2 Abatesalonika 3
3
Mutusabire
1Esimaliirihayo, basyeefwe, mutusabire muti Emboosi ya Nasaae yinyale ohusalaana bwaangu haandi yinyoole oluyaali koti lu yali mweeng'we. 2Haandi mutusabire muti Nasaae atuwonie abasuku neende abonooni, olwohuba sisiri mbwe buli muundu yeesi ali neende efukiirira. 3Nae Omwaami mweesikwa; achia ohubaberesa amaani, haandi abakaye ohutula hu musuku Sitaani. 4Haandi huli abeesikwa mweeng'we mu Omwaami huti muli ohuhola buli siindu sihubalagira haandi muchia ohwemeeda ohuhola mutyo. 5Lehe Omwaami yeemirire emyooyo kyeeng'we mube neende obuheeri bwa Nasaae haandi neende obwesimiirisi bwa Kristo.
Ohuhoyera ohuhola emirimo
6Baasyeefwe, mu liita ly'Omwaami weefwe Yesu Kristo, hubalagira huti, mweyaabe omufukiiriri mukata yeesi otaloondakana neende enjekesa yi hwababeresa. 7Olwohuba eng'we abeene mumanyire bulai muti muhoyere ohutuboneraho engeri yi hwabeekesa. Sihwali bakata nihuli mweeng'we 8haandi sihwalyaaho esyohulya sy'omuundu yeesi nihutatuungire. Nae hwahalaabana haandi hwaholaanga neende amaani esiro neende esideete, huhaye ohusidoyera omuundu yeesi mweeng'we. 9Hwahola sino nihutachiiririra huti haba sihudaha obuhoonyi bweeng'we; nae nihuchiiririra huti hube esyohuboneraho yi muli. 10Olwohuba nihwali nihuli naang'we hwababeresa elako huti: omuundu yeesi otahola omulimo haba saahoyere hulya. 11Huboola sino olwohuba huwulira mbwe aliwo abaandi mweeng'we abakata abatadaha ohuhola omulimo kwosi ohumalaho ohwiingiriraanga sa emirimo ky'abaandi. 12Mu liita ly'Omwaami Yesu Kristo hubalagira haandi husaba abaandu b'engeri eyo batereese ebiima byaabwe, haandi bachaake ohuhola emirimo hu banyale ohunyoola ebiindu bihoonya obulamu bwaabwe bweene. 13Nae eyiri eng'we basyeefwe, mutajoong'a ohuholaanga amalai. 14Omuundu yeesi oli eyo otawulira bi hubaandiikira mu bbarwa yino mumwehaliirisenge bulai, haandi, mutaholeranga alala nae, hu soni chimudiire. 15Nae mutababukulanga koti omusuku, ohumalaho mumweekese koti omwaana weeng'we.
Emboosi chimaliirihayo
16Lehe Omwaami mweene, okabanga omuleembe ababerese omuleembe endaalo choosi haandi mu ngira yoosi. Omwaami abe neende buli muundu yeesi mweeng'we. 17Ese Paulo nyandiika amaheeso kano neende omuhono kwaange kweene, haandi aho niho ahalolero handechaanga mu bbarwa chaange choosi. Yino niyo engeri yi nyandiki. 18Leha embabaasi ch'Omwaami weefwe Yesu Kristo chibe naang'we mweesi.
©Bible Society of Kenya, 2019
©Bible Society of Uganda, 2019