Bene Efeso 5
5
Tulyeelete kwikala mumumuni
1Ono mukwiinga muli bana bakwe Lesa abo mbaasuni, mulyeelete kukonkela mibo yakwe. 2Shoonse nshemucita, shilyeelete kutondesha lusuno bweenka mbuli Klistu mbwaakatusuna. Wakaaba buumi bwakwe ceebo ca ndiswe akuba anga ncipo ca bweema bubotu alimwi anga ncipo ca munyama wakutenta cikondelesha pameenso akwe Lesa.#Kulo 29:18; Kulu 40:6
3Ceebo muli bana bakwe Lesa, bufuule, kucita shintu shitaluleme alimwi akukumbwa camunyono shintu sha bamwi bantu, tasheelete kwaambwa pakati kanu, sobwe. 4Tamweelete kwaamba shintu shilensha nsoni, shabuluya nabi shiteelete, sombi kamwaambabo makani akulumba Lesa. 5Mulyeelete kwishiba cancinencine ayi taakuuwo mufuule, uyo ucita shitaluleme, nabi shikukumbwa camunyono shintu sha bamwi (mukwiinga lunkumbwa lwa munyono lulaba ngolesa wabo) weshi akatambuleko Bweene bwakwe Klistu alimwi aLesa.
6Mutaleeki muntu nabi womwi ayi amucenjeeke kwiinda mumaswi atacite ncito mukwiinga sheenka shintu ishi nsheshilengesha Lesa kuba abukali pabantu abo batamunyumfwili. 7Paceebo ceeco mutanokweenda abantu ba mushobo wooyu. 8Kale kale mwebo mwakalinga mumunshinshe, sombi bulya muli mumumuni mukwiinga mwakaba bantu ba Mwaami. Aboobo mulyeelete kwikala anga mbantu bekala mumumuni. 9Mukwiinga mumuni uyu ngoolengesha bantu kwaamba ayi bacite shintu shoonse shibotu, shiluleme alimwi ashalushinisho. 10Anu amwiiye kucita shintu shikondelesha Mwaami. 11Mutabiko lubasu kushintu shitacite ncito sha mumunshinshe isho shicita bantu bamwi. Sombi mwebo mulyeelete kushileta kumumuni. 12Cilalensha nsoni akwaamba shintu shicita bantu batanyumfwili Lesa mubushishi. 13Sombi mumuni ulayubulula shintu shoonse, lyalo bantu balashibona patuba mboshibete. 14Mukwiinga mumuni ulalengesha ayi shintu shoonse shiboneke. Nceceeco ncebaambila ayi,
“Buka webo noolete,
buka kuswa kubafu
lyalo Klistu ulaakulengesha ayi ube mumumuni.”
15Anu mulyeelete kucenjela mubwikaalo bwanu. Mutekaali anga mbantu batacite lushibo, sombi anga mbantu basongo. 16Muciindi coonse mulyeelete kucita shintu shibotu mukwiinga shino nshiku shabica.#Kolo 4:5 17Paceebo ceeco mutabi anga mbantu baluya, sombi amweeleshe kwishiba sheesho Mwaami Lesa nshaasuni ayi mucite.
18Amucileeke kukolwa uko kweshi kukamunyonyoolebo, sombi amusushikwe aMushimu Usalashi. 19Mulyeelete kwaamba kuli womwi awomwi mumaswi a kulumbaisha, nyimbo sha kulemeka alimwi ashimwi sha kulumbaisha Lesa. Kamwiimbila Mwaami cakukondwa amoyo woonse. 20Kamulumba Lesa Ishiwesu muliina lya Mwaami wesu Jesu Klistu ceebo ca shintu shoonse.#Kolo 3:16-17
Bantu mbobeelete kwikala mucikwati
21Ceebo mulalemeka Klistu, mulyeelete kunyumfwana. 22Mwebo nobanakashi, mulyeelete kunoonyumfwila bameebaanu bweenka mbuli mbomunyumfwila Mwaami Jesu.#Kolo 3:18; 1 Pita 3:1 23Mukwiinga musankwa ulicite nkusu pamukaakwe bweenka mbuli Klistu mbwaacite nkusu pacoonde, cili ngomubili wakwe alimwi Klistu mwiine ngoMupulushi wa coonde. 24Paceebo ceeco, mwanakashi woonse ulyeelete kunoonyumfwila ibaye mushintu shoonse bweenka mbuli coonde mbocinyumfwila Klistu.
25Amwebo nobasankwa amusune bamakaanu bweenka mbuli Klistu mbwaakasuna coonde akwaaba buumi bwakwe ceebo ca ncico#Kolo 3:19; 1 Pita 3:7 26kwaamba ayi acisalashe. Wakacisalasha ndyaakacisansha amaanshi kwiinda mumaswi akwe. 27Wakasuna ayi coonde cibe caakwe mwiine abulemu bwa ncico, cibe anga ngumuntu utacite kampenda nabi bubi buli boonse, utacite cintu nabi comwi cakumubisha, sombi kacisalalite alimwi kaciluleme. 28Nkokwaamba ayi basankwa balyeelete kusuna bamakaabo bweenka mbuli mbobasuni mibili yabo. Uyo usuni mukaakwe, ulilisuni mwiine. 29Mukwiinga taaku muntu upatite mubili wakwe, sombi uloosanina akuulama kabotu. Mbweekoobo Klistu mbwaacitila coonde 30ico cili ngumubili wakwe alimwi swebo tuli shipansha sha mubili wakwe. 31Kweelana ambokulembetwe muMalembo akwe Lesa ayi, “Aboobo musankwa ulaakushiya ŋanda ya baishi abanyina akuya mukupaankana amukaakwe, lyalo bobilo aba balaakuba mubili womwi.”#Mata 2:24 32MuMalembo aya muli cikani cinene calushinisho ico calinga kushishitwe. Ndishi kwaamba ayi alaamba pali Klistu alimwi acoonde. 33Nakubi boobo alaamba apali ndimwe. Musankwa uli woonse ulyeelete kusuna mukaakwe bweenka mbwaalisuni mwiine. Alakwe mwanakashi ulyeelete kulemeka ibaye.
Currently Selected:
Bene Efeso 5: BBBLI
Highlight
Share
Copy
Want to have your highlights saved across all your devices? Sign up or sign in
Lenje Bible with Deuterocanon © Bible Society of Zambia, 2003.