काम 7
7
सतफनुस को भासण
1अर म्हायाजक बिऊँ बुज्यो, “अ बाता सची ह के?” 2जणा सतफनुस बोल्यो, “यहूदि भाई-भाणो अर मेरा बाप समान बडको मेरी सुणो। थानै बेरो होवै तो जद आपणो बाप अब्राहम हारान देस म बसबाऊँ पेली मिसोपोटामिआ म हो। जणा मेमाऊँ भरेड़ो परमेसर बिकै सामै परगट होयो। 3अर बिनै बोल्यो, ‘तू तेरा देस अर तेरा कूणबानै छोड-छाडर बि भौम म चल्योजा जखी म तनै दिखास्युं।’ 4जणा बो परमेसर क कह्या गेल कसदिआ का देसनै छोडर हारान देस म चलेगो अर बिका बाप क मर्या पाछै परमेसर बिनै इ देस म ल्यायो जिमै आज थे रेहर्या हो। 5पण परमेसर बिनै बापोत म क्युंई कोनी दिओ अठै ताँई पग म्हेलबा की झघा बी कोनी दिनी। पण बिऊँ करार कर्यो क, ‘म तनै अर तेरै पाछै तेरा कूणबानै ओ देस देस्युँ।’ जद परमेसर अब्राहमऊँ ओ करार कर्यो हो बि टेम बिकै कोई आस-ओलाद कोनी ही। 6अर परमेसर बिऊँ अंय्यां बोल्यो, ‘तेरी ओलाद दिसावर म च्यार सो बरस ताँई गुलामी म रेह्सी अर बठै का मिनख बानै दिन घालसी। 7तेरा टाबरानै दिनघालबाळा देस को म न्याय करस्युं जणा पाछै बे बि देसऊँ अजाद होर अठै आर मेरी भगती करसी।’ 8परमेसर अब्राहमऊँ बोल्यो क, ‘आपणा बिच होयड़ा करार की सेलाण आ ह की तेरा कूणबा का सगळा छोरा की सुन्नत#7:8 जद परमेसर अब्राहम क सागै करार कर्यो हो अर ओडायो क इ करार की सेलाण क रूप सगळा यहूदि नर टाबरा को बाका जलम क आठवा दिन सुन्नत करबो जरूरी ह। होणी चाए।’ इ बजेऊँ अब्राहम इसाक का जलम क पाछै आठवा दिन बिकी सुन्नत करी। अर अंय्यांई इसाक याकूब की अर याकूब आपका बारा छोरा की सुन्नत करी जखा आपणा बारा गोता का बाप-दादा हा। 9आपणा गोता का बाप-दादा आपका भाईड़ा युसूफ प जळता हा। जणा बे बिनै मिसर देस का मिनखानै बेच दिआ पण परमेसर बिकै सागै हो। 10अर बो बिनै सगळी तुम्ताऊँ बचायो। परमेसर बिनै बुदी देर मिसर का राजा की नजर्या म उठायो, जिऊँ राजा बिनै आपको खास आदमी बणा लिओ, जणा इब राज-काज की अर राज महल की सगळी जिमेदारी बिनैई सूप दिनी। 11इकै पाछै बठै मिसर अर कनान देस म काळ पड़्यो जिऊँ तराई-तराई माचगी। अर आपणा बडकानै खाबा का लाला पड़गा। 12अर जद याकूब क काना म आ बात पड़ी क मिसर म अनाज ह जणा बो पेली आपणा बाप-दादा जखा बिका बेटा हीं बानै दाणा का जोगाड़ म मिसर भेज्यो। 13अर जद बे दुसर क मिसर आया जणा युसूफ आपका भायानै आपकी पिछाण बताई अर मिसर का राजानै बी जणाई बिका परवार का बारां म बेरो पड़्यो। 14जणा युसूफ आपका बाप याकूब अर आपका कूणबानै जखा कुल मिलार पिच्चेतर जणा हा, बा सगळानै मिसर बुलवालिआ। 15जणा याकूब अर बे सगळा मिसर गया, अर बो अर आपणा बाप-दादा बठैई पिराण तज्या। 16बठैऊँ बाकी हाड्यानै सेकेन ल्यार बि कबर म धर्या जिनै अब्राहम हमोर का बेटाऊँ मोल ली ही। 17अर जद अब्राहम क सागै परमेसर का करेड़ा करार क पूरो होबा को टेम आयो जणा मिसर म आपणा मिनखा की गिणती बोळी बढगी ही। 18जणा पाछै मिसर म दुसरो राजा होयो जखो युसूफनै कोनी जाणतो हो। 19बो आपणा मिनखा को फाईदो उठार बानै बोळो दिन घाल्यो, जिऊँ आपणा बडका आपका टाबरानै मरबा ताँई बारनै बगाबा प बेबस होगा। 