maǹ nə́ n gii bɔ ǹ nə́ bɔ ǹsɛn sii ni, a giala ǹ nə́ n piã Yezu ni. Ka ga Luk 9.5 ganaa ka NDS 13.51.. Bɛ kio, ka soo ka n bɔ walan. 15#Mat 11.24; SGK 19.24-28 Lawa bɛ́ re kiri we Sodɔmu laanka Gomɔɔrɔ kiwi min baraan kɛn ganaa ǹ mɛn pinaa, bɛn dɔlɔ á re goɛ̃ puusə ǹ wɔ ganaa.
Yezu boo mɛn da biɛ̃ ǹ nɔmaa wɔ paǹ li
(Mar 13.9-13; Luk 21.12-17)
16Haya! Masɛ n ka diɛ ka sèren bɛ́ woe don ginin bii lɔn. Bɛ lɛ taman yii, ka yiri bɔ ka dinin li ka miɛ̃ bɛ́ yiri boe a din li lon, sɛnɛ, ka goã basiɛ̃-n ka zɛrɛkantoan bɛ́ lɔn, ka baran basaã kɔ wa. 17Ka yiri bɔ dɛ, a giala minin tá re ka kuĩ, ǹ wo ka kɔ kiri-kurulin la, bɛn nə ka duwəə ka sɛ̌n nɛ ǹ lɛsɔkɔn kionən ne. 18Masɛ tɔ taman yii, ǹ tá re woe ka nɛ tɔrɔ kɔsɔn pàãdɛnan laanka kiin yɔrɔ-a ka n bɔlɔ pɛ. Bɛ lɛ n die toɛ ka siére baa bɛn laanka ǹ minin yɔrɔ-a. 19Bɛ̀ ǹ tá woe ka nɛ kiri kuru ǹ bǎã nɛ, ka baran ǹ gɔ́ɔ̃ bii ka kaa da ǹ boo-n wa, ka baran ǹ gɔ́ɔ̃ bii ka a da ǹ gɔn dɔ-n wa. Ka doamaa bɛ́ nɛ ka boon mɛnɛn da, Lawa á re bɛa boon lɛn koe ka la a din biikoo kɛ lɛ li. 20A giala, ka bɛ́ re boo mɛn diɛ, bɛ bie re boe ka dinin ni wa, ka Di Lawa a Yiri Fu n die bɛa boon lɛn we ka lɛ-n.
21 #
Mar 13.12; Luk 21.16 Minin tá re ǹ dinin dɔɔ̃nɔn koe pàã gɛ̀ la, díin tá re zɛnɛɛ ǹ nɛnyaanan manɛ miɛ̃, nɛnyaanan tá re n bɔyɛɛ ǹ yɛ wolen li ǹ nə ǹ kɔ pàã gɛ̀ la. 22#Mat 24.9,13; Mar 13.13; Luk 21.17 Min din tumaa á die ka biɛ zɔ́ɔ masɛ tɔ taman yii. Sɛnɛ, bɛ̀ min mɛn si a ganaa yǎa a woo kaa a lɛ nyɔmiɛ̃ lɛ, Lawa á die bɛa dɛnaa kirisibiɛ. 23Bɛ̀ minin nə́ fuu nyaa ka nɛ kiwi mɛn nɛ, ka baa si ka wo kiwi kɔsɔ nɛ. Man pii ka nɛ, sonbore: Ka laan bɛ̀ ka Izirayeli kiwin kɛn tumaa kaa kɔn la ka nya, bɛ̀ masɛ Min a Nɛgiĩ wusoo má daa.
24 #
Luk 6.40; Zaã 13.16; 15.20 Kialandɛnaa ba boe la á liɛ a daraali-n wa, dí-nyali ba liɛ a mìinaa-n wa. 25#Mat 9.34; 12.24; Mar 3.22; Luk 11.15 A dàn nɛ kialandɛnaa nə n baa ka a mìilandɛnaa bɛ́ lɔn, dí-nyali nə n baa ka a mìinaa bɛ́ lɔn. Bɛ̀ n nə́ kɛdɛnaa din bíi mà *Sɛtaan, ǹ bɛ́ re tɔn mɛnɛn koe a kion minin ganaa bɛn tá baraa!
