मरकुस 12
12
अँगूरा की बाड़ी का ठेकेदार
(मत्ती 21:33–46; लूका 20:9–19)
1ईसु बाऊँ मिसाल देर खेबा लाग्यो, “एक बार अंय्यां होयो एक मिनख अँगूरा को बाग लगायो अर बि बाग क च्यारूमेर बाड़ बांदी। अर बठैई अँगूरा को रस काडबा ताँई कूंड अर निगरानी करबा ताँई एक मचाण बणायो। अर इकै पाछै बो इ बागनै ठेका प देर दिसावर चलेगो। 2अँगूर पकबा की रुत म बो मिनख दिसावरऊँ आपका दासनै बा किसाना क कनै अँगूरा का बाग म भेज्यो जिऊँ बे बा किसानाऊँ अँगूरा को हिसाब ले सकै। 3पण बे किसान बि दासनै पकड़र मार्या अर बिनै रितोई भेज दिओ। 4इकै पाछै अँगूरा का बाग को मालिक दुसरा दासनै बठै भेज्यो पण बे किसान बिनै बी मार्या अर बिको सीर फोड़र बिकी बेजती कर्या। 5बो मालिक तीसरा दासनै बठै भेज्यो पण बे किसान बि दासनै मार गेर्या। अंय्यांई बो बोळा दासानै भेज्यो पण बे किसान कयानै तो पिट्या अर कयाकी जान लेली। 6इकै पाछै बि बाग का मालिक क कनै भेजबा ताँई बिको लाडलो बेटोई बच्यो। अर बो आ सोचर क बे इको तो आदर करसी। इ बजेऊँ बो आपका बेटानै बठै भेज्यो। 7बे किसान मालिक का बेटानै आतो देख आपसरी म बतळाबा लाग्या, ‘ओ अठै को वारिस ह। आओ आपा मिलर इनै मार देवां। अंय्यां करबाऊँ अँगूरा को बाग आपणो होज्यासी।’ 8अर बे सगळा किसान मिलर बिनै मार दिओ अर अँगूरा का बाग क बारनै बगा दिओ। 9इ बातनै सुणर अँगूरा का बाग को मालिक बा किसाना क सागै काँई करसी?” बो बठै ज्यासी अर बा किसानानै मारसी अर अँगूरा को बाग दुसरा किसानानै दे देसी। 10थे सास्तर म ओ बचन कोनी बाच्यो के:
“जि भाठानै कारिगर ख्याई जोगो कोनी जाण्या बोई भाठो कूणानै समाबाळो निकळ्यो। 11अर ओ आँख्या क सामै अजूबो ह इनै परबु कर्यो ह।”
12बठै खड़्या सास्तरी समजगा क ओ आ मिसाल बापैई बोली ह। इ बजेऊँ बे ईसुनै केद करबा ताँई कोई गेलो ढुंढबा लाग्या। पण बे मिनखाऊँ डरता हा जिऊँ बे बिनै बठैई छोडर चलेग्या।
चुंगी देबा की सीख
(मत्ती 22:15–22; लूका 20:20–26)
13बे ईसुनै फसाबा ताँई फरिसीया अर हेरोद का गुट का क्युंक मिनखानै बिकन भेज्या। 14बे ईसु कनै गया अर बिऊँ बोलबा लाग्या, “ओ गरूजी म्हें जाणा हां क तू बोळो ईमानदार ह अर तू इ बात की परवा कोनी करै क लोग तनै काँई खेवै ह अर तेरा बारां म काँई सोचै ह। अर तू मिनखा को मुंडो देखर बाता कोनी करै पण परमेसर क कनै जाबा ताँई जखो गेलो ह बिनै तू सच-सच बतावै ह। पण म्हें तनै बुजां हां क कैसरनै चुंगी देणी चाए क कोनी?” 15ईसु बाकी चालनै भापगो अर बाऊँ बोल्यो, “थे मनै क्युं बिचासो हो? थे मेर कनै एक सीक्को ल्याओ जिऊँ म देखूँ।” 16बे ईसुनै एक सीक्को दिओ। अर ईसु बाऊँ बुज्यो, “इपै किकी सकल अर किको नाम ह?” बे बोल्या, “कैसर की।” 17ईसु बाकी इ बातनै सुणर बोल्यो, “जखो कैसर को ह बो कैसरनै द्यो अर जखो परमेसर को ह बो परमेसरनै द्यो।” बे ईसु की इ बातनै सुणर ताजूब म पड़गा।