20अर बा दिना मई मूसा को जलम होयो, अर बो परमेसर क सामै बोळो सोवणो हो। अर तीन म्हेना ताँई बिका माँ-बाप बिनै घर मई पाळ्यो-पोस्यो। 21अर जद बिका माँ-बाप बिनै बारनै छोड्याया हा जणा बिनै मिसर का राजा की छोरी उठार आपकै सागै लेगी अर बिनै आपको टाबर कर पाळबा लागगी। 22अर बिनै मिसरी मिनखा की सगळी बिद्या सीखाई गई ही, अर बो खेबा अर काम करबा म सागेड़ो होगो। 23जद बो चाळिसेक बरस को होयो जणा बिको मन आपका इजरायल का यहूदि भाई-भाणाऊँ मिलबा को कर्यो। 24जणा बो आ देख्यो क एक मिसरी मिनख एक इजरायली मिनख क सागै बुरो बरताव बरतर्यो ह, जणा बो बिनै बचायो अर बि मिसरी मिनखनै मार बिको बदलो लिआ 25अर बो आ देखी क इब बिका यहूदि भाई-भाण आ जाण ज्यासी क परमेसर बिनै बाका छुटकारा ताँई भेज्यो ह, पण बाकै क्युंई पलै कोनी पड़ी। 26आगलै दिन बो दो इजरायली यहूदि भाईड़ानै घुळता देख्यो जणा बो बानै छुटाबा ताँई बोल्यो थे तो दोन्यु इजरायली हो जणा पाछै आपसरी म क्युं घुळो हो। 27पण बामैऊँ जखो बुरो बरताव बरतै हो बो मूसा क धको मार बोल्यो, ‘तनै म्हारै प कूण परधान अर न्याय करबाळो बणायो ह? 28काल जंय्यां बि मिसरी मिनखनै मार्यो हो बंय्यांई तू मनै बी मारबो चावै ह के?’ 29आ सुणर मूसा भागर मिधान देस म बसगो, जठै बिकै दो टाबर होया। 30चाळिस बरस ओर बितगा जणा बिनै सीनै डूँगरी क कनै उजाड़ म एक बळती झाड़ी की आँच म ईस्बर नगरी दुत दरसाव दिओ। 31आ देख ताँई मूसा ऊक-चूक होगो, जणा ओर सूल देखबा ताँई झाड़ी क कनै गयो, जणा बिनै परबु की उवाज सुणी, 32‘म तेरा बाप-दादा को परमेसर हूँ, म अब्राहम, इसाक अर याकूब को परमेसर हूँ,’ आ सुणताई मूसा तो थर-थर धुजबा लाग्यो अर बिकी क्युं देखबा की हिमत कोनी होई। 33परबु बिऊँ बोल्यो, ‘पगा मऊँ खुसड़ा काड दे क्युं क जि धरती प तू खड़्यो ह बा पबितर झघा ह। 34म मेरा मिनख, जखा मिसर म हीं बाकी दुरदसा देख्यो हूँ अर बाको बार-घोड़ो सुण्यो हूँ, जणाई तो म बानै बठैऊँ छुटाबा ताँई तळै उतर्यो हूँ, इब तू आज्या म तनै मिसर म भेजस्युं।’ 35ओ बोई मूसा ह जिनै बे ओ खेर भगा दिओ हो क तनै कूण म्हारै प परधान अर न्याय करबाळो बणायो ह? बिनैई परमेसर बि ईस्बर नगरी दुत क जरिए जखो बिनै झाड़ी म दरसाव दिओ हो, राजकरबा अर अजाद करबा ताँई भेज्यो। 36ओ बोई मूसा ह जखो बानै मिसर देस, लाल समदर अर बि उजाड़ म चाळिस बरसा ताँई सेलाणी-चमत्कार दिखार बानै लिआयो। 37ओ बोई मूसा ह जखो इजरायल का मिनखानै बोल्यो हो, ‘परमेसर थारा यहूदि भाया मऊँ मेरी जंय्यां को परमेसर की खेबाळो भेजसी।’ 38ओ बोई ह जखो उजाड़ म इजरायली मिनखा की मंडळी क सागै हो, जिऊँ सीनै डूँगरी प ईस्बर नगरी दुत बतळायो हो अर बो आपणा बाप-दादा क सागै बी हो। अर जिनै आपणा ताँई परमेसरऊँ जीवन देबाळा बचन मिल्या। 39पण आपणा बाप-दादा बिकी कोनी मानी, अर बे बिनै तज'र आपका मननै बदलर ओज्यु मिसर जाबो चावै हा। 40अर हारुणऊँ बोल्या, ‘म्हारै ताँई अंय्यां को देवता बणा जखो म्हारै आगै-आगै चालै, क्युं क जखो मूसा म्हानै मिसर देसऊँ ल्यायो म्हें कोनी जाणा क बिकै सागै काँई होयो?’ 41बा दिना म बे आप ताँई एक गाय का बाछ्या की मूरती घड़र धर लिनी अर बिकै बलि चढार खुदका हाताऊँ बणाएड़ी मूरती प खुसी मनाई। 