آیات محبوب کتاب مقدس از Pritčy 3

به اشتراک گذاشتن

Patia zoralés dre Raste-Devléste saré tyré iléstyr, na drieván dopatia péskire godypnaske. Rípir pal Raste-Devléste, sob (kaj) tu te na keresas, i Jov mamuiakirela (keréla priamonesa) tyró drom.

Na sykáv pes godedyr, syr tu san: dar Rástyr-Devléstyr i durjov čoripnástyr.

De patýv Ráske-Devléske saré tyré mištypnástyr, i pervoné barjakirdendyr (plodendyr), so túte vybarjona; i tyré šurny javéna pherdé pherdés i tyré priesy javéna te piričhuvenpe moliasa (vinosa).

Mek te na mekén tut lačhé-ilýtkima i čačipén; phande len trusciál men, začhin len pe tyró iló sýrby pe tablicy tyré iléskire

Míro čhava! Na dykh vučipnástyr, kiéli Raj Devél pharés sykliakiréla tut, adiáke-pac' i na xoliasov zoralés, syr Jov sykliakiréla dukhanes pal doša: pal-dová so Raj Devél sykliakiréla dukhanes pal doša (promekibena) kodolés, kon isyn drógo Léske, adiáke-pac' sýrby dad čhavés, savéske Jov zoralés radynélape.

Miro čhava! Na bistyr, syr me sykliakirava tut, mek tyró iló te rakhél (te rikirelpe) ke miré priphenybená, pal-dová so butýr dyvesá te dživés, dlengo džiibén i ramánjo (miro) javéna upralestyr dyné túke.

Bahtaló isyn kodová manúš, savó jaciá godó, i manúš, kon jaciá but te ĥaljol. Davá isyn fededýr syr te doreses rup, davá isyn kofitkedyr (pribyl'nedyr) suvnakástyr. Godypén isyn drogedyr kuč barendyr, i saré kučipena, so tu ke isyn dróga, nane rávna (šerá) godypnaske.

Na depe pale te kerés lačhipén kodolénge, savénge trej te kerés, kóli davá isyn pir zor tyré vasteske.

Raj Devél Péskire godypnasa sozdyjá phuv, Jov Péskire ĥalyibnasa sozdyjá bolybén.