Engaado 5
5
Ohulabula hudiira hu bucheke
1Mwaana waange, tekaanga ohutwi owulira amakesi kaange,
tekaanga ohutwi, mani wehaliirisa ohumanya hwaange;
2ao mani ochia ohumanya engeri yohweeyiriramo bulai,
haandi emboosi chao chekeeseenge chiti olimo amakesi.
3Olwohuba omunwa kw'omucheke kudoonya obuuhi,
haandi emboosi chi alomaloma nyirifu ohuhiraho amafuta k'omuseituuni;
4nae muhumaliiriha, ahuleha mubuchuuni buhahaata koti oyo ohoombere hu mululuusa,
haandi obuchuuni nibubitiriire.
5Ahwiihirisa aasi mu hufwa;
haandi engira yi ahutaaho yihuyira emakoombe.
6Haba sadoong'a hu ngira y'obulamu;
yayitulaho hale nataamanyire.
7Bulaanu eng'we baana baange, wulireenge bi mboola,
haandi mutalehanaanga neende bi mboolere.
8Weyaabeenge omuhasi mucheke,
haandi otasudaangaho aambi neende enyuumba yae;
9ataali ao abaandu baandi bachia ohuyira oluyaali lwao
mani abaandu baalaba bachia ohuhwiita n'osisiiri omuyere.
10Eee, bawalukeenda bachia ohuyira myaandu kyao,
mani ebiindu bi wahalaabanira bicha ohuba eby'omuundu wuundi.
11Mani olifwa niweyendehereere,
nong'ayire nodoong'ere amakuumba koong'ene.
12Luunyuma oliboola oti, “Lwasiina ndahaya ohukerakirwa,
mani ndaalekeeresa ohwoolobisibwa!
13Haba sindawuliraanga abeekesa baange
oba ndatekeeresaanga abakeraki baange.
14Mani ndaba aambi ohwenyoola ni ndiirirwe esoni
mu lwichuule lw'abaandu.”
15Omuhasi wao ali koti esulo y'amaachi malai,
amaachi kahulukusa ak'omwaalo kwao kweene.
16Lwasiina osalaania obumwo bwao eno neende era,
omuhula kwao nikuhulukusira hu ngira?
17Amaachi komu sebere yao kabeenge akao weeng'ene,
nae ataali akao neende abateende.
18Leha esebere yao yibe ey'ehabi,
haandi osangaaleenge neende omuhasi yi wadeehya n'oli omuraaga,
19omulai haandi ow'oluyaali koti emboongo.
Leha ahusaangaseenge endaalo ch'obulamu bwao choosi,
buli ludaalo osaangalireenge mu budya bwae. 20Mwaana waange, lwasiina osaangaliraanga omuhasi mucheke
mani waakwa mu sirifu sya malaaya?
21Olwohuba Omwaami abona buli siindu sy'ohola, yehaliirisa buli ngira yodiira. 22Ebyonoono by'omuundu nibyo omuteego kwae, mani yayambisa mu luhaanda lw'ebibi byae.
23Afwa olwohuba nandawulira niye,
haandi olwohuba obusiru bwae buungi, bwahamuyire mu ng'ani.
©Bible Society of Kenya, 2019
©Bible Society of Uganda, 2019