YOSWA 5
5
1Awo bakabaka bonna ab'Abaamori abaali ku ludda lwa Yorudaani olw'ebugwanjuba ne bakabaka ab'Abakanaani abaali ku lubalama lw'Ennyanja Eyaawakati, bwe baawulira nga Mukama yakaliza amazzi ga Yorudaani okutuusa Abayisirayeli lwe baamala okusomoka, ne batya nnyo, ne baggwaamu amaanyi olw'Abayisirayeli.
Okukomolebwa e Gilugaali
2Awo Mukama n'agamba Yoswa nti: “Kola obwambe obw'amayinja, okomole Abayisirayeli abo abatakomolebwanga.” 3Yoswa n'akola nga Mukama bwe yamulagira, n'akomola Abayisirayeli ku lusozi oluyitibwa olw'Okukomola. 4-6Yoswa yabakomola lwa nsonga. Weewaawo Abayisirayeli okuva e Misiri abasajja bonna baali bakomole. Naye mu bbanga ery'emyaka amakumi ana, Abayisirayeli gye baatambula mu ddungu, abaana ab'obulenzi tebaakomolebwanga. N'ekirala, ebbanga eryo we lyaggweerako, abasajja bonna abaali basobola okulwana olutalo we baaviira mu Misiri, baali bafudde baweddewo, kubanga baali bajeemedde Mukama. Abo Mukama yalayira obutabaganya kulaba ku nsi ngimu era ngagga gye yasuubiza bajjajjaabwe.#Laba ne Kubal 14:28-35 7Batabani ba bano tebaali bakomole. Abo Yoswa be yakomola.
8Okukomolebwa bwe kwaggwa, eggwanga lyonna ne lisigala mu lusiisira, abakomole ne bamala okuwona. 9Mukama n'agamba Yoswa nti: “Olwaleero mbaggyeeko okuswala kwe mwalimu e Misiri.” Ekifo ekyo kyekyava kiyitibwa Gilugaali#5:9 Gilugaali: Erinnya eryo livuga ng'ekigambo ky'Olwebureeyi ekitegeeza “Okuggyawo.” ne kaakano.
10Abayisirayeli bwe baali bakyasiisidde e Gilugaali mu lusenyi olw'e Yeriko, ne balya Embaga Ejjuukirirwako Okuyitako, mu kawungeezi k'olunaku lw'omwezi olw'ekkumi n'ennya.#Laba ne Kuv 12:1-13 11Olunaku olwaddirira, lwe baasookerako okulya emmere gye baalima mu nsi y'e Kanaani: emmere ey'empeke ensiike n'emigaati egitazimbulukusiddwa. 12Olwo ne mannu n'erekera awo okugwa, Abayisirayeli ne bataddayo kugifuna. Okuva olwo ne balyanga emmere erimwa mu nsi y'e Kanaani.#Laba ne Kuv 16:35
Yoswa n'omusajja ow'ekitala
13Yoswa bwe yali okumpi ne Yeriko, n'alaba omusajja ayimiridde mu maaso ge, ng'akutte ekitala ekisowole. Yoswa n'amusemberera, n'amubuuza nti: “Oli omu ku ffe oba oli omu ku balabe baffe?”
14Oli n'addamu nti: “Nedda; naye nze mukulu w'eggye lya Mukama. Kaakano ntuuse.” Yoswa n'avuunama mu maaso ge n'asinza. N'agamba nti: “Mukama wange, ndi muweereza wo, kiki ky'oyagala nkole?”
15Omukulu w'eggye lya Mukama n'agamba Yoswa nti: “Yambulamu engatto mu bigere byo, kubanga ekifo ky'oyimiriddemu kitukuvu.” Yoswa n'akola bw'atyo.
Luganda DC Bible © Bible Society of Uganda, 2003.