Hosiya 2
2
1Mie ḅụ ọmịnị ọmịna pembema Izirẹlịapụ ma sịịn, Ami#2.1 Ami fiearị ye, Ị̀ Atomi na Ruhama#2.1 Ruhama fiearị ye, Ọkụrụkụrụ nyana pịrị tẹẹ na.
KỊNỊNYANAḄỌ Ḅe Ama-mẹnjị Goma Kẹ Izirẹlị Na Tọmam
2Ị̀ awọmẹ, ọmịnị ọmịna iyingiḅọ na ẹkwẹnmaa — karakaraye árị ḅarị jen kẹ ị̀ ta-a, tẹ yẹrị pịkị ḅarị jen kẹ á di-a sọ. Ọmịnị árị na ẹkwẹnma tẹ árị á sẹfị na ama-mẹnjị na ḅụ ḅara-siin. 3Á ḍụkụ-a ḅẹḅẹ, àrị á paụma fama tẹ árị ini árị iyi ene mẹ ḅụ á sime-ḅara sime ḅa. Àrị á mịẹ tẹ árị ịkpa kịka ḅa, tẹ á minji-pọkọtarị ḅụ fịị ḅa. 4Àrị ọkụrụkụrụ nyana árị awọmẹ pịrị ḅịa, ini ḅụụ-jịrị-jịrị-a sẹfị-ẹrẹḅọ awọmẹ ẹrẹsị. 5Ịna iyingiḅọ ḅioḅẹngbọ-kẹ-sịrẹrẹ-niḅi-a ḅara sime tẹ tọrụ-tuu ḅụ in furam. Árị mẹẹ, “Àrị ị̀ ḅẹlẹmapụ ma ḍuka-mu ḅa, anie fịye na minji na, oḅoku-dee-ḅịtẹ na, ferefere-ḅịtẹ na, pulo na iru na kẹ ị̀ pịrịarị apụ ma.”
6Mie ḅụ à nangị asịn kẹ á gbori-ikelema ḅa, pịkị ḍụḅarị onu nama árị etela kiki ḅa. 7Á mangị á ḅẹlẹmapụ ma ḍuka-mu ḅa, kụma árị inetẹ ịn la ḅịa. Árị ịn ḍọkị ḅa, kụma árị ịn ḍọkị ẹrị ḅịa. Anịtẹso á ḅẹẹ ḅa, “À pịkịma-so ị̀ tarị diḅọ ḍọkụma-mu ḅa — anị sakị ḅụ ye ị̀nịna iḅi mịọkụ nẹngịm.”
8Gbala-gbala á minini ḍụkụ-a mịnẹ yẹrị anie mgbọlị-fịye mẹ na, iru mẹ na, olivu-olo mẹ na, seleḅa mẹ na, golu mẹ na kẹ á pịrị tẹ á kẹ mu sunsin Balị pịrị ḅọ ḅee. 9Mie ḅụ fịye-soku sakị ḅụ, àrị à kẹ á pịrị mgbọlị-fịye mẹ na, iru mẹ na, oḅoku-dee-ḅịtẹ mẹ na, ferefere-ḅịtẹ mẹ na tẹ á kẹ á ḅụụ gbaịn-arị aị ma ọkị ḅa. 10Á ḅẹlẹmapụ ma tọrọkọ ḅụ àrị á paụma ḅa, tẹ gbọrụḅọ-sọ inetẹ ị̀ kụrọ ḅụ á ḅọrọma ḅịa. 11À mịẹ tẹ árị alalị mamgba kuno ḅa — kụra-kụra na akalụ-akalụ na alalị ma na, Ịnyọsara-Ene ma na, fịafịa-akobiri ma na. 12Àrị á girepu-aḍụọ ma na figi-aḍụọ ma na guluguluma ḅa, anie á ḅẹlẹmapụ ma kẹ á mẹnjị ịn pịrị fịrị ḅụ á pịrị aị ma. Àrị á girepu-aḍụọ ma na figi-aḍụọ ma na kẹ piri-piri-piri sọma ḅa, tẹ piri-ḅio-ḅẹ anama arị guluguluma ḅa. 13À fomu-ḅara kẹ á pịrị ḅa árị ị̀ kẹ ḅioḅọrọma asakị ma gotẹ, anie á dọkịma-kụnụaị dọkịma Balị pịrị tẹ ye-ḅiri bụlụ-bụlụma tẹ mangị á ḅẹlẹmapụ ḍuka-ḍuka-mu asakị ma. Yẹrị, KỊNỊNYANAḄỌ ḅe, ọkọ ḍukom.
