NA RUKUDA DA PA-PAHURUNGU 26
26
I Paulu ba na-kahiri wikina la hanggana i Ànggaripa
1I Ànggaripa napeka-nya i Paulu, “Nyumu pa-pahiangu-kau ka la pa-kahiri wikimu,” wànanya. Ka wulaku-nanyaka limana i Paulu ba nawunda-ya na pa-kahiri wàna wikina,
2“Tamu umbu Ànggaripa Ma-pangarangu! Nàhu wangu langatàka-manaka duku lai nyungga wànggu, ba peku wunda-nggunya na kahiri-nggu wikinggu jia pàku-yai la hanggamu nyumu Tamu umbu, na ruku kàla-dangga da tau Yahundi, 3ri - rihi nyumu bau pinya na uku hidana dàngu na nggoda nggàduku-na na tau Yahundi. Jiaya nu màla àru Tamu umbu kau patoru-nya la pa-patingi-nya na taranga-nggu.
4Mbuu ndàbada da tau Yahundi dapi-manya jàka nggikina na luringgu ba pabidi minika. Dapinya piti welingu ba bidi minika, luri weli-mangguka la honga banjaru wikinggu la Yeruhali. 5Mandai-maka ba dapingga nyungga. Dàngu jàka da-mbuhangu peku-mana nyuda la pa-hakahii-ngga nyungga, welingu la wunga-manaka duku ba kuluri hama tuna na tau Parihi ba kutundu-nja da kalaratu da marihi pa-jorutungu la anggama-ma nyuma. 6Tàka nàhu hi ku-ndolaku lai yiahu la pa-rapatu-ka jiaya ba kuwaiya na pa-ràndingu na-patura-na i Ala dàngu da boku la mangilu-ma. 7Jiaya na pa-ràndingu nuna-maka na panedi napada da hakambulu dàmbu kabihu banjaru Ihirailu, hi kiri lumu-danya i Ala rudungu lodu. Tàka jia pàkuyai na wainggunya nuna na pa-ràndingu, Tamu umbu ma-pangarangu, hi panjala wa biada-ngga da tau Yahundi. 8Nggikina da angu dedi tau Yahundi hi nda dawaiya i Ala ba na-paluri beliya na tau na mameti?
9Àmangu nyungga wikimbu kuwa-manyapa nuna ba ma - màtu palinggu ka ku-ndubaku wànya i Yehu welingu la Naharitu ba wànggu làti. 10Jia-mayaka nuna na pawànggu la Yeruhali. Ba kuwàngu huratu kuaha-da da ratu kapala, dadangu da tau ma-tuturu lai Ala papuhi-nggu la uma kapàtangu. Màlai ku-tundungu-mbu pa-patunju-ya ba pa-panggàna-nja hukungu meti. 11Pambirangu bia nyungga ba ku-pamayila-ha la uma bunggu - uma bungguru, ba pambana-ha ka da-kanduli-nya nuna na pawaida. Lalu mbana mbanaya na etinggu hanggangu lai nyuda, hi lupangu la hau parai - hau paraingu kulua-mbu pakeha-nja nyuda,” wàna.
I Paulu ba napeka-ya na paera-na
(Pphr. 9:1-19, 22:6-16)
12“Jia-mayaka nuna na pawuku-nggu hi kungàndi huratu kuaha welingu la ratu kapala ba kulaku la Ndamàhiku. 13Tàka nàhu la padua ànda, la tidu lodu, Tamu umbu ma-pangarangu, hi jia ita bianggunya na kajilaku welingu la awangu, na harii hipu-yapa na matalodu. Na kajilaku nuna na-tapanjiru winggiru-ngga dàngu na-winggiru-nja da karia-nggu. 14Pàha wàma hàla madua-ka la tana. Hàla rongu-nggu-nyaka lii mapanii dàngga la hilu Imbarani, ‘Hauluhu, Hauluhu! Nggikina nyumu hiu pa-mayila mànuka? Napa nyumu wiki ma-katiu, jàkau nutakungu la palawa-nya na pa-irungu-na Nyuna na pamirimu,’ wàna. 15Ka paàra-nggunyaka, ‘Ka nggamukau Miri?’ hi wànggunya. Tàka nahema i Miri, ‘Ka Nyunggadu Yehu na pa-mayila-mu. 16Hadangu-wa kau ndolaku! Hi ku-pajilikungu wikinggu lai nyumu na pawuku-nggu màta ka kuwotu-ya la palumu-ngga Nyungga wànggunggau. Màta kau bobaru-ya la tau hawiangu nggàraya na paita-mu la lodu nàhu rukunggu Nyungga#La lawiti ndai da manda pirada nda ningua kareuku tungu yia: rukunggu Nyungga. dàngu rukuna jàka nggàraya napa na pa-paitangu-kau la rehi na manàmu-nya. 17Napa Nyungga ku-pahàla-kau welingu la banjaru Ihirailu dàngu welingu la ba - banjaru nda Yahundi. Napa Nyungga ku-palewa-kau palua lai nyuda 18la pa-pabula-nja da matada, ka peku luhuda welingu la kapàtangu dàngu ka datama la maharii; ka peku pahàla-da welingu la limana i Kambàliku, ka na-kuaha-ha paraïna i Ala. Paraï ruku waidangga Nyungga napa da njalada pa-jàmangu-ha dàngu nyuda napa angu-daka na kabungguru-na i Ala na papindi,’ wànangga,” wàna.
