GENESIS EFALOMO
EFALOMO
Edhina Genesis, otali ti: ‘etameko, nenge eshito’. Embo ndika otali popi eshito lyuuyuni, etameko lyaantu, okuyona kwotango, eso nomaehamo nkene ge ya muuyuni nomukalo gwaKalunga gwokukalathana naantu. Embo Genesis otali vulu okutopolwa miitopolwa iinene iyali: (1) Oontopolwa 1-11: Eshito lyuuyuni nondjokonona yonakuziwa yoludhi lwomuntu. Mpano opu na omahokololo taga popi Adam naEva, Kain naAbel, Noa neyelu nOshungo yaBabel. (2) Oontopolwa 12-50: Ondjokonona yonakuziwa yoohekulu yAaisraeli. Hekulu gwotango oAbraham, ngoka a li e na eitaalo (einekelo) nevuliko kuKalunga. Nena okwa landula ehokololo tali popi omwana Isak nomutekulu Jakob, i ithanwa nedhina limwe Israel, naana yaJakob omulongo nayaali, mboka ya li aatoti yomazimo gaIsrael omulongo nagaali.
Gumwe gwomoyana ngoka e na okukonekwa unene oJosef niiningwanima mbyoka ya thiminike Jakob pamwe noyana yalwe nomagumbo gawo ya tembukile kuEgipiti. Embo ndika itali popi owala omahokololo kombinga yaantu, ihe meha lyotango otali popi shoka Kalunga a longo. Otali tameke nokukoleka kutya uuyuni owa shitwa kuKalunga, notali hulitha neuvaneko kutya Kalunga ota tsikile nokusila aantu ye oshimpwiyu. Ngoka e na okutongololwa membo ndika alihe oKalunga, ngoka ta pangula nota geele mboka taa yono, ta wilike nota kwatha aantu ye, ta kwata miitomo yonkalamwenyo yawo. Embo ndika tali popi onakuziwa yuuyuni olya nyolwa, opo li tu ulukile eitaalo lyaambeya, tse tu kwathwe tu kale neitaalo li na omwenyo.
Elandulathano lyoshikalimo
Eshito lyuuyuni nolyaantu 1:1—2:25
Okuyona kwotango nomaehamo 3:1-4
Okuza kuAdam sigo Noa 4:1—5:32
Noa neyelu 6:1—10:32
Oshungo yaBabel 11:1-9
Okuza kuSem sigo Abram 11:10-32
Oohekulu: Abraham, Isak, Jakob 12:1—35:29
Aana yaEsau 36:1-43
Josef naamwahe 37:1—45:28
Aaisraeli muEgipiti 46:1—50:26
Dewis Presennol:
GENESIS EFALOMO: ONDB
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
Oshindonga Bible © Bible Society of Namibia, 2008.