Rom 7
7
Lijakunl nin lipiikɔɔnl a wɔɔnim
1N nabum, n pag ki tenn bininfob ban nyi nsiimin le, naa nyi ke nsiimin jɔɔ tininkper a pɔɔm ki ŋmag uninfo n-yonn man wee u la fo be nlee? 2Ni che n mag wɔɔn ni, nsiim ŋmag chaldaan n-yonn man wee u chal la be nle, amaa ni ye u chal kpo ke, lijakunl nmɔn a siim kaa ji ŋmag wi. 3Ni bu, ni ye u kun uja uba wee u chal la be ke, bi yi u kuwanchɔgiŋ le. Amaa ni ye u chal kpo ke, nsiim nmɔn kaa ji ŋmag wi, le u mu kaa ye kuwanchɔgiŋi, hali nin waah le ji kpenn kun uja uba nmɔn biɛn ni.
4Ni bu, n nabum, ni tɔɔl kpo ki sei nsiimin na, Masiya a gbanann nin bu, ke ni fir ŋa Masiya wan nan fii nkumin nin kaah ye ban, na li ŋa man wee ti lo iloon ŋan ki sei Uwonbɔr. 5Tigbanann a bam kaah la nan ŋmag ti n-yonn man nin, le nsiimin nan che kɔlisa birug fii ti gbanann nin, ki che ti lo iloon ki sei nkum. 6Amaa daandaan nan, taah nan kpo ki sei niwann nan nan ŋmag ti, ti nyan nsiimin yaan na, ti ni yin tun ki sei Kinaaŋ a binben pɔŋin le, naa ji ye nsiim kpegim man nan sɔb dɔ-n ni.
Nsiim nin tibir
7Ti ni yin len ke nii? Nsiimin ye tibir lee? Naa ye man ni! Ibamɔn buu maa bi yin nyi tibir kaah ye nan ni, nsiimin le che n biɛ. Maa bi yin nyi linunchɔril kaah jann ye nan ni, ni ye nsiimin kaa bi be ke, “Laa jɔɔ linunchɔrili.” 8Amaa le tibir kan npɔɔn nsiimin yaan, ki che linunchɔril a booli pɔr n sufu ni. Ni bu nsiimin kaa bi be ke, tibir ma bi kpou. 9Maah kaa la nan nyi nsiimin n-yonn man nin; n nan jɔɔ limiɛfol, amaa nsiim kaah nan nan foo nin, le tibir fii ki kan npɔɔn n gbanann nin le n kpo. 10Le n kan ke nsiim man bi ye min sei limiɛfolin, nin ta nkum le dan.
11Tibir kan npɔɔn nsiimin yaan le ki larim, le nsiim nan bu, le tibir kum. 12Ni bu nsiimin be kasi, le maah wɔɔn man nin be kasi, ki jɔɔ tibuchinn ki ŋan. 13Ke ni wɔɔn ke niwann ŋan ke, ni labir nkum le ki dan n buu? Aai naa ye man ni! Amaa tibir nɔɔ nan ŋan bu le ki che nkum pɔr nni, na li ŋa man wee ti biɛ tibir kaah ye nan, nsiimin le che ti biɛ tibir kaah bir kaa tan jɔɔ magim man.
Likɔnl lan be ti ni
14Ti nyi nsiimin ye kinaaŋ a binbem le; amaa min le jɔɔ tigbanann a bam, le bi kɔɔrim sei tibir ke uyomin. 15Maa biɛ nan n tun nmɔn a taai yi. Nan bu-n, nan wee n bi ban n tun nin maa tun ni ma, amaa niwann nan wee n nan nin, ni ma le n tun. 16Tɔ le ni ye n tun nan wee maa bi ban n tun nin ke, n chee ke nsiimin ŋan. 17Naah ye man nmɔn, naa ji ye min tɔɔl le tun man ni, amaa tibir tan be n sufu-n nin, le tun man. 18N nyi ke niwaŋann niba kaa be n sufu-n ni, ti ma ye n binben biimin yaan. Nan bu-n, n bi ban n tun nan ŋan, amaa maa yin fir tun ni. 19Nan bu-n, maah tun nan nin kaa ye niwaŋann nan wee n bi ban n tun nin; aai, nan kaa ŋan wee maa bi ban n tun nin, ni ma le n le gbaa tun. 20Daandaan nan ni ye n tun maah kaa bi ban n tun man nin le ke, naa ji ye min le tun ni, amaa tibir tan be n sufu-n nin le tun man.
21N kan ke nsiim nmɔn tun itoon: Ni ye n ban n tun nan ŋan ke, nan bir be n ban. 22Nan bu-n, n potiɛmin ni mɔm le nin Uwonbɔr a siim; 23amaa n kan nsiim miba mu kaah be n gbanann nin, ki kɔnn nsiim man be n potiɛmin ni, ki ŋaam tibir tan be n gbanann ni a bɔgi a loondikɔɔru. 24Ba a nyunyunbaag a ninfobol ye maa! Ŋma yin feem ki nyam nkum a gbanann nan yaan naa? 25N tenn Uwonbɔr kunɔɔpoog, ti Yudaau Yisa Masiya bu!
Ni ma bu, min tɔɔl a potiɛmin n ye Uwonbɔr a siimin a yomu le, amaa le n binben biimin mu ye tibir a siimin a yomu.
Komba New Testament © Bible Society of Ghana, 2014.