آیات محبوب کتاب مقدس از Ebərəbá 11

به اشتراک گذاشتن

Yi-ni-zhú mú nʼê yâl e wɔ̀: bə̀ ǹ yě bə̀ ǹ bʼâ nə kɔn dɛ̀bɛ́ ǹ nə́ ǹ dɛ̃̀ mɔ́, sə ǹ yě myɛ ǹdə́ ǹ wu gakó bə̀ wẽ̀ ŋwɛ́nɛ́ rə̀ wɔ́ zhə̀nà, yírhə́ jʼà bə rɛ nɛ yé. Shãã ga lyì bí wɔ́ bə̀ Yi-ni-zhú mú mə̀ ce Yi byili bə̀ bə̀ sú rə̀ yírhə́.

E jà lò mɔ̀bɔ́ ǹ yə̀ Yi ni zhí, ǹ wàr ǹ bʼâ sú rə̀ yírh yé. Lò mɔ̀bɔ́ ǹ nə́ ǹ yâl ń bwəlse Yi yé né, ǹ mə̂ sə́ zwẽ nyí myɛ bə̀ rə̀ nʼê kwɛ̃̌ byɛ̀bɛ́ bə̀ nʼê pyà rɛ̀ mɔ́.

Wɔ́ nə́ gə́ zhí Yi ni mú è ce, nə́ yě bə̀ wɔ́ rə̀ zɔ̀mɛ̀ rɛ́ rə̀ wɛ̀rhɛ́ lũ wə́. Èta, wẽ̀ dé tɛ̀bɛ́ yírhə́ nə mɔ́, wɔ́ tɛ̀bɛ́ yírhə́ bə nɛ mɔ́ dɛnnɛ Yi tó né rə wɛ̀rhɛ́ rɛ.

Abəraham yà ń zhí Yi ni. Wɔ́ rə̀myɛ́ è ce, Yi gə́ byẽ̀ mò, ń shɛ̀nɛ́ n zwẽ nyí, n zhǐr n yẽ̌ ń cìcì cɔ w nɛ, n vò tənà kɛ̀bɛ́ Yi yʼà la mɔ pɔ e jǐrh ńmyɛ̌ nyâ mɔ́ wa. E jà ń yà ń yə̀l ń gə́ la mə̀gã̌ yé. Ń Yi-ni-zhú mú ce n jòm cɔ w Yi yʼà bwəl mo ò nyí mú wə, ǹdə zhə-bal ta, kwə̀ə́rhe wẽ́, ńmyɛ̌ ǹdə́ Yəzakɛ ǹdə́ Zhakɔɔbɛ, bə̀ bə̀myɛ yʼà nɔ Yi nyí-bwəl lé rə̀myɛ́.

Nəwee myɛ yà ń zhí Yi ni. Wɔ́ rə̀myɛ́ è ce Yi gə́ byili mu kɔn dɛ̀bɛ́ rə̀ la wɔ̀rhɔ́ mɔ́, ń yírh jʼà yʼà gwẽ̌ bə rɛ nɛ mɔ́, n zwẽ nyí, n fwar kùlkṍ nánfɔ̀lɔ̀, ńmyɛ̌ ǹdə́ ń kɛ̀lɛ́ y lyì bí zù ò wẽ́ bə mʼe lú. Sə ń gə́ wɛ̀rhɛ́ èta mɔ́, ń kɔ́ lũ w lyì bí bùrsì. Wɔ́ ń Yi-ni-zhú mú è ce Yi nyǐ mu ǹdə ń bə dóó zhe ta.

Enɔkɛ yà ń zhí Yi ni. Wɔ́ rə̀myɛ́ è ce rə kwè mò n vò ń jě rə̀ yala nɛ ǹdə́ ń yə̀ cì yé. Lò lò yírh kʼê yə̀ mɔ nɛ yé, bə̀ Yi kwè mò n vò ń jě rə̀ yala nɛ. Bə̀ kɛ̃ Yi zɔ̀mɛ̀ rɛ́ sɛ́bɛ́ rɛ́ wẽ́ bə̀ Enɔkɛ yà ń sú Yi yírh ǹdə́ rə̀ gwẽ̌ yə̀ mɔ̀ kwè n vò rə̀ sõ yé.

Abyəə yà ń zhí Yi ni. Wɔ́ rə̀myɛ́ è ce ń vwĩ̀ rí ń zwə́l n pə rɛ mɔ́ yí rə̀ pùbùlə̀ du Kɛ̃ɛ̃ nyân dɛ́. Wɔ́ ń Yi-ni-zhú mú è ce Yi zwẽ ń vwĩ̀ pɛnɛ́ y rə mʼe byili bə̀ ń bə dóó zhe yé. Wɔ́ ń Yi-ni-zhú mú myɛ mə̀ ce n cì n jà ń gwẽ̌ nyɛ̌ ǹdə ń ŋwɛ́nɛ́ ń nə́ ń zɔ̀m ta.

Wɔ́ ń kɛ̃ Sara gə́ yà ń zhí Yi ni mú è ce n ŋwɛ̀nɛ́ n lù byǐ ǹdə́ ń yà ń cɛ ga yírh wə, bə̀ ń yà ń yě bə̀ Yi nyí-bwəl lé tʼâ la kwârh yé.

