Yosua 17
17
Manaase sy'emuumbo
1Esituundu siindi ohutula hu loba lyali emuumbo wa Yorodaani lyali nilyabereswa amadaala kaandi ak'abeechuhulu ohutula hu Manaase omwaana wa Yosefu muhuluundu. Makiri, laatang'ene Gileadi, yali omwaana wa Manaase muhuluundu haandi omulwaani w'ebiita mululu, mani Gileadi neende Bbasani, ebyali ebukwe wa Yorodaani, byali nibyamubereswa. 2Nae eloba lyali emuumbo wa Yorodaani lyali nilyabereswa amadaala kaandi kadoong'ereyo aka Manaase kano kati: Abbieseeri, Heleki, Asirieli, Sekemu, Hefeeri, neende Semiida. Bano bati nibo abali abeechuhulu b'esisaacha ba Manaase omwaana wa Yosefu, haandi nibo abalichiingi abahoongo b'amaadala ako. 3Selofehaadi, omwaana wa Manaase, haba siyaliho neende omwaana musyaani daawe, nae abahaana boong'ene. Mani ameeta kaabwe kali kano kati, Mahila, Nowa, Hogila, Milika, neende Tirisa. 4#Hub 27:1-7. Mani bano boosi bachia eyiri Eliasaari omulaamisi haandi neende eyiri Yosua omwaana wa Nuuni, haandi neende eyiri abeemirisi, mani nibamala nibaboola bati, “Omwaami yali niyalagira Musa ohuberesa efwe, haandi neende abeeho beefwe b'esisaacha, esituundu sy'eloba fwesi hubeeho neende esyeefwe hu bweefwe.” Mani, koti sa lu Omwaami yali n'alagiire, bosi babereswaho eloba alala neende abeeho baabwe b'esisaacha bosi. 5Mani sino nisyo esyakera Manaase n'anyoola emikabo ehumi ohumeeda hu Gileadi neende Bbasani hu lwaande lw'ebukwe lwa Yorodaani, 6koti lu beechuhulu bae b'esihasi haandi neende ab'esisaacha bali boosi alala nibabereeswe eloba. Mani eloba lya Gileadi lyabereswa abeechuhulu baandi badoong'ereyo aba Manaase.
7Esituundu sy'eloba lyali elya Manaase, lyali lyaira ohutulira hu Aseri, ohwoolera elalira hu Mikimetati, ebukwe wa Sekemu. Mani olwaaho lwali nilwiihirira emwaalo ohuyiriramo neende abaandu ba Etapua. 8Mani eloba lyali nilyebodoohania Tapua, lyali elya Manaase, nae esiko sya Tapua, esyali hu lwaaho, syali nisiri esy'abeechuhulu ba Efuraimu. 9Olwaaho luno bulaanu lweemao haandi lweehirira lwoola hu haalo Kaana. Mani ebiko ebyali emwaalo w'ahaalo aho, byali nibiri ebya Efuraimu, kata neende nibyali nibiri mu situundu sy'eloba lya Manaase. Olwaaho lwa Manaase lwali niluloondehana alala neende olwaande lw'emukulu olw'ahaalo aho, haandi nilwaakamira hu Nyaanja Hoongo ya Mediterania bweene. 10Efuraimu yali naali emwaalo, nae Manaase yali naali emukulu, nae Enyaanja Hoongo ya Mediterania niyihola koti olwaaho lwaabwe lw'emuumbo. Aseri nasyo syali nisiri emukulu w'emuumbo, nae Yisakari nisiri emukulu w'ebukwe. 11Nae muukatikaati w'ebituundu by'eloba lya Yisakari neende Aseri, Manaase yali naalimo neende Bbeeti Saani neende Ibbuleamu, alala neende ebiko bidiidi-diidi byali nibibyebodoohaanie, alala neende Doori (esyali nisiri hu lwaasi lw'enyaanja bweene), Endoori, Tanaaki, Megido, haandi alala neende ebiko bidiidi-diidi byali nibibyebodoohaanie. 12#Bak 1:27,28.Abaandu ba Manaase, kata katyo, haba sibali nibanyala ohwiirusa ohumaliramo elalira abaandu bali nibamenyaanga mu biko ebyo daawe, mani Abakanani bemeeda sa ohumenyaanga omwo. 13Kata neende Abaisiraeli nibaba neende amaani maangi muno, haba sibanyala ohwirusira elalira Abakanani boosi baabamalamo, nae banyalaanga sa ohubayiika baabaholeraanga sa emirimo.
Efuraimu neende Manaase emuumbo basaba eloba liindi
14Bulaanu, abeechuhulu ba Yosefu baboolera Yosua bati, “Lwasiina ewe watuberesa sa esituundu silala syoong'ene esy'eloba ohuba elyeefwe hu bweefwe? Bulaanu efwe mbano hwingiiye huli abaangi muno olwohuba Omwaami niye otunyaliire ohwiingiya.”
15Yosua nae yabakobolamo ati, “Mani nikali mbwe eng'we mwiingiiye muli abaangi muno, nae esyaalo sy'ebigulu-gulu sya Efuraimu esyo nasyo sibaduduuye, mani munyala mwaachia mu bichaha ebyo, mani mweebetera abeene obulimo, mu loba ly'Abaperisi neende Abarefaimu.”
16Nabo bamukobolamo bati, “Bwadyeeri nibwo, esyaalo sy'ebigulu-gulu esyo haba sisituyera bulaanu, nae Abakanani bali mu syaalo sikwalaafu, bali neende ebigaari by'efaraasi eby'ebichuma, boosi abo abamenya mu Bbeeti Saani neende ebiko bidiidi-diidi bibyebodoohaanie, haandi neende abo abamenya mu Hoondo ya Yesireeli.”
17Yosua nae yaboolera enono cha Efuraimu neende echia Manaase emuumbo ati, “Mubwadyeeri bweene, mbao mwiingiiye muli abaangi muno, nihaandi mbao muli neende amaani maangi muno. Mani mubwadyeeri bweene mbao haba simuhoyeere ohuba neende omukabo mulala sa kwoong'ene. 18Mani esyaalo sy'engulu syosi sichia ohuba esyeeng'we. Kata syahaba bulaanu buti nisiri esichaha, muchie musibete mani musyebukulire ohutula hu lwaande lulala ohwoolera elalira hu lwaande luundi. Nae Abakanani koti lu mumanyire sa, eng'we muchia ohubeerusa mubatusemo, kata bahaba nibali neende ebigaari by'efaraasi by'ebichuma, oba kata bahaba nibali abaandu b'amaani muno.”
©Bible Society of Kenya, 2019
©Bible Society of Uganda, 2019