Asat 6
6
Laisiaayiak sapa ootegeluaki
1Kore eponunye looiteng'eni tee nenia perot, neichankarra Lyiaudi ooiro nkutuk ee Lgirriki o Lyiaudi ooiro nkutuk ee Lburania. Amu kore mperot pooki, naa keorokini ltung'ana ndaa, nejoito lolo ooiro nkutuk ee Lgirriki meichoritae aaitibiraki nkoilia enche ndaa. 2Neiturrurru ꞉loochi tomon oare lkulie ooiteng'eni pooki nejoki, <<Meiririkino tinikipal likoroto ee Lomon Supati le Nkai, eji payie kitum aatoriki ltung'ana ndaa. 3Naaku naa lalachera, entegelu taatua ntae lewa sapa liyielolo aajo keipida mbaa nebore Ltau Sinyati o ng'eno, likipik nkaik enche ele siaai. 4Kore iyioo naa ikintirrichaki nkomono o siaai le rerei le Nkai.>>
5Neiting'id ilo turrur pooki inia wolet. Negelu Sitepano, ltung'ani obore nkurukoto o Ltau Sinyati, o Pilipo o Porokoro o Nikanor o Timon o Parmenas o Nikolas oing'uaa lkerenket le Antiok, oibelekenye apa aaku le nkurukoto ee Lyiaudi. 6Neyau kulo tung'ana tekue lolo Kipaareta, neomonoki ꞉Lkipaareta ninche, neiteleki nkaik.
7Nebulaa rerei le Nkai oleng, nesioki lturrur loo looiteng'eni aaponunye te Yerusalem, neibung ꞉laitainok kumo la lasar inia kurukoto.
Eibung'aki Sitepano
8Kore apa Sitepano naa ltung'ani oiputa ꞉munyani o ngolon, neas mbaa kutuaa e nking'asia o nkitodolunoto kutuaa e nkitoo e Nkai taatua ltung'ana. 9Neatae apa Sinagogi nabo naji nee rrindiki oaatalakuaki. Netii inie ltung'ana ooing'uaa lkerenket le Kirene o le Alekisandiria o lolo ooing'uaa nkop e Kilikia o Asia. Neinyuototo lbata lenche aaichankarrare Sitepano. 10Kore eirorita Sitepano, nelakino ninche aaitachekinere ng'eno naata o Ltau Sinyati oidimie ninye meiroro, 11neroj lbata loo lpayiani metasapicho aajo, <<Ikitining'o iyioo Sitepano eirorita rerei adek Musa o Nkai.>> 12Neinyoyie lolo omon ltung'ana o lpayiani o laiteng'enak loo nkitanapat metogoroto, neibung Sitepano aaitirrichaki, neyau tekue nkiguana ee larikok loo Lyiaudi. 13Neitai ltung'ana metasapicho aajo, <<Kore ele tung'ani naa ikiata sipata nchere, mepal meiro mbaa nemeichiaakino e ana aji sinyati o nkitanapat e Nkai. 14Amu ikitining'o ninye ejo, <Kore ele Yeso le Nasaret naa kear ene ng'oji neitoki aibelekeny lkerreti oitarasaka apa ntae ꞉Musa.> >> 15Kore lolo pooki oowueni taatua inia kiguana, nekurraki nkonyek Sitepano, nedol nkomom enye etuwuana ne lmalaika.
اکنون انتخاب شده:
Asat 6: saq
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 2021, Bible Translation and Literacy