Nyɛ́ɛ doamaa bɛ́ nɛ a n baa min mɛn nɛ
(Luk 12.2-7)
26 #
Mar 4.22; Luk 8.17 Ka baran nyɛ́ɛ baa minbuiinin manɛ wa. Sii mɛn din tumaa bɛ́ durii ni, bɛ din tumaa á die boe kanaa. Sii mɛn din tumaa bɛ́ kuməə ne, bɛ yii á die n doɛ̃. 27Masɛ bɛ́ màn mɛn pii ka nɛ wɔlɔ tì li, ka pɛ wɔlɔ fúlu-a; ma bɛ́ màn mɛn pii ka nɛ dɔndɔɔn nɛ, ka pɛ sùnbaa ǹ bǎã nɛ, min tumaa ma. 28Min mɛnɛn bɛ́ boe la ǹ gɔ̀nɔn siĩ dɛ, ǹ nə́ ǹ ba boe la ǹ telenboen dɛ wa, ka baran nyɛ́ɛ baa bɛn man wa. Lawa mɛn bɛ́ boe la a gɔ̀nɔn siĩ laanka telenboen din tumaa naa kɔn-a a ǹ kaa bɔ̀nbaa ǹ tɛ gole ne, ka nyɛ́ɛ baa bɛ nɛ. 29Ka bie bàan bɔnboɛɛn màn paa siɛ̃ taman goon wa ya? Sɛnɛ, ǹ goon din ba mɛnɛɛ tán bɛ̀ ka Di Lawa ná a lɛ kɔ wa. 30Sɛnɛ, Lawa tá ka mìi ka din tumaa lɛ doɛ̃. 31Bɛ lɛ taman yii, ka baran nyɛ́ɛ baa wa, ka tá soɛ bàan bɔnboɛɛn gigiã-n Lawa yɔrɔ-a.
Golee Yezu li, ka piã ka Yezu ni
(Luk 12.8-9)
32Bɛ̀ min mɛn lɛ kɔ min tumaa yɔrɔ-a mà an masɛ wɔ lɛa, masɛ dɔ á die lɛ koe ma Di Lawa yɔrɔ-a máa bɛa dɛnaa n masɛ wɔ lɛa sonbore. 33#Tim2 2.12 Bɛ̀ min mɛn nə́ n piã ka masɛ nɛ min tumaa yɔrɔ-a, masɛ dɔ á die n piɛ̃ ka bɛa dɛnaa nɛ ma Di Lawa yɔrɔ-a.
Minin mɛ kɔn-a ǹ giala bɛ́ boe Yezu li lɔn
(Luk 12.51-53; 14.26-27)
34Ka nyan toa ka taasɛ ka masɛ n má daa ka là nyantoro-n kanaa wa. Ma bie má daa ka là nyantoro-n wa, gɔya sa nɛ má daa nɛ. 35#Mis 7.6 Man má daa nɛgiĩ laanka ǹ di kaa kɔn-a, nɛlɔ laanka ǹ dan nɛ, zuũ dan laanka ǹ manaa nɛ. 36Min a zɔ́ɔn man die goɛ̃ ka a din a kion minin ni.
37Min mɛn bɛ́ ǹ di hinlaa ǹ dan narɛ á la masɛ nɛ, bɛa dɛnaa doamaa bie ka masɛ-n wa; min mɛn bɛ́ a nɛgiĩ hinlaa a nɛlɔ narɛ á la masɛ nɛ, bɛa dɛnaa doamaa bie ka masɛ-n wa. 38Bɛ̀ min mɛn tá koe masɛ lɛ, bɛ̀ ǹ dɛnaa nɔmaa si a ganaa, haalɛ ta a giɛ̃ dere ǹ gɔn ganaa wa, bɛa dɛnaa doamaa bie ka masɛ-n wa. 39#Mat 16.25; Mar 8.35; Luk 9.24; 17.33; Zaã 12.25 Min mɛn bɛ́ giɛ li a n din nyin tamaa, bɛa dɛnaa wɔ á die bɔ̀n biɛ. Sɛnɛ, min mɛn nyin bɛ́ re bɔ̀n biɛ masɛ taman yii, bɛa dɛnaa á die a wɔ yii.
Yezu boo mɛn da saraa wɔ paǹ li
(Mar 9.41)
40 #
Mar 9.37; Luk 9.48; 10.16; Zaã 13.20 Bɛ̀ min mɛn nə́ ka kũ doɛ̃ bɛa dɛnaa na á masɛ kũ doɛ̃; bɛ̀ min mɛn masɛ kũ doɛ̃ bɛa dɛnaa na á masɛ a dia wole kũ doɛ̃. 41Bɛ̀ min mɛn nə́ Lawa a boo gii-dali kũ doɛ̃, a Lawa a boo gii diɛ lɛ a lɛa, bɛa dɛnaa á die Lawa a boo gii-dali a saraa yii. Bɛ̀ min mɛn nə́ min pepere kũ doɛ̃ a min peperebaa lɛ a lɛa, bɛa dɛnaa á die min pepere a saraa yii. 42Masɛ n pii ka nɛ, sonbore, bɛ̀ min mɛn nə́ mu nyantoto kɔ masɛ a kialandɛnan kɛn kiɛɛrɛdɛnaa mɛn la á mi, masɛ a kialandɛnaabaa lɛ taman yii, haalɛ ta paan yii goon ne, bɛa dɛnaa á die a saraa yii.
اکنون انتخاب شده:
Mat 10: SBPE2011
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
San Bible Protestant Edition © Bible Society of Burkina Faso, 2011.
