Yisaaya 53
53
1 #
Rom 10:16; Yow 12:38. Mani abaandu nibakobolamo bati,
“Wiina mweene onyala ohufukiirira bi huwuliire bino?
Haandi wiina mweene onyala ohufukiirira ati Omwaami niye oholere atyo?”
2Olwohuba wuno yahulira mu moni w'Omwaami koti omusaala kusisiiri,
okuloha emisi mu loba lyoomu.
Yali nataabonehana bulai haandi nataanyirira hu humutingaaleho,
haandi nataali neende esiiso silai hu hunyale ohumwekoomba.
3Yachaalasibwa mani abaandu bamwebwaaba.
Yeengiyaho engisa neende obuchuuni;
haandi abulao owali naadaha ohumutingaalaho daawe.
Eyo niyo engeri yi yachaalasibwamo, mani hwahaya ohumuyira koti omuundu.
4 #
Mat 8:17. Nae mubwadyeeri bweene, niye owedwiiha obuchuuni bweefwe
haandi nakiinga engisa yeefwe.
Naafwe nihubaasa hu husaanda hwae,
ohwo hwoosi hwali esibonereso ohutula eyiri Nasaae.
5 #
1 Pet 2:24. Nae hulw'ohwonoonaa hweefwe, yanyoola embala,
yasaandisibwa hulw'ebyonoono byeefwe.
Yasandisibwa hu fweesi-fweesi hunyale ohuwona.
Endawusi chiyatoochwa nicho echatuberesa obulamu.
6 #
1 Pet 2:25. Fweesi-fweesi hwali nihusalaanire koti amakoondi;
buli muundu n'adiirire engira yae;
Omwaami mani n'amudwiiha
esyonoono syaali esyeefwe fweesi.
7 #
Hubwi 5:6. #Biho 8:32,33. “Yasaandisibwa muno, mani nae n'abigumira byoosi mu buloonga,
mani natabaaho neende sy'alomaloma daawe.
Yabuleera koti ekoondi li bayira ohusiinja.
Haandi koti amakoondi lu kabuleera nibakabekaho obwooya,
yeesi nilwo luyabuleera, natabaaho neende esy'ohulomaloma.
8Yadiirwa mani yaayirwa ohuheengerwa omusaango kw'ohufwa;
mani abulao owadeebayo
ati ali ohutuswa mu syaalo sy'abalamu.
Yeetwa hulw'ebyonoono by'abaandu baangi.
9 #
1 Pet 2:22. Mani bamusiiha alala neende abaholi b'ebibi
kata ayahaba n'atahola omusaango,
kata ohulomalomaho eby'obubacha.
Nae mu hufwa hwae, yabalirwa alala neende abayiinda
kata neende naataholaho esibi syoosi,
kata naatuumbulaho emboosi y'obubacha.”
10Nae hwali ohudaha hw'Omwaami ohumusaandya atyo;
Omwaami niye owamuta mu ngisa.
Omweene niye owayaanayo obulamu bwae ohuba esiyaanwa sy'ebyonoono.
Mani yahabone ab'olwiibulo lwae, nibemeeda ohuyiindira;
mani ebyo bi Omwaami adaha byahoolerere nibimubitiramo.
11Yahabone ebyaamo bitula mu husaanda hwae;
haandi yahamanye ati haba siyasaanda bihaya.
Omuhalaabani waange oyo, yooseresa buli siindu sindalagira;
haandi yahedwiihe ebinyaaso by'ebyonoono by'abaandu baangi,
mani nimbaleheramo hulw'omuhalaabani waange oyo.
12 #
Mrk 15:28; Luk 22:37. Mani sakira muberesa omukabo kwaakana neende okw'ahunuufu,
haandi yahakabane ebiindu biyaayirwe alala neende ab'amaani.
Olwohuba yayaanayo obulamu bwae
mani n'abalirwa alala neende abonooni.
Yakiinga ebyonoono by'abaandu baangi,
haandi niyekongooya ati baleherwemo ebyonoono byaabwe.
©Bible Society of Kenya, 2019
©Bible Society of Uganda, 2019