使徒 1
1
1 提阿非羅先生：
在𠊎所寫个第一本書底背，𠊎已經將耶穌个一切事情㧯教訓，對佢開始工作， 2到佢受接升天該日，全部講過。在升天以前，佢通過聖靈指示自家所揀選个使徒盡多事情。 3被人害死以後四十日中，佢識對佢等顯現好多擺，用各種个方法證明自家還生生；佢親身俾佢等看到，又對佢等講論上帝國个事情。 4佢等共下个時 #1:4 「佢等共下个時」抑係譯做「佢同佢等共下食飯个時」。，佢吩咐佢等講：「毋好離開耶路撒冷。照𠊎㧯你等講過个，愛等吾爸所應許个。 5約翰用水行洗禮，總係幾日以後你等會領聖靈个洗禮。」
耶穌升天
6使徒㧯耶穌聚集个時，問耶穌講：「主啊，這下你愛恢復以色列國个主權係麼？」
7耶穌㧯佢等講：「時間㧯日期係吾爸照自家个權柄所定个，毋係你等个事。 8總係聖靈臨到你等个時，你等會滿有能力，並愛在耶路撒冷、猶太㧯撒馬利亞全地，直到天涯海角，為𠊎做見證。」 9講了這個話，耶穌在佢等个注目中受接升天；佢升到雲頂高去，佢等就看佢毋到。
10佢離開个時，佢等注目望天。忽然，有兩個著白衫个人企在佢等塍頭， 11講：「加利利人啊，做麼介企在這位望天呢？這個離開你等、受接升天个耶穌，你等看到佢樣般升天，佢也會恁樣倒轉來。」
接猶大職份个人
12使徒就對橄欖山轉耶路撒冷去；橄欖山離城無幾遠，約有一公里。 13一入城，佢等就上所住个樓頂；在該位有彼得、約翰、雅各㧯安德烈、腓力㧯多馬、巴多羅買㧯馬太、亞勒腓个孻仔雅各、激進黨个西門，㧯雅各个孻仔猶大。 14佢等常常共下同心祈禱；當中也有幾個婦人家㧯耶穌个阿姆馬利亞，並耶穌該兜老弟。
15過了幾日，有信徒个聚會，約有一百二十儕參加。彼得企起來，講： 16「各位兄弟！聖靈通過大衛个嘴在聖經所預言，關係猶大帶人捉耶穌个事，一定愛實現。 17這猶大本來受揀選來分擔𠊎等个工作，係𠊎等當中个一個。」
18(猶大用佢作惡所得个錢買一垤田；在該位，佢顛倒頭仆下來，肚裂腸流，現死。 19住在耶路撒冷个人全部有聽到這件事，所以用佢等个話喊該垤地做亞革大馬，意思就係「血田」。)
20「就像《詩篇》所寫个：
願佢个住所荒涼掉，
無人住在該底背。
又有一句寫等講：
願別人得佢个職份。」
21-22 彼得繼續講：「所以，一定愛另外揀選一個人加入𠊎等，共下做主耶穌復活个見證人。這人一定愛係主耶穌在𠊎等當中出入个時，對約翰行洗禮開始到耶穌受接升天這站時間，頭尾㧯𠊎等共下个人。」
23因為恁樣，大家推選兩個人，就係約瑟 (偏名巴撒巴，又安到猶士都) 㧯馬提亞。 24佢等祈禱講：「主啊，你知每一個人个心；求你指示𠊎等，這兩儕當中麼人係你所揀選， 25愛佢接這使徒職份个。這職份猶大已經放掉，到佢應該去个所在了。」 26講了這個話，佢等就抽籤仔，在兩儕當中抽出馬提亞來；佢就㧯其他十一儕共下算做使徒。
اکنون انتخاب شده:
使徒 1: THV12Hdb
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© The Bible Society in Taiwan, 2012
All rights reserved
© 台灣聖經公會版權所有 2012