42जणा परमेसर बाऊँ मुंडो फेर लिओ, अर बानै आसमान का चाँद-तारानै धोकबा ताँई छोड दिओ जंय्यां की परमेसर की खेबाळा की पोथ्या म मंडर्यो ह, ‘ओ इजरायल का कूणबा का मिनखो, थे उजाड़ म चाळिस बरसा म मनै ज्यानबर अर चढावो चढाया हो के? 43पण थे तो मोलेक देवता का तम्मू अर तारा देवता रिफान की मूरतीनै सागै लिआ हांडता हा जखी मूरत्यानै थे धोकबा ताँई बणाई ही, इ ताँई म थानै बेबिलोन क परै लेज्यार गुलामी म देस्युँ।’ 44बि उजाड़ म परमेसर को तम्मू जिमै आपणा बापदादा परमेसरऊँ अरदास करता हा बो बी आपणा बाप-दादा क सागै हो। अर ओ ठिक बंय्यांई हो जंय्यां परमेसर मूसानै दिखार बिनै बणाबा ताँई ओडायो हो। 45इकै पाछै आपणा बाप-दादानै ओ तम्मू बाका बापदादाऊँ मिल्यो अर जद बे यहोसू क सागै अठै आया अर बिकाळी निगा म बे बा जात्याऊँ इ देसनै ले लिओ हो, जानै आपणा बाप-दादा क सामैऊँ परमेसर भगा दिओ हो, अर बो तम्मू दाऊद क जमाना ताँई अठैई रिह्यो। 46परमेसर दाऊद प दया करी, जणा बो बिऊँ इजरायल का मिनखा ताँई परमेसर को बडो अरदास घर बणाबा की अरदास करी। 47पण परमेसर का मनदरनै राजा सुलेमान बणायो हो। 48पण परम-परधान परमेसर तो हाताऊँ बणाएड़ा मनदर म कोनी रेह्वै। जंय्यां की परमेसर की खेबाळा बोल्यो ह, 49परबु खेवै ह, ‘ईस्बर नगरी मेरो सिंघासन अर आ धरती मेरा पगा तळै की चोकी ह, थे मेर ताँई कंय्यां को घर बणास्यो? धरती प अंय्यां की कोई झघा ह के जठै म अराम कर सकूँ? 50अ सगळी चिजा मेरीई तो बणाएड़ी ह।’”
51आ खेर सतफनुस बानै सुणाबा लाग्यो, “परमेसरनै कोनी मानबाळा अर बिका बचनानै नइ सुणबाळा ढिट मिनखो, थे सदाई थारा बाप-दादा की जंय्यां पबितर आत्मा को बिरोद करता आया हो। 52अंय्यां को कोई परमेसर की खेबाळो होयो हो के जिनै थारा बाप-दादा कोनी सताया हो? बे बा परमेसर की खेबाळानै मार गेर्या जखा बि परमेसर का धरमी दास क आबा को समचार पेल्याई दिआ करता हा। अर ठिक बंय्यांई थे बी बिनै धोकाऊँ पकड़ाबाळा अर मारबाळा होया। 53थानै ईस्बर नगरी दुताऊँ नेम-कायदा का हुकम तो मिलग्या पण थे आनै कोनी मानो।”
भाठाऊँ सतफनुसनै मारबो
54अ बाता सुणताई बे सतफनुस प लाल-ताता होगा, अर आँख्या का'डर जाड़ भीचबा लागगा। 55पण बो तो पबितर आत्माऊँ भर'र ईस्बर नगरी कानि देख्यो, जणा बो परमेसर की मेमा का तेज अर परमेसर क दाया हात कानि ईसुनै खड़्यो देखर 56बोल्यो, “सुणो म ईस्बर नगरीनै खुली अर मिनख का बेटानै परमेसर क दाया हात कानि खड़्यो देखर्यो हूँ।” 57आ सुणताई बे आपका कान बंद कर लिआ अर जोरऊँ चिलाटी घालर एक सागै बिपै टूटर पड़्या। 58बे बिकै सागै धका-मुकी करताई बिनै नगरी क बारनै लेग्या अर बिपै भाठा बगाबा लाग्या। अर बिकै खिलाप हाळा गुवा आप-आपका गाबा साऊल क पगा म म्हेल दिआ। 59अर बे बिपै भाठा बगाबा लागर्या हा बि टेमई बो परमेसरऊँ आ खेतो अरदास करबा लाग्यो, “ओ परबु ईसु मेरा पिराणानै थारै कनै बुलाल्यो।” 60इकै पाछै बो गोडावाणी पड़्यो अर जोरऊँ बोल्यो, “परबु ओ पाप आपै मना मंढो।” आ खेर बो पिराण तज दिआ।
Dewis Presennol:
काम 7: एस डब्लु वी
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
(c) 2010-2017, New Life Computer Institute. All rights reserved