Kɔn dɛ̀bɛ́ Zhã nɔ mɔ́ 4
4
Kɔn dɛ̀bɛ́ rə̀ ŋwɛ́nɛ́ dɛ̃̌ yi w mú gakó nʼê cèrhé Yi
1Rə̀myɛ́ kwã nɛ́, a kʼa nə kɔn dõ. Bòlò pul dɛ̃̌ yi wə. Sə cəl lé à jɛ̀rɛ̀ a nyɛ̀ɛ̀ rə̀ bya ǹdə pɔ́lá cəl ta mɔ́ wò nè: “Zɛ̃̀ ń bə̀ dɛ̃̌ nyɔ̀nɔ̀, à bʼa byili mú kɔn dɛ́ dɛ̀bɛ́ rə̀ bàn rə̀myɛ́ kwã nɛ́ mɔ́.”
2Rə̀myɛ́ yi ní cìcì, Eshirhə náàcɛ̀nɛ́ só à yó wə, a nə pyɛ̀lɛ̀ də̀gwã́ è zhǐ dɛ̃̌ yi wə, sə lò yà ń jě è yó. 3Mɔ̀bɔ́ ń yà ń jě è yó mó yà ń nə́ ń jə́jɛ̀mɛ́ ǹdə nə́kul-ècɔ̀nɔ̀ ò gùlí námpùlú ǹdə́ nánshɔ̃̀ ta. Sə kɔn rə̀dù yʼà kə́kɛ́lɛ́ pyɛ̀lɛ̀ də̀gwã́ yá, rə̀ nyɛ̌ ǹdə dɔm-cɛ̃ ta, rə̀ nʼê jə́jɛ̀mɛ́ ǹdə nə́kul-ècɔ̀nɔ̀ námpùlú ta. 4Sə pyɛ̀lɛ̀ də̀gwə́rh shí-èlyè ǹdə́ sə̀na myɛ yʼà kə́kɛ́lɛ́ ya. Náncɛrh shí-èlyè ǹdə́ sə̀na yʼà jě sə̀ yó. Bə̀ yʼà zù kàmə̀-zù-pwə̀rh, bə pú pyɛ̀lɛ̀ yə́-púr rə̀ wɛ̀rhɛ́ ǹdə́ sánə́má. 5Sə pyɛ̀lɛ̀ də̀gwã́ y yʼà nʼê jə́jɛ̀mɛ́ ǹdə wɔ́ dwà è nʼê lyə́lyɔ̌ e jʼà nʼê bya, è nʼê ce sɔ̀ ta. Pàntámsɛ shàlpyɛ̀ yʼà ju sə̀ zhǐ tɛ̃´ è yé né. Sə sə̀myɛ́ yʼà wɔ́ Yi éshìrhə́ y né nyàlpyɛ̀ yá. 6Kɔn yʼà pyě tɛ̃´ è yé né, rə̀ nyɛ̌ ǹdə nə̀-fɔ̀lɔ̀ ta, pamparɛ̃ɛ̃ ǹdə bútóló námpõ ta, ǹdə zhə̀zhé ta.
Wò-nyìr rə̀na yʼà zhǐ rə kə́kɛ́lɛ́ ya, òdù gakó yala nɛ́ yʼà wɔ́ yírhə́ dúdú, ò yé né ǹdə́ ò kwã nɛ́ ga. 7Òdù w nyɛ̌ ǹdə bɔrɔ ta; rə̀lyè nyɔ̃̌ w nyɛ̌ ǹdə nə̀-bya ta; rə̀tɔ̀ nyɔ̃̌ w yé y nyɛ̌ ǹdə numbyíní yé ta; rə̀na nyɔ̃̌ w zɛ̃̀ ò nyɛ̌ ǹdə ényɛ̀lá ta. 8Rə̀myɛ́ rə̀na y òdù gakó yʼà zhe vɔ̀mɛ̀ nyə̀ldù. Rə̀ vɔ̀mɛ̀ nɛ́ myɛ gakó yʼà wɔ́ yírhə́ dúdú. Rə̀ nʼê nún cəcɛ̃ ǹdə́ nə̀nyɔ́nɔ́ ga rə̀ tʼâ shĩ̌ yé, rə̀ zhe:
“Cɛ̀nɛ̀ cə́bal, cɛ̀nɛ̀ cə́bal, cɛ̀nɛ̀ cə́bal,
Cinu Yi jàn-bə-swɛ̃´-zhe cə́bal,
ńmyɛ̌ ń yà ń ŋwɛ́nɛ́, n jà ń gwẽ̌ ŋwɛ́nɛ́, n jà ń bàn mɔ́.”
9Bə̀ yʼà nʼê cèrhé mɔ̀bɔ́ ń jě pyɛ̀lɛ̀ də̀gwã́ y yó, ń ŋwɛ́nɛ́ twéé twéé mó, bə̀ mʼê ce ń nə̀báná. 10Wò-nyùùrí rə̀na y gə cèrhé mo gakó, náncɛsɛ́ shí-èlyè ǹdə́ sə̀na y nʼê twi sə̀ nə̀dwə́nə́ yó, mɔ̀bɔ́ ń jě də̀gwã́ y yó ń ŋwɛ́nɛ́ twéé twéé mó yé né, sə̀ nʼê cèrhé mo, sə̀ nʼê dul sə̀ pyɛ̀lɛ̀ yə́-púúrí də̀gwã́ y yé né ǹdə́ sə̀ zhe:
11“Nə́ Cinu ǹdə́ nə́ Yi,
ǹ mə̂ dwã ǹdə́ zùwə́, ǹdə́ còrhó, ǹdə́ jàn.
Ǹmyɛ́ ǹ wɛ̀rhɛ́ kɔn gakó.
Kɔn tó dwã ǹdə́ ǹ pùbùlə̀ ń bə́ wɛ̀rhɛ́ rɛ rə̀ ŋwɛ́nɛ́.”
اکنون انتخاب شده:
Kɔn dɛ̀bɛ́ Zhã nɔ mɔ́ 4: lee
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 2001, Wycliffe Bible Translators, Inc. All rights reserved.