मर्या पाछै जीबा प सुवाल
(मत्ती 22:23–33; लूका 20:27–40)
18 #
काम 23:8
इकै पाछै सदुकी ईसु कनै आया अ मानी हीं क मरेड़ी काया ओज्यु कोनी जीवै अर बे ईसुनै बुजबा लाग्या, 19“ओ गरूजी मूसा म्हारै ताँई मांड्यो ह क जिको भाई मर जावै अर बिकी लूगाई क कोई टाबर नइ होवै जणा मरबाळा को भाई बिकी लूगाईऊँ ब्या करले जिऊँ बो आपका भाई को वंस बढावै। 20एक बार सात भाई हा। बामैऊँ बडोड़ा को ब्या होयो अर क्युंक दिना क पाछै बो मरग्यो बिकी लूगाई क कोई टाबर-टिकर कोनी हो। 21बिको दुसरो भाई बिऊँ ब्या कर लिओ अर बो बी क्युंक दिना क पाछै मरग्यो अर बिऊँ बी बिकै कोई टाबर कोनी होयो। तीसरो भाई बी अंय्यांई कर्यो अर बिकै सागै बी बोई होयो। 22अर अंय्यांई सात्यु का सात्यु बे ओलादई मरगा अर बिकै पाछै बा लूगाई बी मरगी। 23बे ईसुनै बुजबा लाग्या क सगळी मरेड़ी काया ओज्यु जिसी बि दिन बा सात मऊँ किकी लूगाई होसी। क्युं क बे सात्युई बिनै ब्याली ही।” 24ईसु बाऊँ बोल्यो, “थे आ बातानै गळत लेली क्युं क थे सास्तरानै अर परमेसर की सक्तिनै कोनी जाणो। 25जद मरेड़ी काया ओज्यु जिसी जणा बाको ब्या कोनी होसी पण बे ईस्बर नगरी म ईस्बर नगरी दुता की जंय्यां होसी। 26अर जठै ताँई मरेड़ी काया क जीबा को सुवाल ह, थे मूसा की पोथी म ओ कोनी बाच्यो के? जद परमेसर बळती झाड़ी मऊँ बिऊँ खयो:
‘म अब्राहम को परमेसर हूँ, इसाक को परमेसर हूँ अर याकूब को परमेसर हूँ।’
27“इको मतबल ओ ह क बे मरगा पण बे मरेड़ा कोनी जिंदा हीं जणाई बो मर्या खप्या को कोनी पण जीता-जागता को परमेसर ह। थे तो भेम म पड़्या हो।”
सगळा मऊँ बडो हुकम
(मत्ती 22:34–40; लूका 10:25–28)
28बठै एक यहूदि सास्तरानै सीखाबाळो आयो अर बो बानै बठै जिरै करता अर ईसु बा सदुकीयानै सागेड़ो जुबाब देर्यो हो आ देखर बो ईसुनै बुज्यो, “सगळा हुकमा मऊँ कूणसो बडो ह?” 29ईसु बिऊँ बोल्यो, “सगळा मऊँ बडोड़ो ओ ह।
‘सुणो इजरायलीओ आपणा परमेसरनै छोडर कोई परबु कोनी ह। 30अर थे आपका सगळा हियाऊँ सगळी आत्माऊँ सगळी बुदीऊँ अर आपकी सगळी सक्तिऊँ परमेसरऊँ परेम करो।’ 31अर दुसरो हुकम ओ ह ‘तू तेरा पड़ोसीऊँ बंय्यांई परेम कर जंय्यां तू खुदऊँ परेम करै ह।’
“आ हुकमाऊँ बडो कोईबी हुकम कोनी।” 32यहूदि सास्तरानै सीखाबाळा ईसु की इ बातनै सुणर बोल्या, “ओ गरूजी थारो ओ खेबो बी सच ह क परमेसर एकई ह अर बिनै छोड दुसरो कोई कोनी। 33आपका सगळा हियाऊँ #12:33क्युंक पोथ्या म सगळा हिया क पाछै सगळी आत्माऊँ बी मंडर्यो ह। सगळी बुदीऊँ अर आपकी सगळी सक्तिऊँ परमेसरऊँ परेम करो अर आपका पड़ोसीऊँ खुदकी जंय्यां परेम करो। अर अ दोन्यु सगळा होमबली अर चढावाऊँ बढकै ह।” 34#लूक 10:25–28जि चतराईऊँ बो जुबाब दिओ हो बिकी सुणर ईसु बिऊँ खयो, “तू परमेसर का राजऊँ घणी दूर कोनी।” इकै पाछै कोईसाकी ईसुऊँ सुवाल बुजबा की हिमत कोनी बगी।
मसी किको बेटो ह?
(मत्ती 22:41–46; लूका 20:41–44)
35इकै पाछै ईसु मनदर म परबचन देतोई बोल्यो, “सास्तरानै सीखाबाळा क्याले बोलीं हीं क, मसी दाऊद को बेटो ह? 36पण दाऊद खुद पबितर आत्माऊँ भर'र बोल्यो हो:
‘परबु (परमेसर) मेरा परबुऊँ खियो जद ताँई म तेरा दुस्मनानै तेरै पगा तळै नइ कर द्युँ मेरै दाया हात बेठ्यो रेह।’
37“दाऊद खुदई मसीनै परबु बोलै ह जणा मसी दाऊद को बेटो कंय्यां हो सकै ह?”
घणीसारी भीड़ ईसु की बातानै राजी हियाऊँ सुणै ही।
सास्तरानै सीखाबाळाऊँ बचर रेहज्यो
(मत्ती 23:1–36; लूका 20:45–47)
38ईसु बानै सीखातोई बोल्यो, “थे सास्तरानै सीखाबाळाऊँ बचज्यो जानै लामा-लामा चोळा पेरबो अर घूमबो चोखो लागै ह अर बे चावीं हीं क लोग बजारा म बाको आदर करीं। 39अर बे अरदास करबाळी झघा अर जिमणार म उची गद्दि प बिराजबा की मनस्या राखै ह। 40बे खाली होईड़ी लूगाया का घरानै खाज्यावीं अर देख-दिखावा ताँई लामी-लामी अरदास करीं हीं, आकी बोळी बुरी दसा होसी।”
सचो दान
(लूका 21:1–4)
41ईसु मनदर की दानपेटी क सामै बेठर देखर्यो हो क लोग दानपेटी म कंय्यां दान घालीं हीं। पिसाळा तो बढचढ'र दान घालर्या हा। 42बाकै पाछै बठै एक गरीबणी खाली होईड़ी आई अर बा बी दानपेटी क मांय दो डबली हाळा सीक्का घाली अ सीक्का क्युंक पिसा जत्ता होता हा। 43ईसु आपका चेलानै आपकै कनै बुलायो अर बाऊँ बोल्यो, “म थारूँ सची बोलुँ हूँ आ गरीबणी खाली होईड़ी लूगाई दुसरा सगळा मिनखाऊँ बेत्ती दान घाली ह। 44क्युं क सगळा तो आपकी बढती मऊँ घाल्या पण आ खाली होईड़ी आपकी सगळी कमाई इमै घाल दि। इकै कनै अत्तोई हो जिऊँ इको चूलो बळतो।”
Dewis Presennol:
मरकुस 12: एस डब्लु वी
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
(c) 2010-2017, New Life Computer Institute. All rights reserved