Yohanes 19
19
1Pada anaꞌa Pilatus nowowoꞌomo Yesus maka netudumo mie dahumambisiane habuta. 2Tantaraꞌi dekinianemo songko peda songkono omputo maiꞌao ne haꞌano sau kokihi maka dofokanae ne fotuno bhe dofopakeane dhuba wungo. 3Poowa dodhulupie dopugaumo ambado, “Somba Waompu, omputo miendo Yahudi!” bhe dobhantofae. 4Pilatus nolimbamo toha nofohato mie bhahi ambano, “Aitu amolimbaangkoeꞌomu, neanomo mandeꞌaaneomu miina sepaliꞌa aepoꞌawaꞌao kaꞌalano.” 5Palusi anaꞌa Yesus nolimbamo nepake songko kokihi bhe dhuba wungo. Ambano Pilatus, “Ainiꞌaemo mieno.” 6Neangkaꞌindo imamu bhe dhagaꞌino Lambuno Lahataꞌala dokeimo ambado, “Kantaiꞌe, kantaiꞌemo te sau salipu.” Ambano Pilatus, “Alaemoomu maka kantaiꞌe wutomiu te sau salipu, kapaꞌamo idi miina sepaliꞌa aepoꞌawaꞌao kaꞌalano.” 7Ambado miendo Yahudi, “Insaodi bhe tubhono agama mani; ane damangkafi tubho anaꞌa, tetewei namate mbaꞌinomo nokona wutono Anano Lahataꞌala.”
8Nofetingke pugau anaꞌa Pilatus dhulu kateꞌino. 9Nopesuamo toha weo kamali bhe nopugau ambano, “Maiꞌao ne amai gahaꞌa?” Tamaka Yesus miina natumobhoosiea. 10Nopugaumo Pilatus ambano, “Gahaꞌa kiido pugau bhe idi? Miina mandeꞌaanea bhahaa, idi inia akokuasa amolapako, akokuasa dua akumantaiko te sau salipu?” 11Notobhoosimo Yesus ambano, “Hintu ini miina sepaliꞌa kokuasa ne Idi ini, ane kuasa anaꞌa pae namaꞌangkoe Lahataꞌala. Dadiꞌanomo mie mowa kanau ne limamu, nobhala dhosano anoa bhe hintua.” 12Notanda ne naꞌa Pilatus noꞌulei lalono namolapa Yesus, tamaka miendo Yahudi dopokakei-kei ambado, “Ane molapa anoa itu, hintu suanomo sabhangkano Omputo Kaisar. Sasuka kumonano wutono omputo ingka noewangi Omputo Kaisar.”
13Nofetingke pugau anaꞌa, Pilatus nowowoꞌomo toha Yesus we simbali maka nengkoha ne kaengkohaꞌa kaebhotusiꞌa. Kaengkohaꞌa naꞌa nekonando Ale Kontu, weo wamba Ibrani dokonae Gabata. 14Oleo hambi-hambi ompulu haa matamo ne oleo kaefotokaꞌa hohaeaꞌano Paska. Nopugaumo Pilatus ne miendo Yahudi ambano, “Aini omputomiu.” 15Gahaꞌa andoa tadopokakei-keimo ambado, “Pongkomo, pongkomo! Kantaiꞌe te sau salipu!” Ambano Pilatus, “Omputomiu akumantaiꞌe te sau salipu?” Dotobhoosimo neangkaꞌindo imamu, “Miina bhe omputo mani, mpahinomo Omputo Kaisar!” 16Panda-pandano Pilatus nowaꞌandamo Yesus dakumantaiꞌe te sau salipu. Dadiꞌanomo dokalaanemo.
Yesus dokantaiꞌe te sau salipu
19:17-27
Mat 27:32-38; Mrk 15:21-27; Luk 23:26, 33-43
17Poowa notongku sau salipuno, Yesus nolimbamo we simbalino kota nohope te kabhawo nekonando Kaꞌuada. Weo wamba Ibrani dokonae Golgota. 18Ne itumo Yesus dokantaiꞌe te sau salipu. Nandoo dua mie dohodua dokantaida dopoowa-owa bhe Anoa, seemie ne kema, seemie ne suana, Yesus dofewuntaane. 19Pilatus notududamo dua daefopikaane kabuhi te sau salipu naꞌa. Wambano buhi naꞌa peda aini, “ Yesus miendo Nasaret, Omputo miendo Yahudi.” 20Dobhahi miendo Yahudi basano kabuhi anaꞌa, mbaꞌinomo kabhawo katikantaiꞌano Yesus te sau salipu nokomaꞌo bhe kota, pakade kabuhi anaꞌa dobuhiane wamba Ibrani, wamba Latin bhe wamba Yunani. 21Dopugaumo neangkaꞌindo imamu miendo Yahudi ne Pilatus ambado, “Koise buhiane ‘Omputo miendo Yahudi’, tamaka buhiane, ‘Ambano mie aini, Idi ini Omputo miendo Yahudi.’ ” 22Pilatus tanotobhoosi, “Nebuhiku, tokamo notibuhi.”
