Robertson Moedergemeente

Lofsang
Lied 188: 1 - 3
Kom, dank nou almal God
met hart en mond en hande;
loof Hom wat wonders doen
tot in die verste lande.
Van vroeg, van kindsbeen af,
het Hy ons trou bewaar
en tot vandag toe nog
geseën en gespaar.

O God, so ryk en goed,
gee ons solank ons lewe
altyd 'n blye hart;
as dit u wil is: vrede.
Laat u genade ons
beveilig teen gevaar,
in donker ure ons
van struikeling bewaar.

Lof, eer sing ons voor God,
die bron van alle lewe -
die Vader, Seun en Gees,
almagtig en verhewe.
Drie-enig God, ons roem
u krag en majesteit.
O Heer, ons wil U noem:
ons God in ewigheid!

VONKK 42 (2x)
Jubilate! Loof die Here!
Almal op die hele aarde kom
en dien die Here met gejubel,
kom voor Hom en prys sy heil’ge Naam.
Gaan sy tempel in met vreugde,
juig en sing, kom dank die Heer,
want aan sy liefde is geen einde.
Loof die Here, almal saam!

VONKK 2: 1 - 2
Kom juig oor God, sing almal saam!
Kom, alle mense, roem sy Naam!
O God, hoe groot is al u werk,
u reddingsdade onbeperk.
Die volk van God beleef u krag
en juig vir ewig oor u mag.

Kom juig oor God, sing almal saam!
Kom, alle mense, roem sy Naam!
In vuur en vloed het ons gely,
maar God het ons daaruit bevry.
My danklied loof Hom oor en oor,
want God het my gebed verhoor.

Aanbidding

Lied 286: 1
Here God van liefde,
waar ons ook mag gaan,
wil ons in u skadu by U staan.
Hoor ons dankgebede,
hoor ons loflied styg
as ons aan U ons dank betuig.

Here, u genade het ons hier behou,
in u hand van liefde vasgehou.
Moet nooit van ons wyk nie,
skenk aan ons u seën -
Here laat ons nooit alleen.

Heer Jesus, laat ons nooit alleen,
ons wil vir ewig op u almag steun;
want elke knie sal buig
en elke hart sal juig.
Here Jesus, neem ons bede aan.

VONKK 72: 2 - 3
Wees stil, want die heerlikheid van God
skyn oral rondom ons.
Hy is met eer gekroon,
met mag en majesteit.
Uit Hom straal helder lig –
‘n glans wat als verlig.
Wees stil, want die heerlikheid van God
skyn oral rondom ons.

Wees stil, want die Here God van mag
is werksaam om ons heen.
Hy neem ons sonde weg,
genees ons grootste seer.
Niks stuit die Gees se werk
of kan sy krag beperk.
Wees stil, want die Here God van mag
is werksaam om ons heen.

VONKK 120: 1 & 3
Soos ‘n wildsbok wat smag na water
smag my siel na U, o Heer.
U alleen is my hartsverlange
en ek bring aan U die eer.
U alleen is my bron van krag;
in u teenwoordigheid wil ek wag.
U alleen is my hartsverlange
en ek bring aan U die eer.

Al is U ook die Hemelkoning,
U’s my vriend, my broer, my Heer.
U verdien al my eer en liefde,
daarom buig ek voor U neer.
U alleen is my bron van krag;
in u teenwoordigheid wil ek wag.
U alleen is my hartsverlange
en ek bring aan U die eer.

Offergawes
As jy verkies om jou offergawes per EFT te doen, hier is ons bankbesonderhede:
NG Kerk Robertson
ABSA takkode: 632 005
Rekeningnr: 1200 5800 08
Verwysing: Kollekte 14/02/2021

Afkondiginge
Produktemark 26/27 Februarie
Huweliksretraite

SONDAGSKOOL begin 21 Febr, ouers moet kinders inskryf (alle kinders, al is die kinders reeds in ons Sondagskool.... Ons moet data opdateer). Aanstuur na kerkkantoor se e-posadres - ngkrobkantoor@lando.co.za
Ons sal Maandag inskrywingsvorms e-pos aan ouers van wie ons nog nie iets ontvang het nie. Dui asb duidelik aan wie die kontakpersoon moet wees🤭🤭🤭

ALMANAKKE kan afgehaal word by die kerkkantoor, indien u dit nog nie ontvang het nie.

PRODUKTEMARK: Hulp word benodig met verpakking van produkte Donderdag 25 Febr.
Ons soek asb BROODBAKKERS wat kan help brood bak vir P/mark. Ons lidmaat/e raak ouer en kan nie al die brode voorsien vir die aanvraag nie.
BAKSTERS vir koeke en terte kan met Elana Bruwer skakel. POEDINGS - skakel asb met Rita Bruwer.
Hulp by BETAALPUNTE, kontak Liz de Vries.
Enige produkte, skenkings en/of bestandele kan by die kerkkantoor afgegee word of tref reëlings met die onderskeie sameroepers.

Slotlied
VONKK 79: 1, 4 & 5
Genade, so oneindig groot,
gee U, o Heer, vir my.
Ook ek, verlore sondaarmens,
word van my skuld bevry.

Ek loof U vir genade, Heer,
so onverdiend aan my.
Vergifnis gee U keer op keer
as ek my skuld bely.

Nou leef ek daagliks uit u hand,
my hart na U gekeer.
Met al my gawes en verstand
wil ek U dien, o Heer.


Seën
VONKK 144: 1 - 3
Vrede van God, die vrede van God,
die vrede van God is met jou.
Vrede van God, vrede van Hom,
die vrede van God is met jou.

In Jesus Naam, in Jesus Naam,
in Jesus se Naam gee ek jou:
Vrede van God, vrede van Hom,
die vrede van God is met jou.

Heilige Gees, die Heilige Gees,
die Heilige Gees is met jou.
Vrede van God, vrede van Hom,
die vrede van God is met jou.