TAAGA LEA 2
2
Ko te poto e haofaki mai te kovi
1Oi toku foha, kapau e ke taofi aku palalau,
Pea kapau e ke taupau aku pelesepeto ia koe,
2Kapau e ke ako tou taliga ke tokaga ki te poto,
Pea kapau e ke peluki tou loto ki te atamai;
3Io, kapau e ke kole te poto,
Pea kapau e kalaga tou leo ki te atamai,
4Kapau e ke kumi te poto o hage ko te paaga,
Kapau e ke tuli ia ia o hage ko he koloa fakafufu,
5Pea e ke mahino anai ki te mataku ki te Eteleno,
Pea e ke mau anai te iloilo o te Atua.
6Koteuhi e foaki e te Eteleno te poto;
E hau mai tona gutu te iloilo mo te atamai;
7E ina taupau te fakamauli ki te u tagata maonioni,
Ko he paletau aia kia natou ae e haele i te agatonu.
8E ina tauhi te u ala o te faitotonu,
Io, e ina taupau te ala o tana kau agatonu.
9Pea e ke mahino anai ki te faitotonu, mo te agatonu,
Mo te loto hako, mo te u ala fuli ae e ina taki ki te lelei.
10Koteuhi e hau anai te poto ki tou loto,
Pea e fai anai e te iloilo ni mealelei ki tou laumalie;
11E leoleo anai ia koe e te fakakaukau,
E taupau anai ia koe e te atamai,
12Ke haofaki ia koe i te ala o te kovi,
I te tagata ae e ina fai ni palalau kovi,
13Ia natou ae e natou siaki te u ala o te mooni
O tupu ke natou haele i ni ala fakapouli,
14Ae e fiafia i te fai o te kovi,
Ae e mau tonatou fiafia i te agakovi,
15Ae e mulimuli i ni ala o te kaka,
Ae e haele i ni ala pikopiko;
16Ke haofaki ia koe mai te fafine matapule,
Mai te fafine matapule ae e ina fai ni palalau fakanekeneke,
17Ae e ina siaki tona uluaki ofaaga,
Pea e ina galoi te hai o tona Atua;
18Koteuhi e malee tona fale ki te mate,
Pea e alu tona ala ki te fale o te kau mate:
19E mole he tahi ia natou ae e olo kia ia e toe liliu mai,
Pea e ina toe mau te u ala o te mauli.
20E ke haele anai i te ala o te u tagata agalelei,
E ke taupau anai te u ala o te kau agatonu.
21Koteuhi e nonofo anai te kau agatonu i te fenua,
Pea e nonofo anai i ai te kau haohaoa;
22Kae e motuhi anai te kau agahala mai te fenua,
E taaki anai te kau agakovi mai ai.
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland