Kɔn dɛ̀bɛ́ Zhã nɔ mɔ́ 10
10
Màlɛ́ka dõ shí dɛ̃̌, sá-pyíl yʼà púr rə̀ ŋwɛ́nɛ́ è jɔ̃̀ wà
1Rə̀myɛ́ kwã nɛ́, a pwírí màlɛ́ka dõ è shí dɛ̃̌ ǹdə́ jàn nánfɔ̀lɔ̀ è bàn tɛ̃´. Ébɔ̃ pú yə, dɔm-cɛ̃ kə́kɛ́lɛ́ è yó w rə̀ nʼê jə́jɛ̀mɛ́, è yé y nyɛ̌ ǹdə nə̀nyɛ́nɛ́ ta, è cə́ né nyɛ̌ ǹdə myìn-zhùr ta. 2Sá-pyíl námpɔ́lɛ́ yʼà púr rə̀ ŋwɛ́nɛ́ è jɔ̃̀ wà. E cĩ́ è jə̀jĩ́ nà y nə̀-fɔ̀lɔ̀ w yó, e cĩ́ è jə̀gwã̀ nà y cɛ y yó. 3E bya dɛ̃´dɛ̃´ ǹdə wɔ́ bɔrɔ ò swər ta. Rə̀ yó, dwà jʼa bya twər tàlpyɛ̀, e zɔ̀m a nyɛ̀ɛ̀. 4Rə̀myɛ́ kwã nɛ́, a zɛ̃̀ à la kɔn dɛ́ dɛ̀bɛ́ dwà y byili twər tàlpyɛ̀ y mɔ́ kãɔ̃. Rə̀myɛ́ yó, cəl shí dɛ̃̌ yi w rə wɔ̀ nɛ̀: “Shèè kɔn dɛ́ dɛ̀bɛ́ dwà y byili twər tàlpyɛ̀ y mɔ́ ǹ wẽ́, sə ǹ bə̀ká ń kɛ̃ dɛ yé.”
5Rə̀myɛ́ yi ní, màlɛ́ka y à yʼà nɔ è zhǐ nə̀-fɔ̀lɔ̀ w ǹdə́ cɛ y yó mó, zhẽ̌ è jə̀jĩ́ e ce yi wə, 6e bwəl nyí Yi rí tɛ̀bɛ́ rə̀ ŋwɛ́nɛ́ twéé twéé, rə̀ wɛ̀rhɛ́ dɛ̃̌ ǹdə́ cɛ ǹdə́ nə̀-fɔ̀lɔ̀ wá, ǹdə́ wẽ̀ dé tɛ̀bɛ́ gakó rə̀ ŋwɛ́nɛ́ mɔ́, yil yilə e wɔ̀: “Yi rí yúwə́! 7Màlɛ́kabá bwàlpyɛ̀ nyâ y gə tú è wúl è pɔ́lá yá, Yi bʼa pyìrh ywẽ̀ né nə̀ shèè mó ǹdə rə̀ gə́ byili rə̀ nyì-zwennə bé bə̀ nʼê twĩ̀ rə̀ tum dí mú ni.”
8Cəl lé à jɛ̀rɛ̀ a nyɛ̀ɛ̀ rə̀ shí dɛ̃̌ yi w mú kʼe wɔ̀ nɛ̀: “Zhəl ń zwẽ sá-pyíl lé námpɔ́lɛ́ y rə̀ púr rə̀ ŋwɛ́nɛ́ màlɛ́ka y è zhǐ nə̀-fɔ̀lɔ̀ w ǹdə́ cɛ y yó mó jɔ̃̀ w mɔ́.”
9A zɛ̃̀ a yí màlɛ́ka y nyí ni, a lwə̀l y sɛ́bɛ́ rɛ́. E wɔ̀ nɛ̀: “Zwẽ ń dɔ̃̀ ń lyì. Rə̀ bʼa yə̀ jwàrɛ̀ ǹ nyú w ǹdə tùr ta, sə rə̀ gə yú ǹ wẽ́, rə̀ bʼa jǐrh cɛ̀ɛ́.”
10A jʼa zwẽ de è jɔ̃̀ w a dɔ̃̀ a lyì. Rə̀ yʼà nyɛ̌ jwàrɛ̀ à nyú w ǹdə tùr ta, sə rə̀ gə́ yú à wẽ́, rə jǐrh cɛ̀ɛ́.
11Bə zɛ̃̀ bə wɔ̀ nɛ̀: “Ǹ gwẽ̌ mə̂ sə́ byili kɔn dɛ́ dɛ̀bɛ́ Yi nʼê yâl bə̀ ǹ byili lyì nánzhəzhɔ̌ ǹdə́ cɛmɛ nánzhəzhɔ̌ ǹdə́ dwə́ nánzhəzhɔ̌ ǹdə́ pyâ nánzhəzhɔ̌ shò-kwã nɛ́ mɔ́.”
اکنون انتخاب شده:
Kɔn dɛ̀bɛ́ Zhã nɔ mɔ́ 10: lee
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 2001, Wycliffe Bible Translators, Inc. All rights reserved.