ZING'ANO 4
4
Vokonyi vwo Vogeri
1Avana vange, muhuliri aga baba winyu amwigizaa. Hulirizi na mulava ni limanyiriza. 2Gamwigizaa gaveeye malahi, muduukana mugizulizi goosi. 3Lwa ndaali ningikiri muyaayi musoleri, mwana mudelwa ku vivuli vange, 4baba wange yanzigiza nambolera, “Yizuliza gambolaa na utagivilira mba. Okole kuli ngovoleeye na ulahindira. 5Onyoore ovogeri kandi limanya liu musi linyingi, utivilira anoho kusuura gambolaa mba. 6Utaleka ovogeri kigira vulakulinda, uvuyaanze kandi vulakukinga 7konyoora ovogeri ni kindu chi kivuni ligali cha unyala kokora. Kindi choosi cha onyoora, yenyeleriza vogeri vwu musi. 8Yaanza ovogeri na vulakokola kuva munene ligali. Uvukumbelerizi na vulakuleetela luyali. 9Vulava kuivi itaji yu vukumi.”
10Mwana wange, mbulirizaa. Uhuliri ligali gangovoleraa, na ulahindira. 11Mali kukwigiza ovogeri ni liiva lilahi lio komenya. 12Sihalavaho ni kikwigalira munzira yooyo niiva ulagenda novogeri mba, kandi siulikigitala lwa unyagula mba. 13Wizulizi vuli ing'inga cha umali kwiga. Vogeri vuvwo ni limenya liilio, uvulindi vulahi ligali. 14Utazia ha vandu vadamanu vazizaa mba, utalonda miima jaavo ju vuchamu mba. 15Utakola ndio mba! Welehe ku vudamanu! Uvusuuli ma uzie kunzira yooyo. 16Vandu vachamu sivanyala kogona nivatakoli kindu kidamanu mba. Vagona nivahenza kuduuka lwa vasaliriza mundu. 17Uvuchamu kandi vunuuri ni kuli vukima na mazi kuvo.
18Inzira ya valungi vagenda ku eveeye kuli litongaa lie liuva, enyooraa vulavu vuli ing'inga kuduuka lwu mbasu gwakaa. 19Inzira ya vachamu, eveeye kisundi kuli vudiku. Vagwiza, navuzwa sivalola ha vikigatiyi mba.
20Mwana wange huliriza gambolaa. Hulira makuva gange. 21Utagaleka gatuli kuive mba. Ugizulizi, ma ugaviiki mu mwoyo gugwo. 22Galahaana livamwoyo no vulamu ku oyo ugahuliraa. 23Henza kuli uganaganaa. Livamwoyo liilio lilombwaa ni zing'anagani zizio. 24Utavoola kindu kitaveeye chagiligali mba. Utahambana navovovehi mba, kandi makuva guvuchamu mba. 25Henza imbiri muvulungi novusuuvirifu vwa giligali, utiviika muzisoni mba. 26Lohiza vulahi viunyala kokora, na choosi cha okola kilava kilahi. 27Welehe kuvudamanu kandi ogende vulungi. Utazia kika kilala ichova winzira inungi mba.
©Bible Society of Kenya, 2019