Abəraham yà ń nə́ ń dɛ̃̀ cɔ w kɔ̀bɔ́ Yi cìcì la lú náàcɛ̀nɛ́ mɔ́.

Muyiisi yà ń zhí Yi ni. Wɔ́ rə̀myɛ́ è ce, ń gə́ tú n jǐrh námpwə̂l yi ní, ń yà ń bə shɛ̀ bə̀ bə̀ wál bə̀ wɔ́ Ezhibti lyì pyɔ̌ Faraɔ̃ bə̀kɔ́ byǐ ǹdə́ mɔ yé. Ń gə́ shɛ̀nɛ́ n tó Yi dwí rí ni n zù nɔ̀nɔ̀ wẽ́ mó cɔ̃̀ ń gə nɔ wu-nyɔ̃̀ yə̀-bəlɔ̀lɔ́ wẽ́ o jʼà tʼâ la dɔnɔ yé. Ń pwírí bə̀, ń gə nɔ fulsi ǹdə bə̀ gə́ mə̂ sə bə wɛ̀rhɛ́ Kristə né mó zhe kùr dɛ̃´dɛ̃´ du Ezhibti nə̀cɛ̀ndɛ́, bə̀ ń yà ń nə́ ń tɛ́rɛ́ kwândɛ́ tɛ̀bɛ́ ń la nɔ nəkɔl mɔ́ yò. Wɔ́ ń gə́ yà ń zhí Yi ni mú è ce, ń yə̀ pyɔ̌ mɔ́ ywẽ dùr ǹdə́ Ezhibti ní zhǐr yé. Ń yà ń zhí Yi ni kẽkẽ. Kɔn yʼà nyɛ̌ ǹdə ń yírhə́ yʼà nə Yi rí lò yírhə́ wàr nə̀ nɛ mɔ́ ta.

Yi gə́ yʼà zhẽ̀ Abəraham bə̀ ń zə ń byì-dùwə̀ Yəzakɛ n mə n zwə́l vwĩ̀ n pə rɛ mɔ́, wɔ́ ń Yi-ni-zhú mú mə̀ ce ń yà ń shɛ̀nɛ́ ń la mɔ zwə́l.

Kə-nə̀fòló Arayaabɛ yà ń zhí Yi ni. Wɔ́ rə̀myɛ́ è ce ń yə̀ byɛ̀bɛ́ bə̀ yʼà cẽ Yi nyí ni mú ni tó n cì yé, bə̀ ń yà ń zwẽ Esərayɛl lyì bí bə̀ yʼà twĩ̀ bə̀ bə̀ zhəl bə byɛ́lɛ́ cɔ w mɔ́ cɛ̀nɛ̀.

Esərayɛl lyì bí yʼà zhí Yi ni. Wɔ́ rə̀myɛ́ è ce bə byɛrhɛ mwə̃́ y nánshɔ̃̀ w ǹdə wɔ́ cə-kùlì ta. Sə Ezhibti lyì bí gə́ tú bə yí bə zù bə̀ la byɔrhɔ, nɛ̃̌ mɔ́ jʼa mɔ́lɛ́ bɛ.

Esərayɛl lyì bí yʼà zhí Yi ni. Wɔ́ rə̀myɛ́ è ce bə zhə̀l bə kə́kɛ́lɛ́ Zheriko dwã nyàlpyɛ̀, byílí y è yʼà kə́kɛ́lɛ́ cɔ w mɔ́ gakó jʼa ló tɛ̃´.

È kʼê wɔ́ ń gə́ yà ń zhí Yi ni mú è ce, n ce Esərayɛl lyì bí wɛ̀rhɛ́ Pakɛ címsí, bə zhɛ́rhɛ́ vwàmá nɛ́ jal mɔ́ bə̀ bwə̀rsé bwə̀ə̀lé yó, mùnì ga màlɛ́ka y è la Ezhibti lyì bí byì-cɛsɛ́ gu mú bə̀kʼa gu Esərayɛl lyì bí byì-cɛsɛ́ yé.

Zhozefu yà ń zhí Yi ni. Wɔ́ rə̀myɛ́ è ce, ń gə́ tú ń la cú, n zɔ̀m yi rí tɛ̀bɛ́ Esərayɛl lyì bí la Ezhibti ní zhǐr mó yò, n zɛ̃̀ n byili bə̀ gə́ mə̂ sə bə wɛ̀rhɛ́ mɔ nɛ́ ǹdə́ ń gə tú ń cùwə̀.

Zhakɔɔbɛ yà ń zhí Yi ni. Wɔ́ rə̀myɛ́ è ce, ń cu mú gə́ tú e bwəlse, ń bwəl cɛ̀nɛ̀ n pə Zhozefu byâ bɛ́ nɛ n twèlé dwã nɛ, n zɛ̃̀ n cìì ń də̀-dɔ̀lɔ̀ w tɛ̃´ n wùlì tɛ̃´ n cèrhé Yi.

Yəzakɛ yà ń zhí Yi ni. Wɔ́ rə̀myɛ́ è ce n bwəl kɔn dɛ̀bɛ́ rə̀ yʼà gwẽ̌ bàn n pə Zhakɔɔbɛ ǹdə́ Ezəyu ni.