Baylíman 1
1
1Mun-guna jurra ngaypa Paul rrapa Dimati (Timothy) an-guna an-ngayburrpa worlapa arrburrwa ngatipa nyirri-wukurrjinga nggula. Minyja ngaypa ng-guna wupa brichina (prisoner) ngu-nirra ngardawa minypa janguny ngu-ngurrjinga ngu-workiya Christ Jesus gun-nika.
Baylíman (Philemon), a-lay, an-borrmunga, japurra ngapa ny-jirra, gun-guna janguny nggula ny-jurdiya gu-ngardapiya atila ngatipa jama arri-jirra arri-workiya. 2Nginyipa rrapa jin-gata Apiya (Apphia) jin-ngayburrpa jelapa arrburrwa, rrapa an-gata Akípach (Archippus) nipa gu-ngardapa arrburrwa burr-guya ngubi-rrimanga Christ gun-nika janguny, rrapa aburr-werranga burr-guta aburr-gata Wangarr burr-yika wurra gama gorlk nyiburr-bamagutuwiya nyiburr-workiya gun-nginyipa rrawa:#Gulóchay 4:17 3Ana-goyburrpa nyiburr-gurdiya bitipa Wangarr rrapa Jesus Christ abirri-gunggaja barra ana-gorrburrwa rrapa minypa ana-goyburrpa nyiburr-molamola nyiburr-ni barra, gala barra minypa gun-nga nyibu-borrwa nyiburr-ni. Ngardawa bitipa wupa nyanma — Wangarr an-gatiya Nyanyapa arrku Waykin A-nirra rrapa Jesus Christ an-gata an-ngayburrpa Bunggawa.
Baylíman Marr A-balcha Rrapa Gurrurta Gu-rrimarra
4Baylíman, a-lay, nipa Wangarr ngaypa ngu-japurramaya nula ngu-workiya, wolawola ngu-wengganacha nggula ngu-workiya. 5Ngardawa janguny guna-jekarra ngaypa ng-galiyarra nginyipa ny-yinmiya marr ny-balcharra nula Bunggawa Jesus rrapa ny-yinmiya gurrurta n-dimanga burrwa Wangarr burr-yika gu-galiya yerrcha. 6Ngaypa ngu-wengganacha nggula ngu-workiya gun-gata nula minypa nginyipa burr-gurdagurdarraja ny-yorkiya Jesus. Minypa ana-goyburrpa mu-nguy barra marn․gi nyiburr-ni gun-gata nula gun-molamola gun-guyinda nipa Wangarr arr-wuna minypa ngayburrpa rrapa nipa Christ gu-ngardapa nguburr-negiyana. 7Ngardawa ngaypa minypa ng-galiyarra nggula nginyipa minypa gurrurta gun-burral jal gun-guni n-dimanga rrapa minypa nginyipa nggula birripa Wangarr burr-yika gu-galiya yerrcha aburr-nyiljinga — gun-narda ngaypa ngu-borrwuja nggula rrapa ngu-marrkapchinga rrapa ngu-nyiljinga nggula, japa.
Paul A-wengganana Baylíman An-guna Nula Anéchimach (Onesimus)
8Rrapa gun-gata ngaypa ngu-marrkapchinga nggula, gun-narda nula ngaypa barra warlwarl ngu-wengga nggula gun-guna janguny ngaypa ngu-rrimanga nggula, marrban ngaypa Christ ngu-yika ngu-mujama rrapa gun-mola apula jimarna jarra burr-guya ngu-wengga nggula minypa nginyipa ny-yinmiya barra. 9Wurra jarra warlwarl ngu-wengga barra nggula ngardawa ngarripa gurrurta ay-rrimanga arrkula gu-gapa gu-guta.
A-lay, ngaypa ng-guna Paul — ngaypa ng-gapula rrapa gun-guniya gugu ngaypa brichina ngunabi-nenga minypa ngaypa ngu-rrimanga Christ Jesus gun-nika janguny — 10ngaypa ngiy-wengganacha nginyipa an-guna nula Anéchimach (Onesimus) an-nginyipa an-mujama nggula. Nipa minypa an-ngaypa an-walkurpa rrapa ngaypa minypa ngu-yigipa ngu-nyanyapa niya. Minypa ngunyuna ngaypa brichina ngu-nirra nipa a-galiyarra apula Christ gun-nika janguny rrapa marr a-balcharra nula.#Gulóchay 4:9 11Mu-ngoyurra nipa gala gun-molamola jama a-jirrarna nggula, wurra gun-guniya gugu nipa an-molamola nggula, rrapa ngaypa burr-guta nipa an-molamola apula.