23Pada dokantai Yesus te sau salipu, tantara naꞌa doalamo pakeano Yesus maka dofefatodawue, seemie sedawu. Dhubano doalae dua, gahaꞌa dhuba anaꞌa miina nakokasapua, nomaiꞌao te wawo ampa we panda kamoohuno sesau kaowu. 24Dadiꞌanomo tantaraꞌi dopugaumo sapada-pada andoa ambado, “Koemo dobhini-bhinieꞌomua, naetaa dapodaduane bhahaꞌi naꞌumawae laꞌae.” Kanandooꞌano peda naꞌa somo nokoꞌulaꞌao wambano Kitabi, “Andoa dodawu-dawu pakeaku, dhubaku dopodaduane.” #Mzm 22:18 Pedamo anaꞌa nehabundo tantaraꞌi maitu.
25Ne owano sau salipuno deehe-ehe inano Yesus bhe hobhine kakutaꞌano inano, Maria hobhineno Kleopas bhe Maria Magdalena. 26Nowoha inano bhe anaguhu kamoasiꞌaono, Yesus nopugaumo ne inano ambano, “Ina, aituꞌaemo anamu!” 27Pada anaꞌa nopugaumo ne anaguhu kamoasiꞌaono ambano, “Aituꞌaemo inamu!” Notandamo ne naꞌa anaguhu maitu nofoatemo Maria weo lambuno.
Kamateꞌano Yesus
19:28-30
Mat 27:45-50; Mrk 15:33-37; Luk 23:44-46
28Pada anaꞌa, Yesus nopandeꞌaanemo bhahi-bhahiꞌae nopalusimo. Dadiꞌanomo nopugaumo ambano, “Nokekele wuꞌuku!” Kanandooꞌano peda ini somo nakoꞌulaꞌao wambano Kitabi. #Mzm 22:15, 69:21 29Ne itu nandoo bhe kaenteiꞌa noponoꞌao angguru mokolo. Dadiꞌanomo defolondoanemo kapa, #19:29 Sakotuꞌuno: spons , kambeano pasi momalu. doteiꞌe ne wulu #19:29 Sakotuꞌuno: laano hisop. maka dofoampee ne wiwino Yesus. 30Pada nofenami angguru mokolo naꞌa, Yesus nopugaumo ambano, “Notokamo!” Pada anaꞌa nofolongkomo fotuno maka nofotawakala inawano, nobhotumo.
Yesus dokahadae ne tompano kaha-kahano
19:31-37
31Miendo Yahudi dokiido maeatindo mie nekantaindo te sau salipu tasantaimo ne oleono Sabat. Kapaꞌamo katisalipuꞌano Yesus tana seꞌoleo oleono Sabat, pakade oleono Sabat maitu nopokantibha bhe hohaeaꞌa bhalano. Dadiꞌanomo miendo Yahudi desalomo ne Pilatus naetudu tantara datumampuli aꞌendo mie nekantai naꞌa maka damosampu maeatindo. 32Dokalamo tantaraꞌi dotampuli deki aꞌendo mie hoduano tikantaino te sau salipu poowa-owano bhe Yesus. 33Tamaka dohato ne Yesus, dowohae ingka gahaꞌa nomatemo, sampe miinamo datumampuliea aꞌenoa.
34Seemie ne olotando tantara maitu nokahadamo tompano kaha-kahano Yesus, lasao nekamawa hea bhe oe. 35Mie mohaꞌaono wuntano matano nosakusiiꞌao kadhadhia amaitu, neanomo hintimiu ⸤ mebasano bhe metingkeno⸥ marasaeaꞌomu dua. Kasakusiino naꞌa nokotuꞌu, nopandeꞌaane dua wutono nokotuꞌu daano. 36Kapaꞌamo kosasawiꞌae maitu nokadhadhia somo nakoꞌulaꞌao tibuhino weo Kitabino anabii, “Pae bhe bukuno so netampundo.” #Kel 12:46; Bil 9:12; Mzm 34:20 37Nandoo dua wambano Kitabi peda ini, “Andoa daꞌumondo-ondo mie nekahadando.” #Zak 12:10; Pow 1:7
Yesus dokobuhue
19:38-42
Mat 27:57-61; Mrk 15:42-47; Luk 23:50-56
38Nopalusi anaꞌa nomaimo Yusuf mieno Arimatea. Anoa ini anaguhuno Yesus, tamaka miina naefemata-mataa hampano noteꞌi miendo Yahudi. Kamaiꞌano nesalo ne Pilatus namala maeatino Yesus. Pilatus noꞌundaꞌaane, dadiꞌanomo lasao nokala noala maeatino Yesus. 39Nohatomo dua Nikodemus. Anoamo ini endefiꞌini maino kohondoꞌa ne Yesus. Nomai newowoꞌo kakunsalono mina-mina kawondu nekonando mur bhe gaharu, napemoꞌono litere kabhahino. 40Andoa doalamo maeatino Yesus, dowaluane bhalatu moꞌalusu, dopowaluane bhe mina-mina kawondu amaitu, doangkafi adhatindo miendo Yahudi dekobuhu mie mate.
41Ne owano katikantaiꞌano Yesus te sau salipu nandoo sehaꞌa kaendea, ne itu bhe lia kafokobuhuꞌa buꞌou, tapaꞌo tipakeno. 42Mbaꞌinomo nahumatomo oleono Sabat nefintahakindo miendo Yahudi, pakade kobuhu anaꞌa miina nakokodoꞌoa, maka Yesus dokobuhuemo ne itu.
Dewis Presennol:
Yohanes 19: mnbSD
Uwcholeuo
Copi
Cymharu
Rhanna
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
© 2022, Wycliffe Bible Translators, Inc. All rights reserved.