Rom 4
4
Abiraham kaah ye limagil ki sei ti man
1Ti yin pag ke nii ki jiin ti yaaja Abiraham nin waah nan kan nan nin paam maa? 2Ni ye Abiraham a toon bu le Uwonbɔr nan ke u bɔr ŋan ke, u nan jɔɔ nan wee u li ta faa u gbingbanl, amaa naa ye Uwonbɔr a nintogili. 3Uwonbɔr a gbɔŋin len ke nii? “Abiraham ŋa Uwonbɔr le yada, le Uwonbɔr kan u yada nmɔn kpiɛ u buchin binbem bu.”
4Ni ye uninfo tun litoonl ki gaa tiyɔr ke, baa kaan u yɔr nmɔn ke ti ye ipiin ni, amaa ni kpaan un gaa le. 5Amaa, uninfo wan kaa nɔɔ itoon ŋan a tum bu, wee ki gaa Uwonbɔr wan che bipootondam kpann bibuchim jin nin, u yada nmɔn bu le Uwonbɔr ke u bɔr ŋan u buchin binbem bu. 6Defid tɔɔl nan len man le, waah nan pag ke Uwonbɔr a kaar be uninfo bu u buchin binbem bu ki kpiɛ u toon bu-n:
7Tikaar be
ban galin wee Uwonbɔr jiɛn per bin bu,
ban a bir bu wee U degin nin.
8Tikaar be uninfo
wan wee Uwonbɔr kaa li nyi kan u bir ki bil guun win bu.”
9Tikaar nan ye ban jii bi pun a binba yaar le bee, ban kaa jii n mu kpiɛ nii waa? Ti le gbaa pag le ke Abiraham a yada-n nan wɔɔn u buchin binbem le. 10Ba nan che Uwonbɔr nan ŋa Abiraham ubuchin nmɔn naa? Waah nan jii u punlin a bɔɔn bee waah kaa la nan jii n naa? Naa ye waah nan jii-n a bɔɔn ni, amaa waah kaa la nan jii-n le Uwonbɔr nan ŋa u ubuchin! 11U punjiilin nan ye siɛra le ki wɔɔn ke u pii ŋa Uwonbɔr yadau, le Uwonbɔr ta U buchin binbem a daagim ki daag u, u yada bu, n-yonn man wee waah laa nan jii u punlin. Le ki ŋa u yadadam ban kaa jii bi pun biɛn a baa, na li ŋa man wee bin kanh bi kpiɛ ban jɔɔ nbuchin binben nin. 12U ma ji ye ban jii bi pun wee kaa be lipunjiil a binba bu amaa wee ki nɔɔ yada a tabogi yan wee ti baa Abiraham nan jɔɔ n-yonn man wee waah laa nan jii u punlin.
Yada bu le ti gaa Uwonbɔr a mɔsiinlin
13Naa nan ye nsiimin a ŋmagim bu le Uwonbɔr nan siin limɔsiinl ki sei Abiraham nin u yaabili ke bi li ji dulinya nan a faalin ni, amaa nbuchin binben man nyan yada-n nin bu. 14Ni ye Uwonbɔr bi ke ban ŋmag nsiimin le yin ye dulinya nan a faajib ke, yada a ŋaam kaa bi jɔɔ tinyɔɔri le limɔsiinl kaa jɔɔ tinyɔɔri, 15nan bu-n nsiimin a biim le jɔɔ Uwonbɔr a ŋuufiiŋ chaan. Nan yaan wee nsiim kaa be-n uba mu kaa jɔɔ igalin ni.
16Mambu Uwonbɔr a mɔsiinlin nɔɔ nin yada le, ki ye Uwonbɔr a nyunyunbasanl ki si guu Abiraham a yaabili biɛn, naa ye ban ŋmag nsiimin a binba, amaa ban jɔɔ Abiraham a yada-n. U ma ye ti biɛn nan a baa. 17Ke naah sɔb man Uwonbɔr a gbɔŋin nin: “Min le ŋaaŋ ibol takpem a baa.” U ye ti baa le Uwonbɔr ban, wan wee u ŋa u yada, U ma ye Uwonbɔr wan tenn bitakpiib limiɛfol wee ki che tiwann tan kaa nan be-n nin be ke ti pii nan be le-n.
18Nin tama kaah kaa le nan be nmɔn biɛn ni, Abiraham nan jɔɔ tama le ki ŋa Uwonbɔr yada le ki nan ŋa ibol takpem a baa ke Uwonbɔr kaah nan bei ke, “A yaabili na yin yab man le.” 19Abiraham nan kan ke u por ki mal nkuma, u nan ye ibin kobig paam le, le u poo Sɛra mu nan por ki lagir nmaala, amaa naa nan che u yada kan wee u jɔɔ-n diŋi. 20Nin ni ma biɛn ni, waa nan biɛnn Uwonbɔr a mɔsiinlin ni, amaa u yada nan mann sei u npɔɔn le u sei Uwonbɔr kupag. 21U num nan gbee ke Uwonbɔr jɔɔ npɔɔn ki li fir tun waah nan siin limɔsiinl ke U li tun man nin. 22U yada nmɔn bu le “Uwonbɔr nan kan u ki kpiɛ ban jɔɔ nbuchin binben nin.” 23Imɔbon yan len ke, “Bi nan kan u kpiɛ-n,” kaa nan sɔb dɔ u binba bu le, 24amaa tim tɔɔl, ban wee Uwonbɔr li kan kpiɛ ban jɔɔ nbuchin binben nin. Taah ŋa yada nin U ma Uwonbɔr wan fiin ti yudaau Yisa nkumin nin bu. 25Ti toon bir bu le Uwonbɔr nan ta Masiya sei nkum amaa le U fiin u nkumin ke Un ŋa ti bininfoŋam Uwonbɔr ban.
Komba New Testament © Bible Society of Ghana, 2014.