I Paulu ba na-palara-nya na paràma-na
19“Jia-duya nu, Tamu umbu Ànggaripa, nyungga duku ku-pamukarungu mànuma la pa-manundu la paita-nggu welingu lai Ala. 20Nyungga ku-paailulu-maanja ba kupeka-nja da tau, ba da-pambelingu-ma bàdi nyuda welingu la njalada dàngu ka da-pajàmangu wikida lai Ala màlai ka da-paitangu la lurida nyuda ba tau ma-pambelingu-haka welingu la njalada. Nyungga ku-bobaru-ya nuna la kawunga-na la Ndamàhiku, hàla la Yeruhali dàngu la nggubulu Yundia, dàngu la hongada da tau nda Yahundi. 21Lumuna nuna-duka da tau Yahundi hi dayàpa-ka la Umana i Miri dàngu hi da-patikingu pa-pameti-ka. 22Ba tuna lundu la rehi nàhu mangga-nangga padua paraïna i Ala, hi lupa peku ndolaku-nggu lai yiahu la pa-hakahii-nya la tau mbuu ndàbana – la ma-bokulu la makudu. Nggàraya na papanii-nggu yiana nda hili hau-aya welingu na pambàda nyurada da wunangu dàngu i Muha; 23nu na Hanganji Pa-mànangu na paràndi-na i Ala ba lupangu bàdi na-mayila, dàngu ba jiaya Nyuna na ma-kawunga hadangu beli ba nahàla pameti; nu ba tuna nu hi pekuna ba na-pakada-nya na harii – nu na mànangu – ka la tau Yahundi-kai màlambui la tau nda Yahundi,” hi wàna.
24Ba talànga wunda-nanyaka nu i Paulu na pa-kahiri wàna wikina, wara-nanyaka i Petuhu, “Katoba-munyaka na Paulu! Na pingumu na malalu danguna, jia-yaka na ma-pakatoba-kau!” wànanya. 25Tàka nahema i Paulu, “Nda katoba-anggunya ma-pangarangu. Da pulungu da pawunda-nggu deningu-mada dàngu luhuna welingu la kanandingu hàmu-manggu. 26Nyuna wiki i Tamu umbu Ànggaripa napi hàmu-manja da rukuda nuda. Jia-mayaka nuna hi kutoru mbeni pa-kareuku pa-ailulungu la hanggana nyuna i Tamu umbu. Ba kupi hàmu-manya welingu nudaka nda ningua panda pina i Tamu umbu, nadu nuda mbuu ndàbada nda ningua manjadi la ma-kawiningu. 27Tamu umbu Ànggaripa Ma-pangarangu, màla muwaiha wàngguka da papanii-da da wunangu? Kupi-manya bau waiha nyumu Tamu umbu!” wàna.
28Hàla i Ànggaripa napanii-nya i Paulu, “Bau rekiya namuda wàmu bia la pa-panjadi-ka nyungga tau Karitu la rehi na ma-dànggitu yiana?” wàna. 29Nahema i Paulu, “La rehi na ma-dànggitu-kai jàka ndia la rehi mamalai-kai, hamayangu-manggunya duku lai Ala ka pekuna nyumu Tamu umbu hamanai yiada mbuu ndàbada da umbu - umbu da marongu-ka nyungga la lodu nàhu, ka dahama-ngga nyungga wànggu – hinggilu-da da nggili bàhi yiada nyuna ndia!” hi wàna.
30Tunaka nu i Tamu umbu hanganji, na nggumbunuru dàngu i Mberiniki hamanai mbuu ndàbada hawiangu hadangu-danyaka. 31Ba ninjaka la hambeli, panii-danyaka dàngga anguda, “Na tau nina nda nggàra ndoku hau paruku-na na ràka pa-hukungu wànguya hukungu meti jàka ndia patama la uma kapàtangu,” wàda. 32Hàla i Ànggaripa hi napanii-nya i Petuhu, “Na tau nina peku-mana jàka pahàla-ya, làti jàka nda na-karuhi katimba-nya na palakara-na la rapatu Hanganji Bokulu,” wàna.
اکنون انتخاب شده:
NA RUKUDA DA PA-PAHURUNGU 26: KAM
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
@LAI 1995 Indonesian Bible Society (Lembaga Alkitab Indonesia)