KỊNỊNYANAḄỌ Ḅe Nyana Ori Atomi Pịrị Ḅẹlẹma
14Mie ḅụ àrị á kẹ so ịkpa mẹ ḅio mu ḅa. Anịanga ḅụ à ḅẹlẹma ẹkwẹn kọn tẹ kẹ á nyana ọkị ị̀ ḅụụ pịrị ḅa. 15#Jọs 7.24-26Àrị á nyana sime girepu-aḍụọ ma kẹ siin á pịrị ḅa, tẹ Ḅụụ-fụkamarị Tụndụ-suku mẹ kẹ Ḅiokpọmarị Ḅọkọ sọma ḅa. Á minini ị̀ pịrị ḅa anịanga ḅụ, anie árị iriawọ sakị á mịẹ ḅara mẹ, árị Ijiputi ḅụ paka-ḅo sakị. 16Anịtẹso á pịkị siin gbọrụ sakị kẹ “ì di” kẹ ị̀ sịn ḅa — á ḅarị jen kẹ “ị̀ Balịị” kẹ ị̀ sịn ḅịa. 17À ḍụkụ tẹ á ḅarị jen kẹ ḅịḅị kẹ Balị ẹrẹ go ḅịa.
18Anị ene mẹ ḅụ, à piri-ḅio-ḅẹ anama mamgba na feni mamgba na ọḅọkụ fị ḅa, mịẹtẹ in ye kẹ ị̀ atomi lama ḅịa ḅara. À pịkị amakiri mẹ ḅụ ọmụgbin-aị mamgba ḅelema ḅa, okologie mamgba na iboli ma na, tẹ mịẹ tẹ ị̀ atomi dein na kpaịnma na ḅụ anga ḅa. 19Izirẹlị, àrị ị́ kẹ ị̀ ta mịẹ ḅa. À karakara na ḅioḅẹngbọ-kẹ-sịrẹrẹ-niḅi ḅara na sime ḅa. À kuno-kuno-a ḅẹlẹma na ọkụrụkụrụ na nyana ị́ pịrị ḅa, tẹ í sime ị̀ pịrị mu ḅẹẹ-sakị ḅẹẹ-sakị la ḅa. 20Àrị à minini ye mịẹ tẹ ị́ mịẹ tẹ í sime ị̀ pịrị ḅa, tẹ ị́ mịẹ tẹ ị́ KỊNỊNYANAḄỌ ḅara kẹ ị̀ ọkị ḅa.
21Anị ene mẹ ḅụ, yẹrị KỊNỊNYANAḄỌ ḅe tọn So-tọrụ mẹ pịrị tẹ anị Kiri mẹ ḅụ eene koroma ḅa, 22tẹ Kiri mẹ mgbọlị-fịye na, iru na, pulo na pakama Jẹzirili pịrị ḅa. 23#Rom 9.25; 1 Pit 2.10À mịẹ tẹ ị̀ atomi ịna amakiri mẹ ḅụ sime tẹ lolo ḅa. Àrị ọkụrụkụrụ kẹ tomi kẹ “Ọkụrụkụrụ Nyana-a” sịn apụ ma ḍie ḅa, tẹ ini ma tẹ tomi kẹ “Ị̀ Atomi-a” sịn apụ ma ḅụ, à ḅẹẹ ḅa, “Ọmịnị ị̀ atomi” tẹ ịn pakịrị ḅa, “Ị́yẹrị wamịna Tamụnọ.”
اکنون انتخاب شده:
Hosiya 2: KBTP
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
(C) The Bible Society of Nigeria