但以理書 2
2
尼布甲尼撒發夢
1 尼布甲尼撒在位个第二年，佢發一隻夢；這夢害佢心肝亂淨淨，睡毋落覺。 2所以，佢派人喊算命个、會法術个、行邪術个，㧯星象家 #2:2 「星象家」原文直譯係迦勒底人，可能指巴比倫个鰲人，在本書出現幾擺。來為佢解夢。這兜人來到，企在王面前个時， 3王對佢等講：「𠊎發一隻夢，心肝亂淨淨，𠊎愛知該隻夢个意思。」
4這兜人用亞蘭話對王講：#2:4 對這位到 7:28，原文係用亞蘭文寫个，毋係用希伯來文。「願王萬歲！請將該隻夢㧯僕人講，𠊎等就來為王解釋。」
5王應講：「𠊎已經決定：你等若無將夢㧯𠊎講，並將夢个意思㧯𠊎解釋，𠊎愛斬斷你等个手腳，又愛使你等个屋成做垃圾堆。 6若係你等將𠊎个夢講出來，又解釋夢个意思，𠊎就獎賞你等，又賜尊榮名聲給你等。這下，好將𠊎个夢講出來，解釋給𠊎聽。」
7佢等再應王一擺，講：「請國王將夢㧯僕人講，𠊎等正有辦法為王解釋。」
8這時，王大聲講：「𠊎早就知你等會想愛拖時間，因為你等知𠊎已經決定了： 9若係你等講毋出𠊎个夢，𠊎只有一個辦法對付你等。你等大家講好，想愛亂講欺騙𠊎，愛等到情況改變。這下遽遽將𠊎个夢講出來，𠊎就知你等斷真會解夢。」
10佢等應王講：「世界上無人有可能將國王所問个事講出來。從來毋識有一個王對算命个、會法術个，抑係星象家恁樣要求；就算盡偉大、盡有權力个王也毋識恁樣。 11國王所問个實在忒難回答了。除了神明以外，無人有辦法回答，總係神明並無住在人間。」
12王大發譴，命令將巴比倫王宮所有个顧問全部處死。 13所以王个命令發出，愛㓾全部个顧問，人也去尋但以理㧯佢該兜朋友，愛㓾佢等。
上帝指示但以理
14 但以理去見該執行王命令个侍衛長亞略。 15但以理盡精靈好嘴問亞略，做麼介王發出恁嚴个命令。亞略就將事情个經過㧯佢講。
16 但以理就入去求王給佢時間，好使佢為王解釋該隻夢。 17然後但以理轉去屋下，將事情个經過㧯佢个朋友哈拿尼雅、米沙利㧯亞撒利雅講。 18佢要求佢等向天頂个上帝祈禱，求佢憐憫，啟示這夢个奧秘，免得佢等㧯其他巴比倫王宮个顧問共下死。 19該暗晡，但以理在異象中得到奧秘个啟示。所以，佢頌讚天頂个上帝，講：
20願上帝个名得到稱頌，
世世代代無停！
因為智慧㧯權能全部屬佢。
21佢改變時間、四季；
佢廢掉王，設立王；
佢賜智識給聰明人，
賜智慧給通達人。
22佢啟示奧秘个事；
佢知暗中所有个事；
光一直㧯佢同在。
23𠊎祖先个上帝啊，
𠊎感謝你，頌讚你！
你賜給𠊎智慧㧯力量；
你聽𠊎个祈求，
指示𠊎等愛樣般向王解夢。
但以理為王解夢
24所以，但以理去見該執行王命令个亞略，對佢講：「求你毋好㓾掉巴比倫王宮个顧問；帶𠊎去見王，𠊎會為王解釋佢个夢。」
25 亞略即時帶但以理到尼布甲尼撒王面前，對王講：「𠊎在該兜對猶大捉來个人當中，尋到一儕有法度解釋王个夢。」
26王對但以理 (又喊做伯提沙撒) 講：「你有法度將𠊎發个夢講出來，又解釋夢个意思，係麼？」
27 但以理應講：「國王啊，王宮个顧問、會法術个、行邪術个、抑係算命个，全部無法度向你解明這奧秘个事； 28總係，天頂有一個啟示奧秘个上帝，佢已經將日後愛發生个事指示尼布甲尼撒王。這下𠊎愛將王个夢，就係王睡掉个時得到个異象向王解釋。
29「國王啊，你睡掉个時，夢到將來个事。啟示奧秘个上帝將愛發生个事指示王。 30這奧秘个事，𠊎已經得到啟示；這並毋係因為𠊎比別人較聰明，係愛俾王知這夢个意思㧯你心肚想愛明白个事。
31「國王啊，你在異象中看到在你面前有一座當高當大个像，非常刺目，形仔當得人驚。 32這像个頭那係用純金做个，胸脯㧯手髀係銀仔做个，腰身㧯大腳髀全部係銅做个， 33腳脛係鐵做个，腳盤係半鐵半泥做个。 34你看等个時，有一隻毋係用人个手鑿出來个大石頭對山頂輾下來，撞到該座像，將該雙半鐵半泥个腳盤撞碎掉。 35該泥、鐵、銅、銀、金黏時也做一下碎掉，像熱天禾埕个礱糠，被風吹散，全尋毋到。總係該大石頭越來越大，變做一座大山，揜等全地。
36「這就係國王發个夢。這下𠊎等愛向你解釋。 37國王啊，你係所有君王中最偉大个王。天頂个上帝設立你做王，賜給你國度、權柄、能力㧯尊榮。 38佢使你統治人類所住个世界，管理飛鳥、走獸。你係該座像个金頭。 39在你以後會有另外一隻帝國出現，總係無你个國恁大；後來又有第三隻帝國出現，就係銅个帝國，愛統治全世界。 40後來有第四隻帝國，它像鐵仔恁堅強，能打碎所有个東西。就像鐵仔打爛東西共樣，它愛打橫所有以前个帝國。 41你所看到該半泥半鐵个腳盤㧯腳趾，係表示該隻帝國會分裂；它有鐵个力量，因為它係半鐵半泥个。 42半鐵半泥个腳趾係表示該隻帝國會一半強一半弱。 43你看到鐵㧯泥摻共下；這係表示該隻帝國个統治者想愛用通婚來統一逐民族 #2:43 「該隻帝國…民族」抑係譯做「該帝國个人民㧯各國个人民摻共下」。，總係無辦法聯合起來，就像鐵㧯泥做毋得合共下。 44當該兜王在位期間，天頂个上帝愛建立一個永遠个國。這國絕對毋會被人佔領，反轉愛徹底毀滅所有个帝國來永遠長存。 45你看到一隻毋係用人个手鑿出來个大石頭，對山頂輾下來；你又看到它撞碎金、銀、銅、鐵㧯泥做个像。偉大个上帝愛俾國王知將來愛發生个事。這夢係真實个，解釋係可靠个。」
王獎賞但以理
46 尼布甲尼撒王伏在地上，拜但以理，又命令向佢獻禮物㧯香。 47王對但以理講：「因為你解釋這奧秘个事，𠊎知你个上帝係眾神底背最偉大个神，係萬王个主，係啟示奧秘个上帝。」 48然後，王賞賜但以理盡多貴重个禮物，又升佢个官位，派佢管理巴比倫省，並設立佢做王宮顧問个總管。 49王答應但以理个請求，派沙得拉、米沙、亞伯尼歌管理巴比倫省个事務；總係但以理本人還留在王宮服事王。
اکنون انتخاب شده:
但以理書 2: THV12Hdb
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© The Bible Society in Taiwan, 2012
All rights reserved
© 台灣聖經公會版權所有 2012