Mɛ̈t 7
7
Ŋi̱i̱c Yecu kɛ kui̱ luɔ̱k nɛɛni kɔ̱kiɛn
(Luk 6:37-38,41-42)
1“/Cuarɛ naath luk kɛ kui̱ kä ɣöö /ca yɛ bi luk. 2Kɛ ɣöö ba yɛ luk kɛ duɔ̱ɔ̱p in luk yɛnɛ naath, kä ba yɛ kum kɛ ŋut in kum yɛnɛ nɛy kɔ̱kiɛn. 3Ɛŋu nɛɛni thuɔr thuɔr mi te waaŋ dämuɔɔr ɔ, kä /ci jiath mi te waaŋdu nɛn? 4Kä deri jɛ la̱r dämuɔɔr i̱di i̱, ‘A ka̱mä thuɔr thuɔr waaŋdu raar’ kä ti̱i̱ kɛ jiath mi di̱i̱t waaŋdu? 5Ji̱n gua̱n mɛɛtdä, kɔŋni ka̱m ni jiath waaŋdu raar, bi kulɛ nën agɔaa kɛ käm thuɔr thuɔr waŋ dämuɔɔr raar.
6“/Cuarɛ mi rɛl gɔɔydɛ rɔ käm jio̱o̱k, bikɛ riet ni rɔ̱ yɛ kɛ ko̱r. Kä /cuarɛ dɔ̱a̱knikun tin gɔw yor nhiam kuɔ̱ndhuɔ̱ɔ̱ri, bikɛ kɛ dɔany kɛ ciökiɛn.”
Ŋi̱i̱c Yecu kɛ thiec kä tin go̱o̱r naath kɛ kä Kuoth
(Luk 11:9-13)
7“Thiëcɛ, kä ba jɛ ka̱m yɛ görɛ, kä bia jɛ jek, dɔaŋɛ thi̱i̱k, kä ba jɛ lëp yɛ. 8Kä ram mi ci thiec ka̱mkɛ jɛ, kä ram mi go̱r jekɛ jɛ, kä ram mi do̱ŋ lëpkɛ jɛ. 9Kä tëë kɛ raan rɛydun, mi ci gatdɛ jɛ thiec kɛ pam pam kä bɛ jɛ thöp päm? 10Kiɛ mi thiecɛ ni rec, kä bɛ jɛ moc thɔ̱l? 11Kä yɛn nɛy tin jiäk mi ŋäc yɛn ɣöö bia gaatkun ka̱m muc ti gɔw, kɛ muc ti gɔw ti ni̱n di tin bi Guurun in te nhial kɛ ka̱m nɛy tin thiëckɛ jɛ? 12Kä lätni nɛy tin kɔ̱ŋ kä min go̱o̱ri ɣöö ba lät kä ji̱, kɛ ɣöö ɛ jɛn min te rɛy ŋuɔ̱tni Muthɛ kɛnɛ ruaacni göökni.”
Duɔ̱ɔ̱p teekä mi ciw
(Luk 13:24)
13“Wiaa rɛc kɛ thok in ciw, kɛ ɣöö thok in naŋ naath ro̱o̱l jɔɔkni di̱tdɛ, kä duɔ̱ɔ̱p in naŋ naath thi̱n thia̱kɛ, kä wä nɛy ti ŋuan kɛ jɛ. 14Kɛ ɣöö thok in naŋ naath teekä ciwɛ, kä duɔ̱ɔ̱p bumɛ, kä jekɛ nɛy ti tɔt.”
Jiath kɛnɛ dɛykɛ
(Luk 6:43-44)
15“Niɛkɛ rɔ̱ kɛ göök ti guäy, tin bëë kä yɛ a ca rɔ̱ moc kɛ tuac rɔɔmä, kä ce̱t rɛydiɛn kɛ jio̱o̱k nyapëc ti näk buɔth kɛ. 16Bia kɛ ŋa̱c kɛ dɛykiɛn. La puɔnkɛ dɛy buɔ̱cä kä kuiy, kiɛ dɛy ŋɔa̱a̱p kä thilɛ? 17Kä jɛn duɔ̱ɔ̱p ɛmɔ, jiɛn ti gɔw kuɛrkɛ dɛy ti gɔw, kä jiath mi jiääk kuirɛ dɛy ti jiäk. 18Jiath mi gɔaa /cɛ dɛy ti jiäk dee kuir, kä /ci jiath mi jiääk dɛy ti gɔw dee kuir. 19Kä jiɛn diaal ti /ca dɛy ti gɔw kuir jɔapkɛ kɛ kä yuɔrkɛ kɛ maac. 20Kɛ kui̱c ɛmɔ bia kɛ ŋa̱c kɛ dɛykiɛn.”
Ɣän kuecä yɛ
(Luk 13:25-27)
21“/Cikɛ nɛy diaal tin cɔalkɛ ɣä i̱, ‘Kuäär ni Kuoth, Kuäär ni Kuoth,’ kɛn tin bi wä cieŋ Kuäärä nhial, ɛ ni ram mi lat ruac Gua̱a̱r in te nhial. 22Ɛn cäŋ ɛmɔ bi nɛy ti nyin ŋuan ɣä jiök i̱, ‘Kuäär, Kuäär, /ka̱nkɔ ruaacni go̱o̱kä lat kɛ ciötdu, kä tuɔ̱kɔ kuth ti jiäk raar kɛ ciötdu, kä latkɔ lät ti buɔ̱m buɔ̱ɔ̱m kɛ ciötdu bä?’ 23Kä bä jɛ la̱r kɛ i̱, ‘Ɣän /cä yɛ nyäk kɛ ŋäc, wuɔcɛ rɔ̱ gekädä, yɛn ji̱ la̱a̱t jiäkni.’ ”
Wutni rɛw ti ta̱thkɛ duël
(Luk 6:47-49)
24“Kä nɛy diaal tin liɛŋkɛ ruaacnikä ti̱ti̱ kä la̱tkɛ kɛ, bikɛ ce̱tkɛ ram mi pɛl mi ci luaakdɛ cuŋ guäth mi bum. 25Cu nhiaal dɛ̈m, kä cu nyɔc ben raar, kä cu jiɔam puɔ̱t kä yɔ̱kɛ luaak ɛmɔ, kä /kenɛ tɛɛth, kɛ ɣöö bum gua̱a̱th in ca cuŋ thi̱n. 26Kä nɛy diaal tin liɛŋkɛ ruaacnikä ti̱ti̱ kä /ci kɛn kɛ lät, bikɛ ce̱tkɛ ram mi dɔ̱a̱r mi ci luaakdɛ la̱t guäth litdä. 27Kä cu nhiaal dɛ̈m, cu nyɔc ben raar, kä cu jiɔam puɔ̱t kä yɔ̱kɛ luaak ɛmɔ, kä cuɛ tɛɛth, kä cu tëthdɛ di̱t.”
Te Yecu kɛ buɔ̱m mi ŋi̱i̱cɛ naath
28Mëë ci Yecu ruaacni ti̱ti̱ thuk kɛ la̱t, cu buɔ̱n nath ga̱a̱c kɛ ŋi̱i̱cdɛ, 29kɛ ɣöö cɛ kɛ ŋi̱eec ce̱tkɛ ram mi tekɛ kuäär, kä /cɛ ce̱tkɛ ji̱ gɔ̱rädiɛn.
Nuer Bible © Bible Society in South Sudan 1998,2012.