Ooskerk Oggenddiens

Inleiding

As voorbereiding vir die viering van Paasfees, het daar tydens die tweede eeu nC die gebruik ontstaan om op die Saterdag vóór Paassondag te vas en ’n nagwaak te hou wat tot in die vroeë oggendure van die Sondag geduur het. Dopelinge wat vooraf voorberei is, is tydens dié geleentheid gedoop. Hierdie voorbereiding het ’n tydperk van vas en toewyding behels. Hoewel aanvanklik net die dopelinge gevas en hulleself voor God verootmoedig het, het diegene wat hulle begelei het, dit ook begin doen. Weldra het almal wat deel van die gemeente was, hieraan begin deelneem. So het ’n tyd van voorbereiding met die oog op die viering van die Paasfees ’n instelling geword. Mettertyd het veral die week voor Paasfees besondere klem ontvang en is dit ingerig as ’n tyd van vas. Die viering van wat vandag as die groot lydensweek (of: die heilige week) bekend staan, het ’n baie vroeë oorsprong. Die vier Evangelies wy ’n buitengewoon groot deel van hulle vertellings aan die gebeure van hierdie week. Dit dui daarop dat dit reeds in die tweede helfte van die eerste eeu ’n belangrike rol in die herinnerings van die vroeë Christene gespeel het. In die reisverhaal van die Spaanse non, Egeria, wat uit die tagtigerjare van die derde eeu dateer, lees ons van die vierings tydens die Groot Lydensweek in Jerusalem wat in groot besonderhede ooreenstem met die hedendaagse praktyk: die viering van Jesus se intog.