Ɛsta 4
4
Mɔdɛkai yɛli Ɛsta ni o sɔŋm’ ba
1Mɔdɛkai ni daa baŋ dinkam zaa niŋ maa, ka o suhu daa saɣim, ka o dar’ tɔh’ o situra, ka zaŋ buɣu pili, ka niŋ tampiligim puɣ’ o zuɣu n-yi n-kpe tiŋ’ puuni chani gindi kuhiri fabila kuhigu pampam ni suhusaɣiŋgu. 2O daa niŋla lala hal ti paai nayili samban’ dunol’ ni. O daa bi kpe nayili maa, dama bɛ daa bi saɣiri ka ninvuɣ’ so ŋun pili buɣu zaŋdi li kpɛri nayili. 3Naa zaligu lahibali maa ni daa paai bɛ tiŋgbɔŋ maa yaɣili kam ni, Yɛhudianim’ daa kul kuhirila fabila kuhigu pampam. Di zuɣu ka bɛ daa lo noli n-kum ka fabili, ka bɛ ni niriba pam daa pili buri n-teei do tampiligim ni.
4Napaɣ’ Ɛsta duu bihi mini namɔɣilisi ni daa kana ti yɛl’ o Mɔdɛkai yɛla, di daa niŋ o suhusaɣiŋgu pam. Ka o daa bo binyɛra n-ti ni bɛ zaŋ ti ti Mɔdɛkai ka o ye ka chɛ buɣu maa, ka o daa zaɣisi li. 5Di saha ka Ɛsta daa boli Hatak ŋun daa nyɛ nayili namɔɣili so naa ni daa zaŋ ti o ni o sɔŋd’ o la na nti yɛl’ o ni o cham’ ti bɔhi Mɔdɛkai nya din niŋ o ni din tahi lala na. 6Ka Hatak daa chaŋ Mɔdɛkai sani tiŋ’ puuni pal’ shɛli din daa miri nayili dunol’ la shee. 7Ka Mɔdɛkai daa yɛl’ o dinkam niŋ o mini Haman ni daa yɛli ni o ni yo laɣ’ shɛli tariga ka bɛ zaŋ niŋ naa kpanjɔɣu ni, ka chɛ ka bɛ ku Yɛhudianim’ zaa la yɛla. 8Ka Mɔdɛkai daa zaŋ zaligu gban shɛli bɛ ni daa sabi Susa n-wuhi ni bɛ kum’ Yɛhudianim’ maa ti Hatak, ka yɛl’ o ni o zaŋm’ li ti wuhi Ɛsta, ka kahigi di yɛla zaa wuh’ o. O daa yɛl’ o, “Yɛlim’ Ɛsta ni o cham’ naa sani nti suh’ o ni o zom’ ŋun’ Ɛsta zuliya nambɔɣu.” 9Ka Hatak daa chaŋ ti yɛli Ɛsta Mɔdɛkai ni yɛl’ o shɛm maa. 10Ka Ɛsta daa zaŋ o ni mali yɛtɔɣ’ shɛli ti o ni o ti yɛli Mɔdɛkai. Ɛsta ni daa yɛli shɛm m-bɔŋɔ: 11“Naa kpambaliba min’ o niriba zaa bɛn be o tiŋgbɔŋ ŋɔ yaɣili kam ni mi ni doo bee paɣa yi kpe naa sani o zɔntua ni ka pa ni ŋuna m-bol’ o, naa zaligu ni wuhi shɛm nyɛla bɛ kum’ dilana. Naɣila o ni kpuɣ’ o salima nam jaaŋgbee la tiri so n-ni tiligi. Goli muni mi n-kul bɔŋɔ ka naa na bi lan boli ma ni n ka o sanna.”
12Ka bɛ daa yɛli Mɔdɛkai Ɛsta ni yɛli shɛm. 13Di saha ka Mɔdɛkai daa yɛli ba ni bɛ labimi ti yɛli Ɛsta: “Di tɛhiri ni a ni be nayili maa wuhiya ni a ni yi kum ni gari Yɛhudia nir’ kam. 14A yi shin’ a noli saha shɛli ti ni be ŋɔ ni, sɔŋsim ni yi luɣ’ shɛl’ polo na nti tiligi Yɛhudianima, amaa ka nyin’ lee kpi ka a ba zuliya kpihim. Bee ŋuni n-ni tooi baŋ ni pa lala zuɣu ka a ʒe a ni ʒe zaashe tital’ shɛl’ ni ŋɔ?”
15Ka Ɛsta daa yɛli ba ni bɛ labimi ti yɛli Mɔdɛkai: 16“Cham’ ti laɣim Yɛhudianim’ zaa bɛn be Susa ŋɔ n-chɛ ka yi lo noli n zuɣu. Di dinya bee n-nyu shɛli lala dabisi’ muna ata, wuntaŋ’ ni zaŋ tabili yuŋ zaa. Ka m mini n duu bihi gba ni lo noli maa. Di nyaaŋa n ni chaŋ naa sani hal lala ni kul nyɛ din chih’ o zaligu la zaa yoli. Ka lala niŋbu maa yi ni chɛ ka n kpi, n saɣiya ni n kpi.”
17Ka Mɔdɛkai daa chaŋ ti niŋ Ɛsta ni yɛl’ o ni o niŋ shɛlikam maa zaa.
Red Letter Dagbani Bible © Bible Society of Ghana, 2011