Bene Efeso 6
6
Bashali abaana mbobeelete kwikala
1Nobaana ceebo mulashoma muMwaami Jesu, mulyeelete kunyumfwila bashali banu mukwiinga cililuleme kucita boobo.#Kolo 3:20 2Malembo akwe Lesa alaamba ayi, “Lemeka baiso abanyoko.” Uyu ngomulawo utaanshi muli kushomesha kwa Mwaami Lesa. 3Kushomesha uku nkwakwaamba ayi, “Na mwacita boobo, mulaakuba acoolwe mushintu shoonse alimwi akwikala myaaka iinji mucishi.”#Kulo 20:12; Duto 5:16
4Amwebo nobashali, mutanoolela bana banu munshila yakubakalasha. Sombi mulyeelete kubalela cakunoobeeisha akubalwiita nshebeelete kucita mubwikaalo bwa bwine Klistu.#Kolo 3:21
Bamaami abasha babo mbobeelete kwikala
5Amwebo nobasha, mulyeelete kunyumfwila bamaami banu ba mucishi ca panshi cakubalemeka akubaloonda. Mulyeelete kucita nshebamulwiita amoyo womwi bweenka mbweenga mwasebensela Klistu. 6Mutanoocitabo boobo na kabamubwene kwaamba ayi bamuluumbe. Sombi mukwiinga muli basebenshi bakwe Klistu, mulyeelete kucita sheesho Lesa nshaasuni ankusu shanu shoonse. 7Amubasebensele ncito yanu ya busha cakusangalala bweenka mbweenga mwasebensela Mwaami Jesu, kuteshi anga mutoosebenselabo bantu 8mukwiinga mulishi ayi Mwaami ulaakupa muntu cilambu pamulimo ubotu ngwaacita, musha nabi uteshi musha.#Kolo 3:22-25
9Amwebo nobamaami, mucite bweenka ubo kubasha banu alimwi mutanoobakonga. Amwishibe kwaamba ayi balo alimwi amwebo, mulicitebo Mwaami womwi uli kwiculu utasalululi.#Kolo 4:1; Duto 10:1; Kolo 3:25
Bene Klistu balyeelete kukoma bubi
10Cakweelaako ncakwaamba ayi, nobamakwesu amuyume muMwaami Lesa kwiinda munkusu shakwe shiindaawo. 11Amufwale shakulwanisha shoonse isho Lesa nshaamupa, kwaamba ayi mukacikoonshe kulwana maano a bucenjeshi bwakwe Satana. 12Mukwiinga tatutoolwana abantu, sombi tutoolwana ankusu sha mishimu ibiibi ya mwiculu, iyo yeendelesha alimwi icite nkusu, mishimu iyo yeendelesha bantu munshiku shino shili anga ngumunshinshe. 13Paceebo ceeco amufwale shakulwanisha isho Lesa nshaamupa, kwaamba ayi mukacikoonshe kulwana cakutaboola pesule pabushiku bwa kushikilwa bubi. Mwaakumanisha kulwana, mulaakushimpa.
14Aboobo amuyume, mufwaale lushinisho anga ngulaamba mubukome. Amufwale bululami anga ncakufwala ca ceela pacaamba.#Isa 11:5; Isa 59:17 15Kulibambila kwanu kwa kushimikila Makani Abotu a luumuno kube anga ninsapato nshemufwala.#Isa 52:7 16Kwiilikaawo, amunyamune lushomo anga ndiyawo ndyeenga mwashimishishako mifwi inyaka mulilo iyo iwaala Satana. 17Alimwi amunyamune lupulusho anga ncimpoompo cakumutabilishaako alimwi mutambule maswi akwe Lesa kuswa kuMushimu Usalashi ayo eshi abe anga ngumupeeni.#Isa 59:17 18Kamupaila pakucita shintu shoonse ishi. Kunoosenga Lesa kwaamba ayi amucaafwe. Paciindi coonse kamupaila kweelana aMushimu Usalashi mbweenga wamutanjilila. Paceebo ceeco amucenjele, mutatyongooki napaceyi. Lyoonse na mutoopaila, kamupaililako bashomi boonse. 19Anebo kamumpaililaako kwaamba ayi andwiite maswi ngoonjelete kwaamba pakushimikila, ayi nshibishe bantu isho shakalinga kushisitwe paMakani Abotu cakutaloonda. 20Ono kwaamba ayi bantu baanji beshibe Makani Abotu, nebo ndi mutumwi wakwe Jesu Klistu, nabi pacecino ciindi ndi muntolongo. Amumpailileeko kwaamba ayi mbe ankusu shakushimikila Makani Abotu cakutaloonda kweelana ambonjelete.
Maswi akweelaako
21Taikikasi mukwabesu usunikwi ulaakwisa akamulwiite shoonse shapali ndime alimwi ansheencita. Lakwe ngumusebenshi ushomeka mumilimo ya Mwaami.#Mili 20:4; 2 Timo 4:12 22Nceceeco ncentoomutumina kooko kwaamba ayi amulwiite mbuli mbotubete alimwi akwisa mukumuyumya.#Kolo 4:7-8
23Lesa Ishiwesu alimwi aMwaami Jesu Klistu bape bashominyineesu boonse luumuno, lusuno alimwi alushomo. 24Alimwi luse luswa kuli Lesa lube abaabo boonse basuni Mwaami wesu Jesu Klistu alusuno lutamaani.
Currently Selected:
Bene Efeso 6: BBBLI
Highlight
Share
Copy
Want to have your highlights saved across all your devices? Sign up or sign in
Lenje Bible with Deuterocanon © Bible Society of Zambia, 2003.