羅馬書 10
10
1兄弟姊妹啊，𠊎樣般熱誠盼望𠊎个同胞會得救；為這件事，𠊎也一直懇求上帝！ 2𠊎做得做證，佢等對上帝確實非常熱心，可惜佢等个熱心毋係用真智識做基礎。 3佢等無明白上帝个義，想愛立自家个義，毋肯順從上帝个義。 4其實，基督已經使法律个功效停止，使一切信佢个人攏總得到成做義人。
普世个拯救
5有關通過遵守法律來成做義人這件事，摩西識恁樣寫：「遵守法律命令个人，會因為法律得到生命。」 6總係，因為信來成做義人這件事，聖經恁樣講：「你毋好心肝講：麼人愛上去天頂啊？」 (這就係講，麼人愛去帶基督下來呢？) 7「也毋好講：麼人愛下去陰間啊？」 (這就係講，麼人愛去將基督對死人中帶上來呢？) 8這兜話个意思係講：「上帝个真道離你無幾遠，就在你口中，在你个心內。」換句話來講，就係在𠊎等所傳「信个真道」底背。 9你若係嘴承認耶穌做主，心相信上帝使佢對死復活，你就會得救。 10因為𠊎等心恁樣相信，就會得到成做義人；嘴恁樣承認，就會得救。 11聖經講：「凡信靠佢个人就毋會失望。」 12這句話係指所有个人講个，因為無猶太人㧯外邦人个分別；上帝係萬人个主，佢愛豐豐富富賜福給所有求喊佢个人。 13就像聖經所講：「凡求喊主名个人一定得救。」
14總係，佢等無信佢，樣般會求喊佢呢？無聽到，樣般會信呢？無人傳，樣般會有好聽呢？ 15無人奉差派，樣般會有人傳呢？像聖經所講：「傳福音个人，佢等个腳跡還靚噢！」 16總係，並毋係每一個人全部接受福音，因為以賽亞識講：「主啊，𠊎等所傳个，有麼人信呢？」 17可見，信係對聽來个，聽係對傳揚基督來个。
18總係，𠊎愛質問：佢等正經無聽過嗎？當然聽過！像聖經所講：
佢等个聲傳到人間；
佢等个話傳遍天下。
19𠊎再質問：以色列人正經毋知嗎？最先，摩西用上帝个話已經回答這個問題，講：
𠊎愛用『毋算係子民』个民族來激你等嫉妒，
𠊎愛用戇檔个國惹你等受氣。
20 以賽亞還較大膽傳上帝个話講：
吂識尋𠊎个人，
𠊎俾佢等發現，
吂識求𠊎个人，
𠊎對佢等顯現。
21總係，關係以色列人，佢講：
對這悖逆好拗个子民，
𠊎歸日伸出𠊎个雙手，
喊佢等轉來同𠊎講和。
اکنون انتخاب شده:
羅馬書 10: THV12Hdb
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© The Bible Society in Taiwan, 2012
All rights reserved
© 台灣聖經公會版權所有 2012