JOSHUA 12
12
Avami va Musa yaguuta
1Avandu va Isiraeli vaali nivaguuti kivala keveeye Ivugwi wu mugera gwa Jorodani, kutura mu livona lia Arinoni kuduuka mu livona lia Jorodani kandi kuduuka kolovega lwa ivaale ha kiguru cha Herimoni. Vaguuta avami vaviri. 2Mulala kuvo yaali Sihoni, mwami wa vandu va Amori uwamihaa ha Heshiboni. Uvwami vwivwe vwameeda ku inusu ya Gileadi; kutura Aroeri (kundulu mu livona lia Arinoni) kandi lidaala liveeye hagati hi livona yilio, kali kuduuka ku mugera gwa Jaboku, ulwako lwa vandu va Amoni; 3vwavalizwa harara na Livona lia Jorodani kutura kunyanza ya Galilaya Isavaalu wa Bezi-Yeshimozi liveeye Ivugwi wi Inyanza yi jumbi kandi kuzizagilira kuzia kolovega lwi kiguru cha Pisiga kitangiraa.
4Vaguuta kandi mwami Ogu wa Bashani, uwaali wu kumaliriza ku vandu va Refaimu; yamiha ha Ashitarozi na Edirei. 5Uvwami vwivwe vwavalizwa harara ni kiguru cha Herimoni, Saleka, kandi Bashani yoosi kuduuka ku zinzako zia Geshuru na Maaka, kandi inusu ya Gileadi kuduuka ku kivala chu Mwami Sihoni wa Heshiboni.
6Avami vaviri yava Musa yavaguuta harara na vandu va Isiraeli. Musa, mutumikiri wa Yahova, yahaana kivala chavo ku zihiiri zia Rubeni, Gadi kandi ku inusu ya Manase, kuva miandu jaavo.
Avami va Joshua yaguuta
7Joshua harara na vandu va Isiraeli vaguuta avami vosi mu kivala keveeye imadioli wu mugera gwa Jorodani, kutura Baali Gadi mu livona lia Lebanoni, kuduuka ku kiguru cha Halaki kolovega lwi isavaalu ahimbi Edomu. Joshua yagavula kivala yiki choosi hagati hi zihiiri kandi navaha kivala yiki kuva miandu jaavo mihiga ni mihiga.
8Kedonye yiki chaali harara ni kivala chi vigulu, imadioli wi kiguru kitangiraa, kivanda cha Jorodani harara ni vigulu viacho, visulungutu vie ivugwi, kandi kivala chumu kolovega lwi isavaalu. Kivala yiki chaali cha vandu va Hiti Amori, Kanaani Perezi, Hivi, na Jebusi. 9Avandu va Isiraeli vaguuta avami va madaala yaga: Jeriko, Ayi ahimbi Bezeli, 10Jerusalemi, Heburoni, 11Jaramuzi, Lakishi, 12Egiloni, Gezeri, 13Debiri, Gedari, 14Horima, Aradi, 15Libuna, Adulamu, 16Makeda, Bezeli, 17Tapua, Heferi, 18Afeki, Lasharoni, 19Madoni, Hazori, 20Shimuroni-Meroni, Akishafu, 21Tanaki, Megido 22Kedeshi, Jokineamu, mu Karimeli, 23Dori ku lujinga lwinyanza, Goimu mu Galilaya, 24kandi Tiriza. Avami vosi harara vaali salasini na moja.
©Bible Society of Kenya, 2019