12Ngaypa ngu-jerrma barra nggula an-guna, wurra wuriya ngaypa burr-guya jal ngu-nirra nula. 13Minypa ngaypa ngunyuna brichina ngu-nirra ngardawa gun-molamola janguny ngaypa ngu-rrimanga, ngaypa jimarn jarra an-guna ngu-rrimangarna barra nipa a-gunggaja apula minypa gun-gata nginyipa nyanma, ngardawa nipa an-nginyipa an-mujama. 14Wurra ngaypa gala ngu-yinmiya ngu-rrima ngaypa wupa, wurra burdak mu-ngoyurra ngiy-wenggana barra nginyipa. Minypa ngaypa jal ngu-nirra nggula nginyipa ny-junggaja barra apula, wurra ngika minypa ngaypa nyanma, wurra minypa nginyipa nguna-borrwurra jarra.
15Wurra an-guna biy-bawuna gun-guna nula waygaji: Minyja barra gun-guniya gugu nginyipa gun-baykarda ny-ja barra rrapa minypa nipa a-nipa barra a-workiya nginyipa ny-murna 16an-nginyipa an-mujama. Wurra gun-narda nula minypa ngardapa ngika, wurra jarra minypa nipa gugu worlapa arrku ngarripa jal arr-nirra nula. Minypa ngaypa jal ngu-nirra nula burr-guya rrapa nginyipa burr-guta burr-guya jal nyi-nirra nula ngardawa an-nginyipa an-mujama, wurpa lika minypa gun-guniya gugu worla nyirri-negachichiya minypa Christ nyjirri-yika.
17Ganapiya, a-lay, lika minyja nginyipa ny-borrwuja ngarripa arr-borrmunga, an-guna nginyipa ny-jonyja barra nula gun-maywapa minypa nginyipa ny-jonyjinga apula ngaypa. 18Minyja nipa a-yinmiyana waygaji werra biy-negarra rrapa biy-gaypuna barrwa barra guna-gurdanyja nggula, wurra mun-narda ny-nyurrja barra apula ngaypa, barra ngaypa ngiy-wu. 19Minyja na, mun-guna ngaypa ngu-wukurrjinga, an-nerranga ngika, wurra ngaypa Paul ngu-wukurrjinga. Gun-nga gun-gata nipa an-guna barra guna-gurdanyja nggula, wurra ngaypa ngiy-wu barra jarra — wuriya jarra nginyipa n-dimanga wanngu gun-guni ngardawa gun-gata ngaypa ngu-ngurrjinga nggula janguny. 20Ngaw, japurra ngapa ny-jirra. Gun-gata minypa ngarripa wugupa Bunggawa arr-yika, gun-narda ngaypa jal ngu-nirra guna-jeka barra apula gun-gunyilja. Nguna-jalkaka, japa, minypa ngarripa rrapa Christ gu-ngardapa arri-negiyana.
21Gu-gurdiya ngacha ngaypa ngu-wukurrjinga nggula ngardawa ngaypa marn․gi nggula nginyipa janguny ny-borrwuja ny-yorkiya. Ngaypa marn․gi nginyipa ny-yirda barra minypa ngaypa ngu-wena nggula rrapa mu-nguy ny-yirdiyapa barra ny-yorkiya. 22Rrapa gun-gata waypa nginyipa ny-jonyjinga nula an-guna Anéchimach, ngaypa rrapa nawanawa nyi-ni barra apula, japurra ngapa ny-jirra. Minypa jarlapa apula gun-ngarnama gu-jinyja barra apula, ngardawa gun-gata ana-goyburrpa nyibu-wengganacha apula nyiburr-workiya Wangarr ngaypa marr ngu-balcharra nula nipa nguna-jerrma barra ana-gorrburrwa.
Gun-gumungba
23Apaprach (Epaphras) an-guna ngatipa wugupa brichina nyirri-nirra ngardawa minypa wugupa nyirri-dimanga Christ Jesus gun-nika janguny, nipa jal a-nirra nggula.#Gulóchay 1:7; 4:12 24Rrapa aburr-ngaypa jawina aburr-guna Mark rrapa Aritárkach (Aristarchus) rrapa Dimach (Demas) rrapa Luk (Luke), birripa burr-guta jal aburr-nirra nggula.#Jama Aburr-ji 12:12,25; 13:13; 15:37-39; 19:29; 27:2; Gulóchay 4:10,14; 2 Dimati 4:10,11
25Jesus Christ an-ngayburrpa Bunggawa nipa wugupa nggula nginyipa ny-nyurrnga.
اکنون انتخاب شده:
Baylíman 1: bvrNT
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 2008, Wycliffe Bible Translators, Inc. All rights reserved.