Engaado 4
4
Engaanga yiri mu Makesi
1Eng'we abaana, wulireenge engeraka ya laata yeeng'we,
tekeereseenge, mani munyale ohunyoolaanga ohumanya.
2Olwohuba ebiindu bi mbaberesa bilai nibyo:
otalehanaanga neende ebiindu bi hweekesa.
3Nindali nisisiiri omusyaani muraaga ni ndi neende laata yaange,
ni ndi omuraaga, omuheerwa mu moni wa maama,
4laata yanjekesa, mani n'aboola ati,
“Yichulisaanga ebiindu bi ndi ohuhuboolera, mani otabiibiriraanga;
liindaanga ebilagiro byaange, mani ochia ohuyiindira.
5Nyoola amakesi; nyoola uhumanya
6Otalehanaanga neende amakesi, kachia ohuhuliindaanga;
kadaheenge, mani kachia ohuhuliindanga mu muleembe.
7Ohunyoola amakesi nisyo esiindu sihuluundu muno,
haandi buli siindu siindi syonyoola, bechaanga n'ohumanya.
8Dahaanga amakesi, mani kahahuhole ow'oluyaali;
n'okomiiriraho, kahahwiisemo oluyaali.
9Amakesi niko akachia ohuba ekofia yao y'obutuki y'oluyaali;
ekofia y'obutuki y'oluyaali yimilamilana.”
10Mwaana waange, wulira, haandi fukiirira emboosi chaange,
hu onyale ohuyiindira emyaaka miingi.
11Hwekeese engira y'amakesi;
hwekeese engira ch'obuluungifu.
12Sibulao esiindu syahahwehiinge mu moni wao n'okeenda;
haandi niwiiruha, haba siwahadandaamireenge.
13Yomiiriraanga muno hu ngeraka yonyoola;
yiliindeenge bulai, olwohuba eyo niyo obulamu bwao.
14Otadiiraanga engira y'abahola-mbi,
haandi otaloondaanga ebiholwa by'abaandu babi.
15Yihaye, haandi otayibitiraangaho;
yebwaabeenge, mani odiira engira yao wawaao.
16Olwohuba abahola-mbi haba sibanyala ohweyalisa nibataaholere esibi;
endoolo haba sichibayira nibataholere omuundu esibi.
17Olwohuba ohuhola esibi nihwo ebyohulya byaabwe
haandi obwaalaba nibwo ebyohung'wa byaabwe.
18Nae engira y'omuluungifu yaaduha koti omubasu kw'esanya,
okwemeeda ohwaaduha ohwoola esideete.
19Engira y'ababi yiri koti esiirima sya titititi;
haba sibabona esiindu si beegumulaho.
20Mwaana waange, tekeeresaanga emboosi chaange;
wuliraanga bulai ebiindu bi huboolera.
21Otalehanaanga nabyo;
haandi biliindeenge mu mwooyo kwao.
22Olwohuba obinyoola, bi muberesa obulamu,
haandi biwonia obulwae bwohu mubiri kwae.
23Wehaliiriseenge embaasa yao;
olwohuba ebibaaso byao nibyo ebituka obulamu bwao.
24Otalomalomaanga eby'obubacha,
haandi webwabeenge ebiindu bidoondobania abaasyo.
25Tingalaanga neende obweesikwa ebiindu byomu moni,
haandi otadokanaanga.
26 #
Abaib 12:13. Buli ludaalo, baliiriraanga bulai ebiindu bi ohola,
mani buli siindu sy'ohola sinabecheenge esyadyeeri.
27Otadokaanaanga eno neende era;
tulaanga hu ngira mbi.
©Bible Society of Kenya, 2019
©Bible Society of Uganda, 2019